ចោរប្រើល្បិចកាន់តែខ្ពស់ហើយប្លែកៗ ខណៈអ្នកបង្ក្រាបកាន់តែធ្លាក់ដៃ
- បាត់ដំបង
ខេត្តបាត់ដំបង ៖ រយៈពេល០២ថ្ងៃហើយ ដែលលោកចោរម្នាក់បានប្រើល្បិចកលបោកយកម៉ូតូពីក្មេងប្រុសម្នាក់បានយ៉ាងស្រួលដូចបកចេក ខណៈការទន្ទឹងរង់ចាំចម្លើយជាវិជ្ជមានពីសមត្ថកិច្ចហាក់គ្មានតម្រុយសម្បីប៉ុនក្រចក បើទោះជាមុខសញ្ញា«បោកយកម៉ូតូ»នោះ បានបង្ហាញយ៉ាងច្បាស់ក្រឡែតនៅលើកញ្ចក់កាមេរ៉ាសុវត្ថិភាពក្ដី ។
អំពើ«ចោរកម្ម»ដែលពោរពេញដោយល្បិចកលរបស់លោកចោរដែលគ្មាននរណានឹកស្មានមិនដល់នេះ បានកើតឡើងនៅវេលាម៉ោង៤ និង៣០នាទីរសៀលថ្ងៃទី១២ តុលា នៅចំណុចក្បាលស្ពាន«ផ្សារខ្នាចរមាស» ស្ថិតក្នុងភូមិខ្នាចរមាស ឃុំខ្នាចរមាស ស្រុកបវេល (ខាងមុខប៉ុស្តិ៍ប្រចាំការរបស់មន្ត្រីមូលដ្ឋាន) ។
ជនរងគ្រោះក្នុងអំពើ «ចោរកម្ម»នេះ ឈ្មោះ ផេង ធីយូអ៊ី ភេទប្រុស អាយុ១២ឆ្នាំ រស់នៅភូមិព្រៃសង្ហា ឃុំខ្នាចរមាស ស្រុកបវេល ។ កុមាររងគ្រោះរូបនេះ បានជិះម៉ូតូទៅយកម្ដាយនៅផ្សារខ្នាចរមាស តែត្រូវលោកចោរម្នាក់ ដែលរៀបគម្រោងរង់ចាំស្ទាក់កាត់តាមផ្លូវស្រែកហៅឲ្យឈប់ រួចប្រើល្បិចនិយាយបញ្ឆោតប៉ុន្មានម៉ាត់ ហើយក៏ឡើងឌុបកុមារាចេញទៅ ។ លុះបានឆ្ងាយបន្តិចពីកន្លែងកើតហេតុ ជននោះក៏ទម្លាក់កុមារានោះចុះ ហើយជននោះបានបន្ថែមល្បឿនម៉ូតូ ជិះឆ្ពោះទៅទិសខាងលិចទៅបាត់ស្រមោលភ្លាមៗ រីឯក្មេងប្រុសនោះ ក៏ដើរស្រែកយំត្រឡប់មករកម្ដាយវិញ ដែលកំពុងរង់ចាំនៅឯផ្សារខ្នាចរមាស ។
លោក ថេង ប៊ុនថេត ឪពុកកុមាររងគ្រោះបានប្រាប់កោះសន្តិភាព នៅព្រឹកថ្ងៃទី១៤ តុលា នេះថា ពីរថ្ងៃហើយដែលចោរបានប្រើល្បិចបោកប្រាស់លួចម៉ូតូកូនប្រុសគាត់ តែពុំទាន់មានដំណឹងល្អពីសមត្ថកិច្ចនៅឡើយទេ ។ គាត់និយាយថា ចោរម្នាក់នោះបានប្រើល្បិច ល្បួងយកម៉ូតូដែលកូនប្រុសគាត់ជិះទៅយកម្ដាយនៅឯផ្សារ ។
