រយៈពេលជាង១ខែ មន្ត្រីឧទ្យានុរក្សបន្តបង្ក្រាបបទល្មើសលើភ្នំគិរីរម្យបានចំនួន៤៤ករណី
- កំពង់ស្ពឺ
ខេត្តកំពង់ស្ពឺ ៖ ក្នុងរយៈពេលជាង១ខែ គិតចាប់ពីថ្ងៃទី១៩ ខែសីហា ដល់ថ្ងៃទី៦ ខែតុលា ឆ្នាំ២០២៦ មន្ត្រីឧទ្យានុរក្សបន្តចុះល្បាត និងបង្ក្រាបបទល្មើសបានចំនួន៤៤ករណី ក្នុងឧទ្យានជាតិព្រះសុរាម្រិត-កុសុមៈ «គីរីរម្យ» ក្នុងភូមិសាស្ត្រខេត្តកំពង់ស្ពឺ ។
ជាក់ស្តែង មន្ត្រីឧទ្យានុរក្សប្រចាំការនៅឧទ្យានជាតិគិរីរម្យ នៅថ្ងៃទី៦ ខែតុលា ឆ្នាំ២០២៦ បានបន្តចុះបង្ក្រាបការបោះបង្គោលហ៊ុមព័ទ្ធដីដែលជាទ្រព្យសម្បត្តិរដ្ឋ ក្នុងតំបន់ការពារធម្មជាតិ ក្នុងគោលបំណងយកធ្វើជាកម្មសិទិ្ធ (មិនជួបម្ចាស់) អញ្ញាតជន ស្ថិតក្នុងឃុំចំបក់ ស្រុកភ្នំស្រួច ក្នុងឧទ្យានជាតិព្រះសុរាម្រិត-កុសុមៈ«គិរីរម្យ» ។
មន្ត្រីឧទ្យានុរក្សបានបង្ក្រាបការលួចដាំបង្គោលរបងចំនួន៥៨ដើម(ថ្ម២៣ដើម) ផ្ទៃដីបោះបង្គោលហ៊ុមព័ទ្ធទំហំ០,១៥ហិកតា ។ ក្រុមការងារកំពុងបន្តនីតិវិធី ធ្វើការស្រាវជ្រាវរកអ្នកប្រព្រឹត្ត ដើម្បីចាត់ការតាមច្បាប់ ស្របតាមក្រមបរិស្ថាន និងធនធានធម្ម
ជាតិ ។
សូមបញ្ជាក់ថា មន្ត្រីឧទ្យានុរក្សប្រចាំការនៅឧទ្យានជាតិគីរីរម្យ បានសហការជាមួយរដ្ឋបាលមូលដ្ឋាន សមត្ថកិច្ចគ្រប់ប្រភេទ និងប្រជាពលរដ្ឋនៅតាមសហគមន៍តំបន់ការពារធម្មជាតិ ចាប់ពីថ្ងៃទី១៩ ខែសីហា ដល់ថ្ងៃទី៦ ខែតុលា ឆ្នាំ២០២៦ បានចុះល្បាតនិងបង្ក្រាបបទល្មើសធនធានធម្មជាតិ ក្នុងឧទ្យានជាតិព្រះសុរាម្រិត-កុសុមៈ «គិរីរម្យ» សរុប៤៤ករណីក្នុងនោះ ៖
១-បោះបង្គោលហ៊ុមព័ទ្ធ ក្នុងគោលបំណងដើម្បីយកដីធ្វើជាកម្មសិទ្ធិ ដកហូតផ្ទៃដីទំហំប្រមាណ ១៩,៣៥ហិកតា ចំនួន ៣២ករណី ។ ២-កាប់គាស់ រុករានដីព្រៃ ឆ្ការ ដុត ដើម្បីយកដីធ្វើជាកម្មសិទ្ធិ ដកហូតផ្ទៃដីទំហំប្រមាណ ២,៥១ហិកតាចំនួន៥
ករណី ។ ៣-ចាប់ដោយដាក់អន្ទាក់សត្វព្រៃ ដកហូតអន្ទាក់ចំនួន១៥ខ្សែ (ស្វាងាប់១ក្បាលជាប់អន្ទាក់)១ករណី ។ ៤-កាប់រំលំបំផ្លាញព្រៃឈើ ដកហូតឈើប្រភេទលេខ២(ស្រល់) ៦ដើម ចំនួន ២ករណី ។ ៥-ការរុករានទន្ទ្រានដី សង់រោងយកដីធ្វើជាកម្មសិទ្ធិដោយគ្មានការអនុញ្ញាត ចំនួន៣ករណី ។
ទោះបីជាបែបណា មិនមានបុគ្គលណាម្នាក់ត្រូវបានឃាត់ខ្លួនក្នុងបទល្មើសដែលបានរៀបរាប់ខាងលើនេះទេ ៕
ចែករំលែកព័តមាននេះ