រាជធានីភ្នំពេញ ៖ លោកឡេង ប៉េងឡុង អគ្គលេខាធិការនៃអគ្គលេខាដ្ឋានរដ្ឋសភា កាលពីថ្ងៃទី១០ សីហា ២០១១ បានធ្វើសេចក្តីជូនដំណឹងជាសាធារណៈថា អគ្គលេខាធិការដ្ឋានរដ្ឋសភា មានទុក្ខដ៏ក្រៀមក្រំដោយលោកជំទាវ ងួន ញ៉ិល នាមដើមញ៉ែម សុផានី បានទទួលអនិច្ចកម្មកាលពីថ្ងៃពុធ ទី១០ សីហា ២០១១ វេលាម៉ោង១០និង១៣នាទីព្រឹកក្នុងជន្មាយុ៦៦ឆ្នាំ ដោយរោគាពាធ។
យោងតាមសេចក្តីជូនដំណឹងរបស់រដ្ឋសភាដែលកោះសន្តិភាពទទួលបានឱ្យដឹងថា សពលោកជំទាវញ៉ែម សុផានី តម្កល់ទុកធ្វើបុណ្យទក្ខិណានុប្បទាននៅភូមិគ្រឹះលោកងួន ញ៉ិល អនុប្រធានទី១នៃរដ្ឋសភា ស្ថិតក្នុងភូមិអូរអណ្តូង សង្កាត់ព្រែកប្រា ខណ្ឌមានជ័យ រាជធានីភ្នំពេញ ពីថ្ងៃព្រហស្បតិ៍ ទី១១ សីហា រហូតដល់ថ្ងៃ អង្គារ ទី១៦ ២០១១។
ពិធីបុណ្យគម្រប់៧ថ្ងៃ នឹងប្រព្រឹត្តទៅនៅរសៀលថ្ងៃទី១៥ សីហា ២០១១ នៅគេហដ្ឋានសពដូចជម្រាបជូនខាងលើ ។ ពិធីឆ្លងបុណ្យខួបគម្រប់៧ថ្ងៃនឹងប្រារព្ធធ្វើនៅព្រឹកថ្ងៃអង្គារ ទី១៦ សីហា ២០១១ ដោយមាននិមន្តព្រះសង្ឃចំនួន៦៨អង្គ រាប់បាត្រឆ្លងជាកិច្ចបង្ហើយបុណ្យ ៕
ចែករំលែកព័តមាននេះ