ជននោះ ហាក់បានត្រៀមជាមុន ក្នុងគោលដៅប្រព្រឹត្តអំពើ «ចោរកម្ម» នេះ។ ពេលកូនប្រុសគាត់ជិះទៅដល់ចំណុចកើតហេតុ ដែលជននេះកំពុងអង្គុយរង់ចាំ ជននេះបានស្រែកហៅកូនប្រុសគាត់ឲ្យឈប់ធ្វើ ដូចជាធ្លាប់ស្គាល់គ្នា រួចនិយាយថា «ចាំទៅទិញទឹកក្រូចផ្ញើទៅឲ្យជីដូន» ។ ពេលកូនគាត់ឈប់ម៉ូតូ ជននោះក៏ឡើងឌុបកូនប្រុសគាត់ ជាមួយនឹងពាក្យថា «តោះទៅរកទិញទឹកក្រូច» ។ គាត់បាននិយាយបន្តថា ពេលនោះ កូនប្រុសគាត់ក៏ស្រឡាំងកាំងដែរ ពេលជននោះឡើងឌុបថា ទៅរកទិញទឹកក្រូច ព្រោះមិនធ្លាប់ស្គាល់គ្នាសោះ ។
ប៉ុន្តែពេលជិះចេញទៅខាងមុខ «ផ្សារខ្នាចរមាស» ឆ្ពោះទៅទិសខាងលិច ជននោះមិនបានឈប់រកទិញទឹកក្រូចស្អីទេ ។ លុះជិះផុតឆ្ងាយបន្តិច ជននេះបានឈប់ខាងមុខតូបលក់ដូរមួយកន្លែង រួចសួររកទិញទឹកក្រូច តែមិនបានទិញភ្លាមៗទេ គ្រាន់តែប្រាប់ម្ចាស់តូបឲ្យច្រកថង់ទុកសិន ពេលត្រឡប់មកវិញទើបយក ។ ជននោះ ក៏ឌុបកូនគាត់ចេញទៅមុខទៀតបានប្រហែល៥០០ម៉ែត្រ កន្លែងស្ងាត់បន្តិចក៏ឈប់ប្រាប់កូនគាត់ឲ្យចុះពីលើម៉ូតូ តែកូនគាត់មិនព្រមចុះ ក៏ត្រូវជនតិរច្ឆាននោះរុញទម្លាក់ ហើយជននោះ ក៏ជិះម៉ូតូយ៉ាងលឿន ឆ្ពោះទៅទិសខាងលិចបាត់ស្រមោល ខណៈកូនប្រុសគាត់ដើរបណ្ដើរយំបណ្ដើរត្រឡប់មករកម្ដាយវិញ ដែលកំពុងរង់ចាំនៅឯផ្សារយ៉ាងអន្ទះសារ ។
លោក ថេង ប៊ុនថេត បានបញ្ជាក់ដែរថា សកម្មភាពចោរដែលបានប្រើល្បិចកលបោកយកម៉ូតូកូនគាត់បានថតជាប់នៅក្នុងកាមេរ៉ាសុវត្ថិភាព ដែលបំពាក់នៅមុខផ្ទះប្រជាពលរដ្ឋ ហើយរូបភាពនោះ បានបង្ហាញច្បាស់ពេលជននោះឡើងឌុបកូនប្រុសគាត់ជិះចេញពីកន្លែងកើតហេតុ ។ ទាំងរូបភាព ទាំងបណ្ដឹង លោកបានផ្ដល់ឲ្យសមត្ថកិច្ចប៉ុស្ដិ៍រដ្ឋបាលរួចអស់ហើយ នៅឡើយតែចំណាត់ការរបស់សមត្ថកិច្ចទេ ដែលស្ងាត់ជ្រៀប ហាក់ពុំមានតម្រុយបន្តិចសោះ ។
ជុំវិញករណីនេះ កោះសន្តិភាពមិនអាចទំនាក់ទំនងសុំការបំភ្លឺពីលោក សុខ សារិន អធិការស្រុកបវេលបានទេ នៅព្រឹកថ្ងៃទី១៤ តុលា ។ ដោយឡែក លោក ឈឿង គឹមសុង ស្នងការរងទទួលផែនព្រហ្មទណ្ឌបានប្រាប់ថា លោកបានទទួលព័ត៌មាននោះហើយ ។ ពេលនេះ លោកកំពុងស្នើសុំគោលការណ៍លោកស្នងការខេត្ត ដើម្បីចុះធ្វើការស្រាវជ្រាវ និងធ្វើការស៊ើបអង្កេតលើករណីនេះ ។
