ខេត្តស្វាយរៀង ៖ មានរឿងភ្ញាក់ផ្អើលមួយបានកើតឡើងនៅភូមិបាក់រនាស់ សង្កាត់សង្ឃ័រ ក្រុងស្វាយរៀង និងធ្វើឱ្យមនុស្សម្នាផ្អើលពេញភូមិថា ខ្មោចលងដោយសារអ្នកភូមិគ្រប់គ្នាបានដឹងថា បុរសម្នាក់ឈ្មោះសៅ ដូច ត្រូវស្លា.ប់ដោយលង់ទឹករហូតហើមស្អុយ ទើបដឹង។ សពនេះត្រូវសមត្ថកិច្ចយកទៅកប់នៅវត្តព្រះទន្លេ សង្កាត់
ខេត្តស្វាយរៀង ៖ មានរឿងភ្ញាក់ផ្អើលមួយបានកើតឡើងនៅភូមិបាក់រនាស់ សង្កាត់សង្ឃ័រ ក្រុងស្វាយរៀង និងធ្វើឱ្យមនុស្សម្នាផ្អើលពេញភូមិថា ខ្មោចលងដោយសារអ្នកភូមិគ្រប់គ្នាបានដឹងថា បុរសម្នាក់ឈ្មោះសៅ ដូច ត្រូវស្លាប់ដោយលង់ទឹករហូតហើមស្អុយ ទើបដឹង។
សពនេះត្រូវសមត្ថកិច្ចយកទៅកប់នៅវត្តព្រះទន្លេ សង្កាត់សង្ឃ័រ កាលពីថ្ងៃទី៩ សីហា វេលាម៉ោង១១ព្រឹករួចហើយ ព្រោះមិនអាចទុកបាន។ ឯអាជ្ញាធរភូមិ និងចាស់ទុំក្នុងភូមិបានដើររៃអង្គាសថវិកា ដើម្បីធ្វើបុណ្យឱ្យ ពីព្រោះឈ្មោះសៅ ដូច នេះ មានជីវិតឯកោក្រីក្រមុខរបរធាក់ស៊ីក្លូ រកព្រឹកខ្វះល្ងាច ហើយម្តាយក៏បានទៅនៅក្រុងភ្នំពេញ រកស៊ីពីរបីឆ្នាំមកហើយពុំដែលមកផ្ទះទេ។ លុះនៅថ្ងៃទី១០ សីហា វេលាម៉ោង៧យប់ បែរជាឃើញឈ្មោះសៅ ដូច ដើរនៅមុខផ្ទះក៏នាំគ្នារត់ប្រសាចផ្អើលថា ខ្មោចលង តាមពិតឈ្មោះសៅ ដូច នៅរស់សោះ។ តាមរយៈនៃការបង្ហាញខ្លួនរបស់ឈ្មោះសៅ ដូច នេះបានបញ្ជាក់ថា សាកសពអណ្តែតទឹកដែលប៉ូលិសថា លង់ទឹក ឯពេទ្យពិនិត្យថា សង្ស័យឃាតកម្ម គឺមិនត្រូវបានស្គាល់អត្តសញ្ញាណទេ ។
ថ្ងៃទី១២ សីហា វេលាម៉ោង៧ព្រឹក អ្នកស្រី ណាម វណ្ណី អាយុ៥៥ឆ្នាំ ត្រូវជាម្តាយបង្កើតរបស់ឈ្មោះសៅ ដូច នៅភូមិបាក់រនាស់ សង្កាត់សង្ឃ័រ ក្រុងស្វាយរៀង បានប្រាប់កោះសន្តិភាពថា ពេលគាត់បានទទួលទូរស័ព្ទពីអ្នកស្រុកថា កូនប្រុសរបស់គាត់ឈ្មោះ «ដូច» លង់ទឹកស្លាប់ ហើយសង្ស័យថា មានគេលួចវាយសម្លាប់រហូតហើមស្អុយធ្វើឱ្យរូបគាត់ស្ទើរគាំងបេះដូងស្លាប់ ព្រោះទៅរកស៊ីនៅភ្នំពេញ និងឱ្យកូននៅផ្ទះម្នាក់ឯង ក៏ប្រញាប់ប្រញាល់មកផ្ទះរួចទៅមើលកន្លែងសមត្ថកិច្ចបញ្ចុះសពកូននៅវត្តព្រះទន្លេ។
