លោក ពូទីន គាំទ្រជំនួបត្រីភាគីជាមួយលោក ត្រាំ និងលោក ស៊ី ប៉ុន្តែទាមទាររបៀបវារៈច្បាស់លាស់
- ភ្នំពេញ
ទីក្រុងមូស្គូ ៖ ប្រធានាធិបតីរុស្ស៊ី លោក វ្ល៉ាដឺមៀរ ពូទីន (Vladimir Putin) បានថ្លែងថា លោកគាំទ្រទាំងស្រុងចំពោះជំនួបត្រីភាគីជាមួយប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) និងប្រធានាធិបតីចិន លោក ស៊ី ជីនពីង (Xi Jinping) នៅក្នុងកិច្ចប្រជុំកំពូលកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC) ប៉ុន្តែចាំបាច់ត្រូវមានរបៀបវារៈច្បាស់លាស់មួយ។
តាមការចេញផ្សាយពីទីភ្នាក់ងារសារព័ត៌មានរដ្ឋរុស្ស៊ី TASS នៅថ្ងៃទី២ ខែតុលា បានឱ្យដឹងថា លោក ពូទីន បានកត់សម្គាល់នៅក្នុងសម័យប្រជុំពេញអង្គនៃកិច្ចប្រជុំលើកទី ២៣ ក្លិបពិភាក្ស Valdai ថា «ចំពោះលទ្ធភាពនៃជំនួបត្រីភាគី ខ្ញុំដឹងថាបញ្ហានេះ កំពុងត្រូវបានពិភាក្សាដេញដោលនៅលើបណ្តាញសារព័ត៌មាន។ ពួកយើងគាំទ្រទាំងស្រុង ចំពោះរឿងនេះ។ ប៉ុន្តែវាមានសំណួរមួយ ឬនិយាយឱ្យចំគឺបញ្ហាមួយ គឺយើងត្រូវការរបៀបវារៈ»។
លោកក៏បានសង្កត់ធ្ងន់លើតម្រូវការក្នុងការស្វែងយល់ជាមុនសិនថា តើភាគីទាំងឡាយនឹងពិភាក្សាអំពីអ្វីខ្លះនៅក្នុងជំនួបនោះ ហើយលោកក៏បានកត់សម្គាល់ដែរថា «ប៉ុន្តែជារួម ការសន្ទនាណាក៏ដោយ គឺសុទ្ធតែមានប្រយោជន៍»។
គួរបញ្ជាក់ថា នៅដើមខែកញ្ញាកន្លងទៅ វិមានក្រឹមឡាំងបានប្រកាសថា លោក ពូទីន លោក ត្រាំ និងលោក ស៊ី អាចនឹងមានកិច្ចប្រជុំត្រីភាគីជាមួយគ្នា នៅក្នុងកិច្ចប្រជុំកំពូលសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក ដែលគ្រោងនឹងធ្វើឡើងនៅប្រទេសចិន នាខែវិច្ឆិកា ឆ្នាំ២០២៦ ខាងមុខនេះ៕
ចែករំលែកព័តមាននេះ