ក្រុមហ៊ុននានានៅទីក្រុង កាន់ថឺ នៃតំបន់ដែនដីសណ្តរទន្លេមេគង្គដែលនៅក្បែរនឹងប្រទេសកម្ពុជា អាចនឹងបើកទីផ្សារការងារដើម្បីទទួលពលករពីកម្ពុជា ខណៈសង្វាក់ផលិតកម្មនានានៅក្នុងទីក្រុងនេះកំពុងតែខ្វះខាតខ្លាំង ។
កាសែតយុវជនវៀតណាមបានរាយការណ៍ថា កម្មករជំនាញវៀតណាមពួកគេបានស្វះស្វែងរកទីផ្សារការងារនៅក្រៅប្រទេសដែលមានប្រាក់ខែច្រើន ដូច្នេះហើយទីក្រុងកានថឺប្រឈមមុខនឹងកង្វះខាតពលករច្រើន ។
លោក ឃ្វៀន វាន់ហាវ ( Nguyen Van Hao) ប្រធានសមាគមធុរកិច្ចទីក្រុងកាន់ថឺ បានអះអាងថា ក្រុមហ៊ុននានានៅក្នុងទីក្រុងកំពុងប្រឈមមុខនឹងការខ្វះខាតកម្មករ និងបុគ្គលិកបច្ចេកទេសកាន់តែខ្លាំងឡើង។
លោកបានអះអាងថា ជាមួយនឹងការបើកដំណើរការតំបន់ឧស្សាហកម្មបន្ថែមទៀត អាជីវកម្មនានាកំពុងប្រកួតប្រជែងគ្នាយ៉ាងខ្លាំងក្លាដើម្បីដណ្តើមយកកម្មករ ដោយក្នុងករណីខ្លះ ពួកគេបានដំឡើងប្រាក់ឈ្នួលដើម្បីទាក់ទាញកម្លាំងពលកម្មហើយ សហគ្រាសខ្លះ កំពុងវិនិយោគលើបច្ចេកវិទ្យាដើម្បីសម្រួលដល់ដំណើរការផលិត និងកែច្នៃ ក៏ដូចជាកាត់បន្ថយការពឹងផ្អែកលើកម្លាំងពលកម្មក៏ដោយ ប៉ុន្តែប្រព័ន្ធស្វ័យប្រវត្តិកម្មមិនអាចលុបបំបាត់តម្រូវការសម្រាប់ធនធានមនុស្សបានទេ។
លោកបានអះអាង ថា«បើគ្មានមនុស្សទេនោះ ការផលិតក៏មិនអាចដំណើរការបានដែរ»។ លោកបានបន្តថា ទីក្រុង កាន់ថឺគួរតែដាក់ចេញនូវគោលនយោបាយច្បាស់លាស់ដើម្បីជ្រើសរើសកម្មករពីបរទេសជាពិសេសគឺមកពីប្រទេសកម្ពុជា និង ប្រទេសជិតខាងវៀតណាម មកបម្រើការងារនៅក្នុងតំបន់ដីសណ្តទាំងមូល និងជាពិសេសសម្រាប់ទីក្រុងនេះតែម្តង។
ជាការពិតមកដល់ពេលនេះវៀតណាមមិនមែនជាទីផ្សារការងាររបស់ពលករកម្ពុជានៅឡើយទេ ។ កន្លងមកកម្ពុជាបានបញ្ជូនពលករទៅធ្វើការនៅថៃ កាលពេលមុនមានបញ្ហាអរិភាពព្រំដែន ។ ក្រៅពីនោះមានកូរ៉េខាងត្បូង ជប៉ុន ម៉ាឡេស៊ី ជាដើម ៕
ចែករំលែកព័តមាននេះ