ជិះម៉ូតូឌុបគ្នាបើកលឿនបុ.កបង្គោលស្លាកប៉ាណូ អ្នកអត់ស្រវឹងរបួសធ្ងន់ រីឯអ្នកស្រវឹងរបួសស្រាល
- ភ្នំពេញ
រាជធានីភ្នំពេញ៖ យុវជន២នាក់បានជិះម៉ូតូ១គ្រឿងឌុបគ្នាក្នុងល្បឿនលឿនក៏រេចង្កូតបុកឡើងលើខឿនផ្លូវ រួចជ្រុលបន្តទៅបុកបង្គោលស្លាកប៉ាណូ១ដើមទៀតពេញទំហឹង បណ្ដាលឲ្យដួលបោកផ្ទប់ថ្នល់ ។ ខណៈនោះយុវជនដែលជាអ្នកបើកបរម៉ូតូម៉ូតូអត់ស្រវឹងស្រាផងបែរជារងរបួសធ្ងន់ធ្ងរ ចំណែកឯយុវជនម្នាក់ទៀត ដែលជាអ្នកជិះខាងក្រោយស្រវឹងស្រា បែរជារងរបួសស្រាលទៅវិញ ។
ឧប្បត្តិហេតុនេះបានកើតឡើងកាលពីវេលាម៉ោង៩ព្រឹកថ្ងៃទី២៥ ខែសីហា ឆ្នាំ២០២៦ នៅលើផ្លូវជាតិលេខ៣ ស្ថិតនៅក្នុងភូមិព្រៃព្រីងខាងត្បូង២ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
យុវជនដែលអត់ស្រវឹងស្រាហើយរងបួសធ្ងន់នោះឈ្មោះគុន អាយុ១៨ឆ្នាំ មានទីលំនៅភូមិត្រពាំងពោធិ៍ សង្កាត់ចោមចៅទី៣ ខណ្ឌពោធិ៍សែនជ័យ ជាអ្នកបើកបរម៉ូតូ ។ ដោយឡែកយុវជនដែលជាអ្នកជិះពីក្រោយរួមដំណើរជាមួយ ហើយស្រវឹងស្រា និងបានរងរបួសស្រាលនោះឈ្មោះជា សុផាត អាយុ២០ឆ្នាំ មុខរបរអ្នកដឹកជញ្ជូនអីវាន់ មានទីលំនៅភូមិត្រពាំងជ្រៃ សង្កាត់កាកាបទី២ ខណ្ឌពោធិ៍សែនជ័យ ។
សមត្ថកិច្ចបានប្រាប់ឲ្យដឹងថា នៅមុនពេលកើតហេតុយុវជនទាំង២នាក់នោះបានជិះម៉ូតូ១គ្រឿងម៉ាកហុងដាឌ្រីមសេ១២៥ ពណ៍ខ្មៅ ពាក់ស្លាកលេខភ្នំពេញ1KY-0510 ឌុបគ្នាធ្វើដំណើរក្នុងទិសដៅពីជើងទៅត្បូង ។ លុះពេលទៅដល់ត្រង់ចំណុចកើតហេតុ ក៏រេចង្កូតជ្រុលទៅបុកឡើងលើខឿនផ្លូវ រួចជ្រុលបន្តទៅបុកបង្គោលស្លាកប៉ាណូនៅជិតនោះពេញទំហឹង បណ្ដាលឲ្យដួលបោកផ្ទប់ថ្នល ហើយយុវជនដែលជាអ្នកបើកម៉ូតូបានរងរបួសធ្ងន់ រីឯយុវជនដែលជិះខាងក្រោយរបួសស្រាល ។
ក្រោយពេលកើតហេតុរថយន្តមន្ទីរពេទ្យបង្អែកពោធិ៍ចិនតុង បានដឹកអ្នករបួសធ្ងន់ ទៅសង្គ្រោះបន្ទាន់នៅមន្ទីរពេទ្យព្រះកុសុមៈ បន្ទាប់មកនគរបាលបាននាំយកម៉ូតូទៅរក្សាទុកបណ្ដោះអាសន្ននៅអធិការដ្ឋាននគរបាលខណ្ឌពោធិ៍សែនជ័យ រង់ចាំប្រគល់ឲ្យម្ចាស់វិញនៅពេលក្រោយ ៕
ចែករំលែកព័តមាននេះ