លួ.ចទូរស័ព្ទបានសម្រេចហើយ តែអត់មានអ្វីសាកថ្ម រំលងបាន៥ថ្ងៃ មកលួ.ចឆ្នាំងសាកទៀត ត្រូវអស់លក្ខណ៍
- កំពង់ស្ពឺ
ខេត្តកំពង់ស្ពឺ៖ ជនសង្ស័យម្នាក់ត្រូវបានកម្លាំងនគរបាលប៉ុស្តិ៍រដ្ឋបាលសង្កាត់រការធំ នៃអធិការដ្ឋាននគរបាលក្រុងច្បារមនឃាត់ខ្លួន ខណៈដែលជនសង្ស័យធ្វើសកម្មភាពលួចទូរស័ព្ទដៃបានសម្រេចហើយ មិនមានអ្វីសាកថ្ម រំលងបាន៥ថ្ងៃ មកលួចឆ្នាំងសាកថ្មម្តងទៀត ត្រូវបាននគរបាលឃាត់ខ្លួន។
ការឃាត់ខ្លួនជនសង្ស័យខាងលើបានធ្វើឡើងកាលពីព្រឹកថ្ងៃទី២ ខែវិច្ឆិកា ឆ្នាំ២០២៦ នៅតាមបណ្តោយផ្លូវជាតិលេខ៤ ទល់មុខមន្ទីរពេទ្យបង្អែកខេត្តកំពង់ស្ពឺ ស្ថិតនៅក្នុងភូមិអង្គសិរី សង្កាត់រការធំ ក្រុងច្បារមន ខេត្តកំពង់ស្ពឺ។
នគរបាលក្រុងច្បារមនបាននិយាយឱ្យដឹងថា ជនសង្ស័យដែលត្រូវឃាត់ខ្លួនឈ្មោះ ផល សុឆាត ភេទប្រុស អាយុ២១ឆ្នាំ មុខរបរមិនពិតប្រាកដ រស់នៅក្នុងភូមិរំលោងប្រឃ្លះ សង្កាត់សុព័រទេព ក្រុងច្បារមន ខេត្តកំពង់ស្ពឺ ។
ទូរស័ព្ទដៃដែលជនសង្ស័យធ្វើសកម្មភាពលួចបានសម្រេចម៉ាក អាយហ្វូន១៤ប្រូ( iPhone 14pro) ពណ៌ស្វាយ ដែលជាកម្មសិទ្ធិរបស់អ្នកលក់ដូរ នៅមុខមន្ទីរពេទ្យបង្អែកខេត្តកំពង់ស្ពឺតែម្តង។
នគរបាលក្រុងច្បារមនបានបន្តឱ្យដឹងទៀតថា កាលពីវេលាម៉ោង៤និង៣០នាទីរសៀលថ្ងៃទី២៨ ខែតុលា ឆ្នាំ ២០២៦កន្លងទៅ ជនសង្ស័យ បានធ្វើសកម្មភាពលួចយកទូរស័ព្ទដៃ១គ្រឿង ម៉ាក iPhone 14pro ពណ៌ស្វាយ ស្ថិតក្នុងតូបលក់ដូរ មុខមន្ទីរពេទ្យបង្អែកខេត្តកំពង់ស្ពឺ ស្ថិតនៅភូមិអង្គសេរី សង្កាត់រការធំ ក្រុងច្បារមន ខេត្តកំពង់ស្ពឺ។ ម្ចាស់ទូរស័ព្ទដៃក៏បានមកដាក់ពាក្យបណ្ដឹងដើម្បីឲ្យសមត្ថកិច្ចនគរបាលជួយធ្វើការអន្តរាគមន៍ស្រាវជ្រាវស្វែងរកជនសង្ស័យដើម្បីយកមកដល់ទៀតទោសតាមផ្លូវច្បាប់។
ស្រាប់តែនៅព្រឹកថ្ងៃទី២ ខែវិច្ឆិកា ឆ្នាំ២០២៦ ជនសង្ស័យបានធ្វើសកម្មភាពលួចឆ្នាំងសាកទូរស័ព្ទម្ដងទៀត ត្រូវបានម្ចាស់ស្រែកផ្អើលឆោឡោចៃដន្យកម្លាំងសមត្ថកិច្ច កំពុងល្បាតតាមមូលដ្ឋានក៏ធ្វើការឃាត់ខ្លួនជនសង្ស័យតែម្តង។
នគរបាលក្រុងច្បារមនបានបញ្ជាក់ថាក្រោយឃាត់ខ្លួនជនសង្ស័យបានសារភាពថារូបគេពិតជាបានធ្វើសកម្មភាពលួចយកទូរស័ព្ទដៃ ពីតូបលក់ដូរពិតប្រាកដមែន។ ដោយមិនមានអ្វីសាកថ្ម ក៏មកលួចយកឆ្នាំងសាកដើម្បីយកទៅសាកថ្មទូរស័ព្ទ ម្ចាស់ទាន់ស្រែកឆោឡោ ហើយក៏ត្រូវបានសមត្ថកិច្ចនគរបាលឃាត់ខ្លួនបានតែម្ដង។
ចំណែកវត្ថុតាងទូរស័ព្ទដៃ ម៉ាកIPhone 14 pro ពណ៌ស្វាយនឹង ឆ្នាំងសាក ត្រូវបាននគរបាលជំនាញនគរបាលយុត្តិធម៌ក្រុងច្បារមន ប្រគល់ជូនម្ចាស់ដើមវិញហើយ ។
ដោយឡែកជនសង្ស័យ ត្រូវបានកសាងសំណុំរឿងបញ្ជូនទៅការិយាល័យជំនាញនៃស្នងការដ្ឋាននគរខេត្តកំពង់ស្ពឺដើម្បីចាត់ការបន្តតាមផ្លូវច្បាប់៕
ចែករំលែកព័តមាននេះ