រាជធានីភ្នំពេញ ៖ កាលពីថ្ងៃទី១១ សីហា សម្តេចអគ្គមហាពញាចក្រីហេង សំរិន ប្រធានរដ្ឋសភា បានអនុញ្ញាតឱ្យតំណាងក្រុមហ៊ុនលី យេ រ៉ាប់ប៊ើរខូអិលធីឌីរបស់សាធារណរដ្ឋមានិតចិនចំនួន៩នាក់ ដឹកនាំដោយលោកកៅ ហុងស៊ិន នាយកក្រុមហ៊ុនចូលជួបសវនាការនៅវិមានរដ្ឋសភា។ សម្តេចហេង សំរិន មានប្រសាសន៍ថា
រាជធានីភ្នំពេញ ៖ កាលពីថ្ងៃទី១១ សីហា សម្តេចអគ្គមហាពញាចក្រីហេង សំរិន ប្រធានរដ្ឋសភា បានអនុញ្ញាតឱ្យតំណាងក្រុមហ៊ុនលី យេ រ៉ាប់ប៊ើរខូអិលធីឌីរបស់សាធារណរដ្ឋមានិតចិនចំនួន៩នាក់ ដឹកនាំដោយលោកកៅ ហុងស៊ិន នាយកក្រុមហ៊ុនចូលជួបសវនាការនៅវិមានរដ្ឋសភា។
សម្តេចហេង សំរិន មានប្រសាសន៍ថា ការបណ្តាក់ទុនវិនិយោគនាឱកាសនេះ វាសមស្របទៅនឹងកាលៈទេសៈ ដែលប្រទេសកម្ពុជាមានសន្តិភាព ស្ថិរភាពនយោបាយ និងសណ្តាប់ធ្នាប់សង្គមពេញលេញ ដែលជាមូលដ្ឋានគ្រឹះមិនអាចខ្វះបានសម្រាប់ការអភិវឌ្ឍប្រទេសជាតិ ប្រកបដោយចីរភាព។ ពិតណាស់ ការរួមចំណែករបស់វិស័យឯកជនក្នុងការអភិវឌ្ឍប្រទេសជាតិគឺជាកត្តាចាំបាច់បំផុតនិងមិនអាចខ្វះបាន។ សម្តេចពញាចក្រីបន្តថា ការទាក់ទាញវិស័យឯកជនទាំងក្នុង និងក្រៅប្រទេសគឺជាកត្តាសំខាន់បំផុតដើម្បីបង្កើនល្បឿនក្នុងការអភិវឌ្ឍសេដ្ឋកិច្ច។ ការជំរុញលើកទឹកចិត្តវិស័យឯកជនជាកម្លាំងដ៏ចម្បងនៃកំណើនសេដ្ឋកិច្ច និងជាគោលនយោបាយរបស់រាជរដ្ឋាភិបាលកម្ពុជាចាប់តាំងពីការផ្តើមដំណើរការ ហើយត្រូវបានលើកឡើងជាបន្តទៀតនៅក្នុងយុទ្ធសាស្ត្រចតុកោណជំហានទី២ សម្រាប់នីតិកាលទី៤នៃរដ្ឋសភា។
លោកកៅ ហុងស៊ិន នាយកក្រុមហ៊ុនលីយេ រ៉ាប់ប៊ើរ ខូអិលធីឌីបានមានប្រសាសន៍ជម្រាបសម្តេចហេង សំរិនប្រធានរដ្ឋសភាថាក្រុមហ៊ុនលីយេ រ៉ាប់ប៊ើរ ខូអិលធីឌីរបស់លោក នឹងវិនិយោគលើដំណាំកសិកម្មរួមមាន កៅស៊ូ និងដំឡូងមី។ លោកបញ្ជាក់ថា ដំបូងលោកសូមឱ្យសម្តេចប្រធានរដ្ឋសភាគាំទ្រក្រុមហ៊ុនលីយេ រ៉ាប់ប៊ើរ ខូអិលធីឌី ក្នុងការវិនិយោគរបស់ខ្លួននៅកម្ពុជា។ លោកកៅ ហុងស៊ិនបន្តថា ក្រុមហ៊ុនលីយេ រ៉ាប់ប៊ើរ ខូអិលធីឌី នឹងចុះទៅខេត្តព្រះសីហនុដើម្បីពិនិត្យមើលនៅតំបន់នោះនិងបន្តទៅកាន់ខេត្តកំពង់ចាមទៀតក្នុងការសិក្សាស្រាវជ្រាវពីការនាំចេញ និងការប្រមូលទិញកសិផលដំឡូងមីកម្ពុជាក្នុងការនាំចេញទៅកាន់ទីផ្សារប្រទេសចិននៅឆ្នាំនេះ។
សម្តេចពញាចក្រីបានមានប្រសាសន៍ថា សម្តេចសូមស្វាគមន៍ក្រុមហ៊ុនលីយេ រ៉ាប់ប៊ើរ ខូអិលធីឌី ក្នុងការធ្វើសកម្មភាពវិនិយោគនៅកម្ពុជា ហើយសម្តេចសន្យាថា នឹងជួយសម្រួលដល់ដំណើរការវិនិយោគរបស់ក្រុមហ៊ុននេះនៅពេលមានបញ្ហា៕
ចែករំលែកព័តមាននេះ