រាជធានីភ្នំពេញ ៖ ឯកអគ្គរាជទូតកម្ពុជា ប្រចាំនៅកូរ៉េ និងអភិបាលក្រុងយ៉ាងជូ សន្យាធ្វើកិច្ចសហការលើការគាំពារដល់សុខមាលភាព និងផលប្រយោជន៍របស់បងប្អូនពលករ និងសហគមន៍ខ្មែរ ដែលកំពុងរស់នៅ និងបំរើការងារក្នុងតំបន់យ៉ាងជូ ។
ឯកឧត្តម ឃួន ផុនរតនៈ ឯកអគ្គរាជទូតកម្ពុជា ប្រចាំសាធារណរដ្ឋកូរ៉េ កាលពីថ្ងៃទី៨ ខែតុលា ឆ្នាំ២០២៦ បានអញ្ជើញជួបសំណេះសំណាល និងពិភាក្សាការងារជាមួយលោក Jeong Deok-young អភិបាលក្រុងយ៉ាងជូ នៅសាលាក្រុងយ៉ាងជូ ខេត្តខ្យង់គីដូ នៃសាធារណរដ្ឋកូរ៉េ ។
ក្នុងឱកាស នៃជំនួប ឯកឧត្តមឯកអគ្គរាជទូតបានលើកឡើងនូវចំណុចពិភា ក្សាចំនួន៣ រួមមាន ៖ ទី១. ការពង្រឹងចំណងសហប្រតិបត្តិការរវាងស្ថានទូត និងសាលាក្រុងយ៉ាងជូ។ ទី២. ការពង្រីកចំណងសហប្រតិបត្តិការរវាងក្រុងយ៉ាងជូ និងក្រុង-ខេត្តណាមួយរបស់ប្រទេសកម្ពុជា លើកិច្ចសហការជាអន្តរវិស័យ រួមមានកសិកម្ម ឧស្សាហកម្ម និងទេសចរណ៍ជាដើម។ និង ទី៣. កិច្ចស ហការលើការគាំពារដល់សុខមាលភាព និងផលប្រយោជន៍របស់បងប្អូនពលករ និងសហគមន៍ខ្មែរដែលកំពុងរស់នៅ និងបំរើការងារក្នុងតំបន់យ៉ាងជូ ។
ជាការឆ្លើយតប លោកអភិបាលក្រុងយ៉ាងជូ បានជម្រាបជូនឯកឧត្តមឯកអគ្គរាជទូតថា សាលាក្រុងយ៉ាងជូ នឹងសហការធ្វើការយ៉ាងជិតស្និតជាមួយស្ថានទូតក្នុងការផ្លាស់ប្តូរព៌ត័មានអំពីសុខទុក្ខរបស់បងប្អូនប្រជាជានខ្មែរ ដែលរស់នៅក្នុងតំបន់ ដើម្បីរួមគ្នាដោះស្រាយបញ្ហាប្រឈមរបស់ពួកគេឱ្យបានទាន់ ពេលវេលា ។
លោកក៏បានបន្តថា លោកសង្ឃឹមថានឹងអាចមានឱកាសស្វែងយល់បន្ថែមអំពីសក្តានុពលវិនិយោគរបស់កម្ពុជា ដើម្បីផ្សព្វផ្សាយជូនដល់វិនិយោគិន និងពាណិជ្ជករកូរ៉េ ក្នុងក្រុងយ៉ាងជូ ដើម្បីឱ្យពួកគេទទួលបាននូវឱកាសថ្មី សម្រាប់វិនិយោគ និងស្វែងរកដៃគូក្នុងប្រទេសកម្ពុជា៕
ចែករំលែកព័តមាននេះ