សហរដ្ឋអាមេរិក ៖ យោងតាមសេចក្តីរាយការណ៍របស់កាសែត Financial Times (FT) នៅថ្ងៃទី១៥ តុលា បានឱ្យដឹងថា សហរដ្ឋអាមេរិកបានស្នើឱ្យបណ្តាប្រទេសអឺរ៉ុបបញ្ចេញទ្រព្យសម្បត្តិរុស្ស៊ីមួយចំនួនដែលត្រូវបានបង្កក ហើយផ្ទេរវាទៅឱ្យយន្តការក្រោមការត្រួតពិនិត្យរបស់ទីក្រុងវ៉ាស៊ីនតោន ដើម្បីស្តារកិច្ចចរចាសន្តិភាពឡើងវិញ។
តាមមនុស្ស ៤ រូប ដែលដឹងអំពីរឿងនេះ បានប្រាប់កាសែត Financial Times ថា គំនិតនេះ ត្រូវបានលើកឡើងអំឡុងពេលនៃការពិភាក្សាមួយ នៅទីក្រុងម៉ៃអាមី (Miami) កាលពីសប្តាហ៍មុន រវាងក្រុមអ្នកចរចាសន្តិភាពរបស់លោក ដូណាល់ ត្រាំ (Donald Trump) និងមន្ត្រីមកពីប្រទេសអ៊ុយក្រែន បារាំង អាល្លឺម៉ង់ ព្រីតថេន សហភាពអឺរ៉ុប (EU) និងអង្គការណាតូ (NATO)។
សហរដ្ឋអាមេរិកបានស្នើវិធីសាស្ត្រអាចធ្វើទៅបានជាច្រើន ដើម្បីដោះស្រាយបញ្ហាទ្រព្យសម្បត្តិរុស្ស៊ីដែលត្រូវបានបង្កក រួមទាំងការផ្ទេរវាចូលទៅក្នុងគម្រោងហិរញ្ញវត្ថុពិសេសថ្មីមួយ ដែលគ្រប់គ្រងដោយទីក្រុងវ៉ាស៊ីនតោន។ មន្ត្រីអាមេរិកម្នាក់បាននិយាយថា ការប្រើប្រាស់ទ្រព្យសម្បត្តិរុស្ស៊ីដែលត្រូវបានបង្កក ត្រូវបានលើកយកមកពិភាក្សាជាផ្នែកមួយនៃកិច្ចព្រមព្រៀងសន្តិភាព «អ៊ុយក្រែន-រុស្ស៊ី» ហើយយន្តការដែលថា ត្រូវចំណាយប្រាក់ទាំងនោះតាមរបៀបណា និងនៅទីណា គឺនៅតែស្ថិតក្រោមការពិភាក្សាគ្នានៅឡើយ។
ទោះយ៉ាងណាក៏ដោយ គណៈប្រតិភូអឺរ៉ុបបានច្រានចោលផែនការនេះ ដែលត្រូវបានស្នើឡើងដោយបេសកជនពិសេសរបស់អាមេរិក លោក Steve Witkoff និងកូនប្រសាររបស់លោក ត្រាំ គឺលោក Jared Kushner។ អឺរ៉ុប និងអ៊ុយក្រែនមានការភ្ញាក់ផ្អើល និងចោទជាសំណួរអំពីចេតនាពិតប្រាកដរបស់សហរដ្ឋអាមេរិក និងវិធីសាស្ត្រខុសគ្នាយ៉ាងខ្លាំងរបស់ខ្លួន នៅក្នុងការជំរុញឱ្យរុស្ស៊ីបញ្ចប់ការឈ្លានពានលើអ៊ុយក្រែន។
គួររំលឹកដែរថា បណ្តាប្រទេសសម្ព័ន្ធមិត្តលោកខាងលិចបានបង្កកទ្រព្យសម្បត្តិរដ្ឋរុស្ស៊ីប្រមាណ ២៦០ ពាន់លានអឺរ៉ូ ក្នុងឆ្នាំ២០២២ ដើម្បីឆ្លើយតបទៅនឹងការឈ្លានពានពេញទំហឹងរបស់លោក វ្ល៉ាដឺមៀ ពូទីន (Vladimir Putin) លើប្រទេសអ៊ុយក្រែន ដែលភាគច្រើននៃទ្រព្យទាំងនោះ ត្រូវបានរក្សាទុកនៅសហភាពអ៊ឺរ៉ុប៕
ចែករំលែកព័តមាននេះ