មានការកត់សម្កាល់ផងដែរថា អំពើ«ចោរកម្ម»ស្ទើរគ្រប់រូបភាព ហាក់កំពុងកើតមានឡើងស្ទើរគ្រប់តាមបណ្ដាស្រុក និងក្រុង ប៉ុន្តែបទល្មើសមួយចំនួន ត្រូវបានមន្ត្រីថ្នាក់ក្រោមព្យាយាមបិទបាំង មិនរាយការណ៍ជូនថ្នាក់លើបានដឹងទេ ព្រោះខ្លាចថ្នាក់លើស្ដីបន្ទោសថា «មូលដ្ឋានខ្លួនសំបូរបទល្មើសទប់ស្កាត់ ឬបង្ក្រាបមិនបាន»។ ពេលខ្លះ ថ្នាក់លើបានជ្រាប ឬបានដឹងតាមរយៈបណ្ដាញសង្គម ដែលជនរងគ្រោះបង្ហោះជាសាធារណៈ ។ បច្ចុប្បន្ន គេសង្កេតឃើញប្រជាពលរដ្ឋមួយចំនួន ដែលរងគ្រោះក្នុងអំពើ «ចោរកម្ម»
ហាក់អស់សង្ឃឹមទៅនឹងចំណាត់ការរបស់សមត្ថកិច្ច បែរជាទៅពឹងផ្អែកស្រែកលើបណ្ដាញសង្គមឱ្យជួយរកយុត្តិធម៌ ។ ទាំងនេះ ដោយសារតែជនរងគ្រោះអស់ជំនឿលើចំណាត់ការរបស់សមត្ថកិច្ច ដែលប្ដឹងពឹងពាក់លើសមត្ថកិច្ចហើយបាត់ស្ងាត់ឈឹង មិនត្រូវបានគេអើពើហើយក៏គ្មានចម្លើយសមស្របណាបន្តិចទៅកាន់ជនរងគ្រោះវិញដែរ ។ មានតែចម្លើយភូតកុហក់ ទាំងរបាយការណ៍ជូនថ្នាក់លើ ទាំងការឆ្លើយភូតកុហក់ជនរងគ្រោះ ។
ជាក់ស្ដែង ដូចជាអំពើ«ចោរកម្ម»ខាងលើនេះជាដើម៖ បើតាមលោក ថេង ប៊ុនថេត ឪពុកកុមារារងគ្រោះបានបញ្ជាក់ថា លោកបានសួរនាំទៅមន្ត្រីមូលដ្ឋានដែលទទួលបណ្ដឹងគេហាក់គ្មានតម្រុយពីមុខសញ្ញាជនសង្ស័យទេ បើទោះជាមុខសញ្ញានោះ បានបង្ហាញរូបរាង និងមុខមាត់យ៉ាងច្បាស់ក្រឡែតនៅលើកញ្ចក់កាមេរ៉ាសុវត្ថិភាព ដែលសមត្ថកិច្ច ទទួលហើយក្ដី ។ រហូតមកទល់ពេលនេះ គាត់មិនទាន់ឃើញមន្ត្រីជំនាញបានចុះធ្វើការស្រាវជ្រាវជាថ្មី ដើម្បីតាមដានរឿងនេះទេ ។ ម៉ូតូដែលចោរបានបោកយកពីកូនប្រុសគាត់ទៅម៉ាកហុងដា ឌ្រីមសេ១២៥ ពណ៌ខ្មៅ ពាក់ស្លាកលេខបាត់ដំបង 1R-5469 ដែលមានម្ដាយក្មេងបានចែកឱ្យភរិយាគាត់យកមកប្រើប្រាស់ តែពេលនេះ ត្រូវចោរបោកយកទៅបាត់ហើយ ៕
ចែករំលែកព័តមាននេះ