រថយន្តមិនស្គាល់ម៉ាកបុ.កបុរសចំណាស់ដើរឆ្លងផ្លូវជាតិលេខ៤ ស្លា.ប់ រួចបន្ថែមល្បឿនបើកគេចបាត់
- កំពង់ស្ពឺ
ខេត្តកំពង់ស្ពឺ៖ បុរសវ័យចំណាស់ម្នាក់បានស្លាប់ភ្លាមៗនៅកន្លែងកើតហេតុ ខណៈដែលដើរឆ្លងកាត់ផ្លូវជាតិលេខ៤ ហើយត្រូវបានរថយន្តមិនស្គាល់ម៉ាកបើកលឿនបុកពេញទំហឹង បង្កឱ្យមានការភ្ញាក់ផ្អើលដល់អ្នកធ្វើដំណើរនិងសមត្ថកិច្ច។
ហេតុការណ៍គ្រោះថ្នាក់ចរាចរណ៍ខាងលើបានកើតឡើងកាលពីវេលាម៉ោង៥និង៣០នាទីព្រឹកថ្ងៃទី១៤ ខែតុលា ឆ្នាំ២០២៦ នៅតាមបណ្តោយផ្លូវជាតិលេខ៤ ចន្លោះបង្គោលគីឡូម៉ែត្រលេខ៣២-៣៣ ត្រង់ចំណុចក្នុងភូមិរំដួល ឃុំត្រពាំងគង ស្រុកសំរោងទង ខេត្តកំពង់ស្ពឺ ។
នគរបាលស្រុកសំរោងទងបាន និយាយឱ្យដឹងថា នៅមុនពេលកើតហេតុមានរថយន្ត១គ្រឿងម៉ាកមិនស្គាល់ម៉ាក និងអត្តសញ្ញាណអ្នកបើកបរ (បានបើករត់គេចខ្លួនក្រោយពេលកើតហេតុរួច) រថយន្តបានបើកបរ តាមបណ្តោយផ្លូវជាតិលេខ៤ ពីទិសខាងកើតទៅទិសខាងលិច លុះពេលធ្វើដំណើរមកដល់ចំណុចកើតហេតុខាងលើបានបុកមនុស្ស១នាក់ឈ្មោះ ត្រាវ សារី ភេទប្រុស អាយុ៥៩ឆ្នាំ ស្រុកកំណើតភូមិពាមខ្នង ឃុំផ្លូវទូក ស្រុកកំពង់លែង ខេត្ដកំពង់ឆ្នាំង ស្នាក់នៅបន្ទប់ជួលក្នុងភូមិធ្លក ឃុំត្រពាំងគង ស្រុកសំរោងទង ខេត្តកំពង់ស្ពឺ ដែលកំពុងដើរឆ្លងផ្លូវពីទិសខាងត្បូងទៅទិសខាងជើង បណ្ដាលឲ្យស្លាប់នៅកន្លែងកើតហេតុ ពេលឃើញដូច្នោះ តៃកុងរថយន្តបានបន្ថែមល្បឿនរត់គេចខ្លួនបាត់ស្រមោល។
នគរបាលស្រុកសំរោងទង បានបន្ថែមឲ្យដឹងទៀតថា ក្រោយកើតហេតុនគរបាលបានចុះធ្វើការវាស់វែងនៅកន្លែងកើត ចំពោះសពបុរសវ័យចំណាស់ខាងលើត្រូវបានក្រុមគ្រួសារយកទៅ តម្កល់ទុក និងបូជានៅវត្ដរលាំងកំពូល ក្នុងឃុំត្រពាំងគង ស្រុកសំរោងទង ខេត្តកំពង់ស្ពឺ។
ចំណែករថយន្ត និងអ្នកបើកបរដែលបានបើករត់គេចខ្លួននោះ នគរបាលជំនាញកំពុងធ្វើការស្រាវជ្រាវបន្ដ ដើម្បីយកមកអនុវត្តទោសតាមផ្លូវច្បាប់ ៕
ចែករំលែកព័តមាននេះ