ប្រជាជនក្នុងខេត្តណាហ្គាសាគីនៃប្រទេសជប៉ុន បានអំពាវនាវដល់រដ្ឋាភិបាលរបស់ខ្លួនធ្វើការប្តូរទៅប្រើប្រាស់ ថាមពលធម្មជាតិជំនួសឱ្យថាមពលនុយក្លេអ៊ែរ នៅក្នុងឱកាសគម្រប់ខួប៦៦ឆ្នាំ ដែលទីក្រុងណាហ្គាសាគី ទទួលរងការទម្លាក់គ្រាប់បែកបរមាណូដ៏មហាប្រល័យរបស់សហរដ្ឋ អាមេរិក ក្នុងអំឡុងពេលបញ្ចប់សង្គ្រាមលោកលើកទី២ ។
ប្រជាជនក្នុងខេត្តណាហ្គាសាគីនៃប្រទេសជប៉ុន បានអំពាវនាវដល់រដ្ឋាភិបាលរបស់ខ្លួនធ្វើការប្តូរទៅប្រើប្រាស់ថាមពលធម្មជាតិជំនួសឱ្យថាមពលនុយក្លេអ៊ែរ នៅក្នុងឱកាសគម្រប់ខួប៦៦ឆ្នាំ ដែលទីក្រុងណាហ្គាសាគី ទទួលរងការទម្លាក់គ្រាប់បែកបរមាណូដ៏មហាប្រល័យរបស់សហរដ្ឋអាមេរិក ក្នុងអំឡុងពេលបញ្ចប់សង្គ្រាមលោកលើកទី២ ។
លោកថូម៊ីហ៊ីសា ថាអ៊ូអេ ចៅហ្វាយខេត្តណាហ្គាសាគី បានឱ្យដឹងថា ជប៉ុនត្រូវអភិវឌ្ឍថាមពលក្នុងជម្រើសដ៏សុវត្ថិភាព ដូចជា ថាមពលពន្លឺព្រះអាទិត្យ និងខ្យល់ក្រោយពីកើតឧប្បត្តិហេតុផ្ទុះឆេះរោងចក្រអគ្គិសនីដើរដោយថាមពលនុយក្លេអ៊ែរហ្វូគូស៊ីម៉ា ដ៏ធ្ងន់ធ្ងរធ្វើឱ្យប្រជាជនជប៉ុន និងពិភពលោកទាំងមូលមានការភ័យខ្លាចយ៉ាងខ្លាំងពីការសាយភាយសារធាតុវិទ្យុសកម្ម។ លោកថាអ៊ូអេ បានថ្លែងនៅក្នុងពិធីខួប៦៦ឆ្នាំ ដែលរៀបចំឡើងនៅក្បែររណ្តៅគ្រាប់បែកបរមាណូដែលកងទ័ពអាមេរិកវាយប្រហារជប៉ុនថា «ក្នុងខែមីនា កន្លងមក ពួកយើងបានទទួលការភ័យខ្លាចពីការផ្ទុះឆេះនៅរោងចក្រអគ្គិសនីនុយក្លេអ៊ែរហ្វូគូស៊ីម៉ា» ។ លោកបានបញ្ជាក់ថា ក្នុងនាមប្រជាជនរបស់ប្រទេសដែលជួបនឹងគ្រោះមហន្តរាយនុយក្លេអ៊ែរ អ្នកស្រុកក្នុងខេត្តណាហ្គាសាគី សូមអង្វរកុំឱ្យមានអ្នករងគ្រោះដោយសារធាតុវិទ្យុសកម្មដូចនៅក្នុងសម័យសង្គ្រាមលោកលើកទី២ទៀត ។ នៅមុនពេលកើតគ្រោះធម្មជាតិកាលពីថ្ងៃទី១១ មីនា កន្លងមក ជប៉ុនត្រូវពឹងផ្អែកលើថាមពលនុយក្លេអ៊ែរដល់ទៅ៣០% នៃតម្រូវការថាមពលសរុប និងមានគម្រោងបង្កើនដល់ទៅ៥០% ក្នុងឆ្នាំ២០៣០ ។ ប៉ុន្តែសកម្មជនផ្នែកបរិស្ថានបានធ្វើការអំពាវនាវឱ្យសើរើគម្រោងខាងលើ ក្រោយពីកើតហេតុរញ្ជួយដីបង្កឱ្យខូចខាតរោងចក្រអគ្គិសនីដើរដោយថាមពលនុយក្លេអ៊ែរ ។
លោកថាអ៊ូអេ គូសបញ្ជាក់បន្ថែមថា ទោះជាប្រើពេលយូរក៏ដោយ ចាំបាច់ត្រូវទ្រទ្រង់ការបង្កើតថាមពលធម្មជាតិជំនួសថាមពលនុយក្លេអ៊ែរ ដើម្បីប្តូរសោភ័ណភាពជប៉ុនឱ្យក្លាយជាប្រទេសដែលប្រើថាមពលសុវត្ថិភាព ។ អត្ថន័យនៅក្នុងសេចក្តីថ្លែងការណ៍របស់ចៅហ្វាយខេត្តណាហ្គាសាគី គឺជាផ្នែកមួយសង្កត់ធ្ងន់ទៅលើសម្ដីរបស់ចៅហ្វាយក្រុងហ៊ីរ៉ូស៊ីម៉ា និងការសន្យារបស់នាយករដ្ឋមន្ត្រីលោកណាអូតូ ឃាំង ដែលជំរុញឱ្យកាត់បន្ថយការប្រើថាមពលនុយក្លេអ៊ែរក្នុងប្រទេស ។
ទីក្រុងណាហ្គាសាគី ទទួលរងការវាយប្រហារដោយគ្រាប់បែកបរមាណូកាលពីថ្ងៃទី៩ សីហា ឆ្នាំ១៩៤៥ ដោយសម្លាប់មនុស្សជាង៧០.០០០នាក់ និងមានអ្នកជំងឺពីការទទួលសារធាតុវិទ្យុសកម្មជាច្រើននាក់ទៀត ៕
ចែករំលែកព័តមាននេះ