ខេត្តកំពង់ចាម ៖ សំឡេងផ្ទុះគ្រាប់ប្រភេទ៦០មីល្លីម៉ែត្របានលាន់យ៉ាងទ្រហឹងនៅក្នុង ឡូត៍កៅស៊ូមួយកន្លែង ភូមិ៤៤ ឃុំព្រះធាតុ ស្រុកអូររាំងឪ កាលពីវេលាម៉ោង៦និង៥នាទីល្ងាចថ្ងៃទី១០ សីហា ២០១១ បណ្តាលឱ្យក្មេងៗមួយក្រុមមានគ្នា៥នាក់ដែលចេញទៅដេញចាប់កណ្តូបរងរបួស ដេករដូករណែល ហើយត្រូវ
ខេត្តកំពង់ចាម ៖ សំឡេងផ្ទុះគ្រាប់ប្រភេទ៦០មីល្លីម៉ែត្របានលាន់យ៉ាងទ្រហឹងនៅក្នុងឡូត៍កៅស៊ូមួយកន្លែង ភូមិ៤៤ ឃុំព្រះធាតុ ស្រុកអូររាំងឪ កាលពីវេលាម៉ោង៦និង៥នាទីល្ងាចថ្ងៃទី១០ សីហា ២០១១ បណ្តាលឱ្យក្មេងៗមួយក្រុមមានគ្នា៥នាក់ដែលចេញទៅដេញចាប់កណ្តូបរងរបួសដេករដូករណែល ហើយត្រូវបានបានក្រុមសាច់ញាតិនាំយកទៅសង្គ្រោះនៅមណ្ឌលសុខភាពចំការកៅស៊ូពាមជាំង និងបាននាំបន្តទៅសង្គ្រោះនៅមន្ទីរពេទ្យខេត្ត ក្នុងនោះ២នាក់ត្រូវបានដឹកទៅសង្គ្រោះនៅរាជធានីភ្នំពេញដោយសារតែមានសភាពធ្ងន់ធ្ងរ ។
ទាក់ទិនទៅនឹងករណីនេះត្រូវបានលោក អនុសេនីយ៍ឯក ញ៉ែម សុខុម អធិការនគរបាលស្រុកអូររាំងឪប្រាប់ឱ្យដឹងថា ក្មេងដែលត្រូវរបួសធ្ងន់ដោយសារអំបែងគ្រាប់មាន ១-ឈ្មោះ យាន ភឿន អាយុ១៥ឆ្នាំ ២-ឈ្មោះវី កន្និដ្ឋា អាយុ១៥ឆ្នាំ ត្រូវបញ្ជូនទៅមន្ទីរពេទ្យ រាជធានីភ្នំពេញ និងអ្នករបួសស្រាលចំនួន៣នាក់ទៀត ១-ឈ្មោះអឿន រ៉ុន អាយុ១៤ឆ្នាំ ២-ឈ្មោះប៉ូយ ពៅ អាយុ១៣ឆ្នាំ ៣-ឈ្មោះហេង ឆៃឡេង អាយុ១៥ឆ្នាំ ទាំងអស់គ្នារស់នៅភូមិ៤៤ ឃុំព្រះធាតុ ស្រុកអូររាំងឪ ។
លោកអធិការនគរបាលស្រុកអូររាំងឪ ប្រាប់បន្តថា មុនពេលកើតហេតុ គឺក្មេងៗទាំងនេះបាននាំគ្នាចេញពីផ្ទះទៅដេញចាប់កណ្តូប នៅក្នុងព្រៃចំការកៅស៊ូ ។ បន្ទាប់មកក៏បានប្រទះឃើញគ្រាប់ប្រភេទ៦០មីល្លីម៉ែត្រ នៅគល់ដើមកៅស៊ូ ទំនងជាមិនស្គាល់គ្រាប់ផងនោះរើសយកមកគប់លេងនៅក្បែរខ្លួនជាហេតុបណ្តាលឱ្យផ្ទុះលាន់កក្រើកតែម្តង៕
ចែករំលែកព័តមាននេះ