ខេត្ត​ក្រចេះ ៖ មន្រ្តីផ្នែករដ្ឋបាល​ព្រៃឈើ​ក្រចេះ កំពុងកសាងសំណុំរឿងរថយន្តដឹកឈើ ប្រណីតដែលបង្រ្កាបបានចំនួន៣គ្រឿងបញ្ជូន​ទៅកាន់សាលាដំបូងខេត្ត ក្រោយពីចាប់ឃាត់​បាន​ក្នុងអំឡុងពេល៣ថ្ងៃ ក្នុងនោះ​មាន​រថ​យន្ត​ដឹកឈើ​គ្រញូងមួយគ្រឿងជារថយន្តអ្នកកាសែត។

លោកប៊ួយ រតនា នាយរងផ្នែករដ្ឋបាលព្រៃ​ឈើក្រចេះ បានអោយដឹងថា ក្រោមការបញ្ជា​របស់លោកនាយផ្នែក រូប​លោកដឹកនាំកម្លាំងចុះ​បង្រ្កាបរថយន្តដឹកឈើខុសច្បាប់បានចំនួនបី គ្រឿងនៅកន្លែងផ្សេងគ្នាក្នុងដែនសមត្ថកិច្ច​របស់​ផ្នែករដ្ឋបាលព្រៃឈើក្រចេះក្នុង​រយៈពេល៣ថ្ងៃ​ជាប់ៗ​គ្នាក្នុង​​ចន្លោះ​ពីថ្ងៃទី៨ដល់ថ្ងៃទី​១១ សីហា។ រថយន្តដែលបង្រ្កាបបានទាំងបី​គ្រឿងនេះសុទ្ធសឹងជារថយន្តដឹកឈើប្រណីត រួមមាន​ប្រភេទ​ធ្នង់ និងគ្រញូង ដោយពួកគេ​បានប្រើគ្រប់​រូប​ភាព​ក្នុងការដឹកជញ្ជូន តែទោះ​បី​ជា​យ៉ាងណាក៏សមត្ថកិច្ចនៅតែតាមស្រាវជ្រាវ និងបង្ក្រាបបាន​។

មន្រ្តីដដែលបានអោយដឹងថា រថយន្តទាំងបី​គ្រឿងនេះមាន ១-រថយន្តកាមរីគូទស្វិត ពណ៌​ខៀវ ពាក់ស្លាកលេខ ភ្នំពេញ 2E  1591 មាន​ដឹក​ឈើ​គ្រញូងចំនួន២៦កំណាត់ ។ រថយន្តមួយ គ្រឿងនេះបើកបរដោយជនម្នាក់ឈ្មោះផា ស៊ីថាន អះអាងថា ខ្លួនជាអ្នកកាសែតរបស់​អង្គភាពសមាគមសារព៌ត័មានឃ្លាំមើលកម្ពុជា និងបានរត់គេចខ្លួនបាត់នៅពេលសមត្ថកិច្ច បង្រ្កាប ។ ២-រថយន្តម៉ាកកាមរីគូទ​ស្វិត ពណ៌​ទឹកប៊ិច មានដឹកឈើធ្នង់ចំនួន២៦កំណាត់​ស្មើនឹង​ជាង៣មែត្រគូបពេញ​លើដំបូល​​ដោយ​គ្របកៅ​ស៊ូ​តង់បន្លំជារថយន្តដឹកអេតចាយ ។ ៣-រថយន្ត​ម៉ាក​តូយ៉ូតាមួយបាំងកន្លះ ពណ៌ប្រផេះពុំ​មាន​ពាក់​ស្លាកលេខ។ រថយន្តមួយគ្រឿងនេះបានប្រើ​រូបភាពបន្លំភ្នែកសមត្ថកិច្ចស្ទើរនឹកស្មានមិនដល់ គឺផ្សារដែកបិទបន្ថែម​ពីលើទ្រុងខាងក្រោយ​​ហើយ​ដាក់ឈើ​ពី​ខាងក្នុងដែលមើលទៅហាក់​ដូចជា​មិនមានដឹកអ្វីតែក៏ត្រូវសមត្ថកិច្ចតាមទាន់ បង្រ្កាប​បាន ហើយរថយន្តមួយគ្រឿងនេះមាន​ផ្ទុកសុទ្ធតែឈើគ្រញូងមានចំនួន១៧កំណាត់ធំៗ។

លោកនាយរងផ្នែកបានអោយដឹងទៀតថា ​ក្នុង​ការ​ចុះបង្រ្កាបនេះសមត្ថកិច្ចចាប់ឃាត់អ្នក​បើក​បរមិនទាន់ដោយសារតែពួកគេដឹងខ្លួនមុន ក៏ទុក​រថយន្តចោលហើយរត់គេចខ្លួនបាត់។ លោក​ព្រាប សុធារ៉ា នាយផ្នែករដ្ឋបាលព្រៃ​ឈើ​ក្រចេះ បានអោយដឹងកាលពីថ្ងៃ១២ សីហា ថា​ចំពោះរថយន្តទាំងនេះគឺយកទៅរក្សាទុកនៅ ស្ថានីយបណ្តុះកូនឈើ.សខ្សារ ហើយជំនាញរដ្ឋ បាលព្រៃឈើកំពុងកសាងសំណុំរឿងចាត់បញ្ជូន​ទៅកាន់សាលាដំបូងខេត្តដើម្បីមាន​វិធាន​ការ​បន្តតាមនីតិវិធីទាំងរថយន្ត​​ និងឈើ​ រួម​ទាំង​ឈ្មោះម្ចាស់រថយន្តទាំងអស់នេះផងដែរ៕