ខេត្តព្រះវិហារ ៖ ទឹកទន្លេមេគង្គលើនៅឃុំកំពង់ស្រឡៅ១ និងឃុំកំពង់ស្រឡៅ២ ស្រុកឆែប ជាប់ព្រំប្រទល់ឡាវបានទទួលរងដោយទឹកជំនន់លិចលង់វាលស្រែ និងភូមិឋានប្រជាពលរដ្ឋទាំង២ឃុំខាងលើនេះចំនួន១៥៩គ្រួសារ ស្មើនឹងមនុស្ស១.១១៧នាក់ កំពុងជួបការលំបាកដីស្រែ១៥៨ហិកតា ដីចម្ការ១២ហិកតា ត្រូវលិច
ខេត្តព្រះវិហារ ៖ ទឹកទន្លេមេគង្គលើនៅឃុំកំពង់ស្រឡៅ១ និងឃុំកំពង់ស្រឡៅ២ ស្រុកឆែប ជាប់ព្រំប្រទល់ឡាវបានទទួលរងដោយទឹកជំនន់លិចលង់វាលស្រែ និងភូមិឋានប្រជាពលរដ្ឋទាំង២ឃុំខាងលើនេះចំនួន១៥៩គ្រួសារ ស្មើនឹងមនុស្ស១.១១៧នាក់ កំពុងជួបការលំបាកដីស្រែ១៥៨ហិកតា ដីចម្ការ១២ហិកតា ត្រូវលិចលង់ ផ្លូវជាតិតាមបណ្តោយ មាត់ទន្លេមេគង្គលើ លិចជាច្រើនកំណាត់ៗ សរុប១.២០០ម៉ែត្រ។
លោកអ៊ុំ ម៉ារ៉ា អភិបាលខេត្តព្រះវិហារ បានមានវិធានការជាបន្ទាន់ចាត់បញ្ជូនលោក ស ថាវី អភិបាលរងខេត្ត ដឹកនាំក្រុមការងារបស់ខេត្ត និងស្រុកឆែប ចុះទៅដល់ឃុំកំពង់ស្រឡៅ១ និងឃុំកំពង់ស្រឡៅ២ តាមបណ្តោយមាត់ទន្លេមេគង្គលើជាប់ព្រំប្រទល់ប្រទេសឡាវ ដើម្បីត្រួតពិនិត្យ និងស្រង់ទិន្នន័យប្រជាពលរដ្ឋដែលរងនូវការលិចលង់ ។ លោកអភិបាលខេត្តអ៊ុំ ម៉ារ៉ា បានឱ្យដឹងថា ពេលនេះស្ថានភាពទឹកជំនន់ពីទន្លេមេគង្គលើកំពុងតែគំរាមកំហែងខ្លាំង ហើយសាលាខេត្តបានត្រៀមជំនួយដល់ប្រជាពលរដ្ឋទាំង២ឃុំខាងលើនេះ បន្ទាប់ពីមានការត្រួតពិនិត្យជាបន្តបន្ទាប់។
សូមបញ្ជាក់ផងដែរថា ទឹកជំនន់ដែលបណ្តាលឱ្យលិចលង់នៅតំបន់ព្រំប្រទល់ប្រទេសឡាវនាពេលនេះមិនអាចនិយាយថា ឆាប់ស្រកនោះទេ ព្រោះតែមានភ្លៀងនៅតែបង្អុរចុះជាប្រចាំ ។ ដោយឡែកនៅម្ខាងទន្លេទឹកដីឡាវឯណោះវិញ ក៏មានការលិចលង់ដូចប្រទេសកម្ពុជាដែរ ។ ពេលនេះអាជ្ញាធរខេត្តព្រះវិហារកំពុងពិភាក្សាគ្នាជុំវិញការដឹកជញ្ជូនស្បៀងទៅចែកជូនពលរដ្ឋដែលរងគ្រោះ ប៉ុន្តែអ្វីដែលធ្វើឱ្យមានការពិបាកជាខ្លាំងនោះ គឺផ្លូវគមនាគមន៍ទៅកាន់តំបន់នោះខូចយ៉ាងខ្លាំង ៕
ចែករំលែកព័តមាននេះ