ខេត្តកំពង់ចាម ៖ ផ្ទះលក់គ្រឿងទេសយីហោ «ស៊ាវ ម៉េង» ហៅឪទ្រី ស្ថិតនៅភូមិសួងខាងលិច សង្កាត់សួង ក្រុងសួង ត្រូវបានអគ្គិភ័យឆាបឆេះចេញពីជាន់ទី១ ដោយមានផ្សែងហុយយ៉ាងខ្មួលខ្មាញ់ទៅលើអាកាស កាលពីវេលាម៉ោង៣និង៥០នាទីរសៀលថ្ងៃទី១០ សីហា ២០១១ បង្កឱ្យមានការភ្ញាក់
ខេត្តកំពង់ចាម ៖ ផ្ទះលក់គ្រឿងទេសយីហោ «ស៊ាវ ម៉េង» ហៅឪទ្រី ស្ថិតនៅភូមិសួងខាងលិច សង្កាត់សួង ក្រុងសួង ត្រូវបានអគ្គិភ័យឆាបឆេះចេញពីជាន់ទី១ ដោយមានផ្សែងហុយយ៉ាងខ្មួលខ្មាញ់ទៅលើអាកាស កាលពីវេលាម៉ោង៣និង៥០នាទីរសៀលថ្ងៃទី១០ សីហា ២០១១ បង្កឱ្យមានការភ្ញាក់ផ្អើលទៅដល់ប្រជាពលរដ្ឋ និងរថយន្តពន្លត់អគ្គិភ័យរបស់ស្នងការដ្ឋាននគរបាលខេត្តចំនួន៣គ្រឿងចេញទៅអន្តរាគមន៍ផងដែរ។
តាមសេចក្តីរាយការណ៍ពីលោកវរសេនីយ៍ត្រីលាង អេង អធិការនគរបាលក្រុងសួង បានប្រាប់ឱ្យកោះសន្តិភាពដឹងថា ខណៈពេលដែលភ្លើងកំពុងតែឆាបឆេះចេញពីផ្ទះលក់គ្រឿងទេសខាងលើ អាជីវករលក់ដូរនៅក្នុងផ្សារក្រុងសួង បានឆោឡោស្រែកថា «ភ្លើងឆេះផ្ទះៗ» ក្នុងខណៈពេលដែលម្ចាស់ផ្ទះកំពុងតែលក់ដូរនៅជាន់ខាងក្រោមមិនដឹងខ្លួននោះ។
លោកអធិការនគរបាលក្រុងសួងប្រាប់បន្តថា គ្រាន់តែឃើញបែបនេះ ម្ចាស់ផ្ទះ និងបងប្អូនដែលរស់នៅក្បែរនោះបាននាំគ្នាយកបំពង់សម្រាប់បាញ់ពន្លត់អគ្គិភ័យពីជាន់ខាងក្រោមឡើងយកទៅជាន់លើបាញ់ភ្លើងដែលកំពុងតែឆាបឆេះនោះ និងខ្លះទៀតបានបូមទឹកទៅបាញ់ពន្លត់។ ក្រោមការជួយជ្រោមជ្រែងពីសំណាក់ប្រជាពលរដ្ឋ និងនគរបាលក្រុងសួងផងនោះ ធ្វើឱ្យអណ្តាតភ្លើងបានថមថយ ហើយក៏មានរថយន្តពន្លត់អគ្គិភ័យរបស់ស្នងការដ្ឋាននគរបាលខេត្តចំនួន៣គ្រឿង បានចេញមកជួយអន្តរាគមន៍ទាន់ពេលវេលា ដោយបានបាញ់ទឹកអស់១រថយន្តផងដែរ ប្រហែលជា៣០នាទីភ្លើងបានរលត់ទៅវិញជាស្ថាពរ។
ចំពោះទ្រព្យសម្បត្តិដែលខូចខាតដោយសារភ្លើងនោះរួមមានដូចជា គ្រែ១ ទូដាក់ខោអាវ១ ខោអាវយឺតចំនួន២២ដុំ ពូក១ និងសម្ភារផ្សេងៗទៀត សរុបទឹកប្រាក់ទាំងអស់ប្រហែលជា២.០០០ដុល្លារប៉ុណ្ណោះ។ ការឆេះនេះមកពីឆ្លងចរន្តអគ្គិសនី ៕
ចែករំលែកព័តមាននេះ