កម្ពុជា ត្រៀមរបាំប្រពៃណីសម្រាប់កិច្ចប្រជុំកំពូល ហ្វ្រង់កូហ្វូនី
- ភ្នំពេញ
រាជធានីភ្នំពេញ៖ សិល្បករ សិល្បការិនី នៃនាយកដ្ឋានសិល្បៈទស្សនីយភាព បានសម្រាំងទស្សនីយភាពរបាំប្រពៃណីមួយចំនួនសម្រាប់សម្ដែងក្នុងពិធីលៀងសាយភោជន៍ នៃកិច្ចប្រជុំកំពូលហ្វ្រង់កូហ្វូនីលើកទី២០ ឆ្នាំ២០២៦ នាពេលខាងមុខ ។
បើតាមនាយកដ្ឋានសិល្បៈទស្សនីយភាព មុនពេលសម្ដែងជាផ្លូវការ សិល្បករ សិល្បការិនី នៃនាយកដ្ឋានសិល្បៈទស្សនីយភាព បានសម្ដែងសាកល្បងទស្សនីយភាពរបាំប្រពៃណីជាច្រើនទម្រង់ ជូនថ្នាក់ដឹកនាំពិនិត្យ និងផ្តល់មតិយោបល់ ដើម្បីកែលម្អគុណភាពសិល្បៈ កាលពីថ្ងៃទី១៩ តុលា ។
ការសម្ដែងសាកល្បងនេះប្រព្រឹត្តទៅក្រោមអធិបតីភាពលោកជំទាវបណ្ឌិតពេជ ចន្ទមុន្នី ហ៊ុន ម៉ាណែត ឯកឧត្តមឧបនាយករដ្ឋមន្ត្រីប្រាក់ សុខុន និងលោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ពិនិត្យ និងផ្តល់មតិយោបល់ ដើម្បីឲ្យការសម្ដែងនាពេលខាងមុខប្រកបដោយគុណភាព សោភ័ណភាព និងភាពល្អប្រសើរ ព្រមទាំងបង្ហាញពីភាពសម្បូរបែបនៃសិល្បៈរបាំប្រពៃណីខ្មែរ ជូនគណៈប្រតិភូជាតិ និងអន្តរជាតិ ។
នៅថ្ងៃទី១៤ ខែវិច្ឆិកា ឆ្នាំ២០២៦ព្រះរាជាណាចក្រកម្ពុជា នឹងធ្វើជាម្ចាស់ផ្ទះរៀបចំកិច្ចប្រជុំកំពូលហ្វ្រង់កូហ្វូនីលើកទី២០ និងព្រឹត្តិការណ៍ពាក់ព័ន្ធនៅរាជធានីភ្នំពេញ ។
នៅក្នុងកិច្ចប្រជុំកំពូលហ្វ្រង់កូហ្វូនី នឹងមានថ្នាក់ដឹកនាំ កំពូលៗប្រមាណ៩០ប្រទេសចូលរួម និងឥស្សរជន សំខាន់ៗរបស់កម្ពុជាដែលគ្រោងនឹងចូលរួមក្នុងព្រឹត្តិការណ៍ជាប្រវត្តិសាស្ត្រនេះ រួមមាន ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា, សម្តេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃកម្ពុជា និងឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងជាប្រធានគណៈកម្មការជាតិរៀបចំកិច្ចប្រជុំ កំពូលៗ ។ ក្រៅពីនេះមានអ្នកសារព័ត៌មានជាតិ និងអន្តរជាតិរាប់ពាន់នាក់ ៕
ចែករំលែកព័តមាននេះ