រាជធានីភ្នំពេញ ៖ សម្តេចតេជោនាយករដ្ឋមន្ត្រីបានថ្លែងអំណរគុណយ៉ាងជ្រាលជ្រៅ ចំពោះប្រជាពលរដ្ឋទាំងអស់ដែលបានចូលរួមបរិច្ចាគឈាមតាមការអំពាវ នាវរបស់លោកក៏ដូចជាក្រសួងសុខាភិបាល កាលពីព្រឹកថ្ងៃទី១១ សីហា ក្នុងឱកាសដែលសម្តេចអញ្ជើញចូូលរួមជាអធិបតីក្នុងពិធីចែកសញ្ញា បត្រដល់និស្សិត
រាជធានីភ្នំពេញ ៖ សម្តេចតេជោនាយករដ្ឋមន្ត្រីបានថ្លែងអំណរគុណយ៉ាងជ្រាលជ្រៅចំពោះប្រជាពលរដ្ឋទាំងអស់ដែលបានចូលរួមបរិច្ចាគឈាមតាមការអំពាវនាវរបស់លោកក៏ដូចជាក្រសួងសុខាភិបាល កាលពីព្រឹកថ្ងៃទី១១ សីហា ក្នុងឱកាសដែលសម្តេចអញ្ជើញចូលរួមជាអធិបតីក្នុងពិធីចែកសញ្ញាបត្រដល់និស្សិតសាកលវិទ្យាល័យធនធានមនុស្សនៅវិទ្យាស្ថានជាតិអប់រំ ។
សម្តេចតេជោបានរំលឹកថា សម្តេចបានអំពាវនាវលើកទី១ នៅឯសាលាថែទាំវេជ្ជសាស្ត្រ និងលើកទី២ នៅវិទ្យាស្ថានជាតិអប់រំនេះ ។ តាមរយៈការអំពាវនាវនោះសង្កេតឃើញមានការចូលរួមពីក្រសួងពាណិជ្ជកម្ម បន្តទៅវិស័យឯកជន ទូរទស្សន៍ និងវិទ្យុបាយ័ន ហើយបន្តបន្ទាប់មកទៀតជាហូរហែមានខុទ្ទកាល័យរបស់នាយករដ្ឋមន្ត្រីឧត្តមក្រុមប្រឹក្សាសេដ្ឋកិច្ច អង្គរក្ស កងពលលេខ៧០ រហូតដល់ផ្នែកនានា ផ្សេងទៀត និងនិស្សិតតាមសាកលវិទ្យាល័យផងដែរ។ ការបរិច្ចាគឈាមរបស់បណ្តាស្ថាប័នទាំងអស់នោះបានធ្វើឱ្យកម្រិតឈាមដែលមានការស្តុកបម្រុងនេះមានការកើនឡើង ។ នេះគឺជាការបរិច្ចាគមួយដ៏ធំដើម្បីជីវិតមនុស្សក្នុងនាមអ្នកត្រូវការឈាមដែលបានទទួលឈាមសង្គ្រោះ។ សម្តេចតេជោបានថ្លែងអំណរគុណចំពោះការយកចិត្តទុកដាក់បរិច្ចាគឈាមនេះ ហើយសូមឱ្យកិច្ចការនោះមានដំណើរការបន្តទៅមុខទៀតតាមរយៈការរៀបចំរបស់ក្រសួងសុខាភិបាល។
ទាក់ទិននឹងបញ្ហានេះ សម្តេចតេជោនាយករដ្ឋមន្ត្រីបានស្នើឱ្យលោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល ធ្វើការរៀបចំកាលបរិច្ឆេទឱ្យបានច្បាស់លាស់ ព្រោះឈាមដែលបានបរិច្ចាគទៅទុកបានត្រឹមតែ១ខែកន្លះប៉ុណ្ណោះ ដូច្នេះបើសិនជាមានការផ្តល់ឈាមច្រើនហួសប្រើមិនអស់ គឺជាការខាតបង់មួយ។ពាក់ព័ន្ធនឹងបញ្ហានេះ មិនដឹងថា ក្រសួងសុខាភិបាលអាចមានមធ្យោបាយរក្សាឈាមនេះឱ្យបានលើសពីកាលកំណត់នោះដែរឬទេ? បើសិនជាមាន យើងគួរតែទិញវាយកមករក្សាទុកឱ្យបានយូរ ។ បើសិនជាគ្មានហើយក្នុងកាលៈទេសៈនេះ គឺត្រូវមានកាលបរិច្ឆេទឱ្យបានច្បាស់លាស់ ។ ស្ថាប័នណាត្រូវយកទៅពេលណា ស្ថាប័នណាត្រូវយកទៅពេលណា ព្រោះឈាមកាលពីកន្លងទៅមានស្តុកត្រឹមតែ៥០០ប្លោក ប៉ុន្តែឥឡូវមានដល់១.០០០ប្លោកឯណោះ ។ ដូច្នេះគួរតែមានកាលបរិច្ឆេទជាក់លាក់មួយ ការបង្វិលបរិច្ចាគក្នុងមួយឆ្នាំម្តង ឬម្នាក់ក្នុងមួយឆ្នាំ២ដង បើមានកាលបរិច្ឆេទជាក់លាក់ គឺមានឈាមប្រើប្រាស់តាមតម្រូវការហើយ។ បើមានសេចក្តីត្រូវការធំ យើងអាចនឹងមានអង្គភាពដែលមានមុខសញ្ញាហើយស្រេច។
សម្តេចតេជោនាយករដ្ឋមន្ត្រីបញ្ជាក់ថា ការផ្តល់ឈាមនេះមានតម្លៃលើសពីការដែលផ្តល់ជាមាស ជាប្រាក់ទៅទៀត ព្រោះជាឈាមរបស់យើងផ្ទាល់។ ជាការពិតហើយការផ្តល់មាស ផ្តល់ប្រាក់ សម្ភារសម្រាប់ដល់ជនក្រីក្រ ឬដល់សមរភូមិ ឧបត្ថម្ភកងទ័ពរបស់យើងដើម្បីបំពេញសេចក្តីត្រូវការ ក៏ប៉ុន្តែបើនិយាយអំពីតម្លៃនៃការផ្តល់ឈាមនេះ គឺមានតម្លៃខ្លាំងណាស់ សម្រាប់ជីវិតមនុស្ស។ ឥឡូវចេញជាចលនាជាតិមួយហើយ អ្វីដែលសំខាន់គឺការរៀបចំកាលបរិច្ឆេទជាក់លាក់ ដើម្បីយកឈាមជួយដល់អ្នកជំងឺដោយមិនឱ្យមានការខាតបង់។ ស្មារតីមនុស្សធម៌របស់បងប្អូន បានក្លាយទៅជាចលនាជាតិមួយនៃការផ្តល់ឈាមដ៏សប្បុរសជួយសង្គ្រោះជីវិតមនុស្ស ៕
ចែករំលែកព័តមាននេះ