កុំយកជីវិតទៅភ្នាល់! នគរបាលចរាចរណ៍ខេត្តកណ្តាល ណែនាំវិធានការក្តៅ ២យ៉ាងសម្រាប់អ្នកជិះម៉ូតូ
- កណ្តាល
ខេត្តកណ្តាល ៖ ដើម្បីចូលរួមកាត់បន្ថយគ្រោះថ្នាក់ចរាចរណ៍ និងការពារអាយុជីវិតប្រជាពលរដ្ឋក្នុងការធ្វើដំណើរ ការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តកណ្តាល បានអំពាវនាវយ៉ាងទទូចដល់សាធារណជន ជាពិសេសអ្នកបើកបរទោចក្រយានយន្ត (ម៉ូតូ) ទាំងអស់ ត្រូវប្រកាន់ខ្ជាប់នូវស្មារតីប្រុងប្រយ័ត្ន និងគោរពច្បាប់ចរាចរណ៍ផ្លូវគោកឱ្យបានម៉ឺងម៉ាត់បំផុត ។
ស្តែងការិ.សុវត្ថិភាពចរាចរណ៍ខេត្តកណ្តាល បានប្រកាសនាពេលថ្មីៗនេះថា ៖ អ្នកបើកបរទោចក្រយានយន្តត្រូវពាក់មួកសុវត្ថិភាពឱ្យបានត្រឹមត្រូវ និងមិនត្រូវប្រើប្រាស់ទូរស័ព្ទពេលកំពុងបើកបរ ។
សូមបញ្ជាក់ថា ក្នុងការអំពាវនាវនោះ ការិយាល័យជំនាញបានគូសបញ្ជាក់អំពីវិធានការសំខាន់ៗចំនួន២ ដែលអ្នកបើកបរម៉ូតូគ្រប់រូបត្រូវតែអនុវត្តជាចាំបាច់ រួមមាន ៖
១. ការពាក់មួកសុវត្ថិភាព ៖ អ្នកបើកបរ និងអ្នករួមដំណើរតាមទោចក្រយានយន្តទាំងអស់ ត្រូវតែពាក់មួកសុវត្ថិភាពឱ្យបានត្រឹមត្រូវ រាល់ពេលធ្វើដំណើរលើផ្លូវសាធារណៈ ដោយមិនគិតថា ជិត ឬឆ្ងាយឡើយ ។ ការពាក់មួកសុវត្ថិភាពត្រឹមត្រូវ អាចជួយកាត់បន្ថយហានិភ័យ និងគ្រោះថ្នាក់ដល់ជីវិតបានយ៉ាងច្រើន ក្នុងករណីមានគ្រោះថ្នាក់កើតឡើងជាយថាហេតុ។
២. ការហាមឃាត់ការប្រើប្រាស់ទូរស័ព្ទ ៖ អ្នកបើកបរត្រូវបានហាមឃាត់ដាច់ខាត មិនឱ្យប្រើប្រាស់ទូរស័ព្ទដៃក្នុងពេលកំពុងបើកបរឡើយ (លើកលែងតែមានឧបករណ៍ភ្ជាប់ទូរស័ព្ទដោយមិនបាច់កាន់ ឬនិយាយដោយប្រើកាស ដែលមិនរំខានដល់ការបើកបរ)។ ការប្រើប្រាស់ទូរស័ព្ទពេលកំពុងបើកបរ ធ្វើឱ្យបាត់បង់ការយកចិត្តទុកដាក់ និងកាត់បន្ថយសមត្ថភាពក្នុងការឆ្លើយតបចំពោះស្ថានភាពគ្រោះថ្នាក់ចំពោះមុខ ដែលជាមូលហេតុចម្បងមួយបង្កឱ្យមានគ្រោះថ្នាក់ចរាចរណ៍ជាញឹកញាប់ ៕
ចែករំលែកព័តមាននេះ