នៅពេលកំពុងអុជធូបយំសោកនៅមុខផ្នូរ ស្រាប់តែមានបុរសម្នាក់មកសួរថា អាដូចស្លាប់ប៉ុន្មានថ្ងៃហើយ? គាត់ក៏និយាយថា ឮបូ៉លិសប្រាប់ថា ស្លាប់បីបួនថ្ងៃហើយ ។ បុរសនោះនិយាយថា ទេ! ខ្ញុំឃើញអាដូចនៅស៊ីឈ្មួលស្ទូងឱ្យគេនៅភូមិលក្ខណ៍ជា (ទួលលាក់ព្រះរាជា) ឃុំកំពង់ចក ស្រុករំដួល។ គាត់និយាយថា នៅថ្ងៃទី១០ សីហា បានហៅម៉ូតូឌុបជិះទៅភូមិល័ក្ខជា ហើយដើរសួរអ្នកស្រុកផង និងដើររកមើលអ្នកសីុឈ្មួលស្ទូងតាមស្រែ ពីស្រែមួយទៅស្រែមួយ ក៏ឃើញកូនប្រុសគាត់នៅរស់កំពុងស្ទូងមែន។ ពេលនោះរូបគាត់ស្រាលខ្លួនយំអោបកូន រួចហៅកូនមកផ្ទះវិញ ព្រមទាំងនាំកូនទៅជួបសមត្ថកិច្ចបញ្ជាក់ថា កូនប្រុសគាត់នៅរស់មិនស្លាប់ទេ។
លុះដល់ម៉ោង១១ព្រឹក ថ្ងៃទី១១ សីហា ក៏មានបុរសម្នាក់នៅភូមិបាត់ថង់ ឃុំគគីរសោម ស្រុកស្វាយទាប បានមកប្តឹងប៉ូលិសប៉ុស្តិ៍រដ្ឋបាលឃុំសង្ឃ័រ ថា គាត់បាត់កូនប្រុសម្នាក់អាយុ២៥ឆ្នាំ ជិះម៉ូតូហុងដា C125 មកក្រុងស្វាយរៀង ដើម្បីទិញទូរស័ព្ទដៃ ស្រាប់តែបាត់ដំណឹងឈឹង មិនឃើញត្រឡប់ទៅផ្ទះវិញ។ សមត្ថកិច្ចប៉ុស្តិ៍រដ្ឋបាលសង្កាត់សង្ឃ័រ ក៏នាំបុរសនោះទៅគាស់សពមើល តែពេលគាស់មកបុរសនោះនិយាយថា មិនមែន កូនប្រុសរបស់គាត់ទេ ព្រោះកូនប្រុសគាត់មានម្រាមជើងចំនួន៦ ហើយសមត្ថកិច្ចក៏បញ្ចុះសពនោះទៅវិញ។ ដូច្នេះសពដែលសមត្ថកិច្ចអះអាងថា លង់ទឹកស្លាប់នេះពុំទាន់រកអត្តសញ្ញាណឃើញនៅឡើយទេ។ រីឯសៅ ដូច អាយុ៣១ឆ្នាំ នៅភូមិបាក់រនាស់ នៅរស់នៅឡើយ។
ចំពោះសាកសព គឺមានមាត់ធំ កម្ពស់១,៦៨ម៉ែត្រ សម្បុរសណ្តែកបាយ ស្លៀកខោកាគីជើងវែង សក់ទើបនឹងកាត់ថ្មីៗ ទំនងជាអ្នកធ្វើការ តែសមត្ថកិច្ចអះអាងថា លង់ទឹកស្លាប់។ រីឯគ្រូពេទ្យវិញនិយាយថា សពជនរងគ្រោះបាក់ដៃឆ្វេង ជាំត្របកភ្នែកខាងឆ្វេង និងបាក់.ក ដូច្នេះសង្ស័យថា ករណីនេះជាអំពើឃាតកម្ម។ ដូច្នេះសមត្ថកិច្ចអំពាវនាវរកសាច់ញាតិដែលបាត់សមាជិកគ្រួសារ សូមមកទាក់ទងប៉ូលិសសង្កាត់សង្ឃ័រ ក្រុងស្វាយរៀង អាចមានព័ត៌មានច្បាស់ថែមទៀត។ រីឯយុវជនម្នាក់នៅភូមិបាត់ថង់ ឃុំគគីរសោម ស្រុកស្វាយទាប មកដល់ថ្ងៃទី១១ សីហា ឆ្នាំ២០១១ ក៏ពុំទាន់ឃើញត្រឡប់ទៅផ្ទះវិញដែរ គឺបាត់ដំណឹង៕
ចែករំលែកព័តមាននេះ