ទា.រ.ក.ដែលស្លា.ប់ក្នុង «ទារកដ្ឋាន និងមត្តេយ្យសិក្សា ខេមឃីដ »មូលហេតុរលាកសួតនិងផ្លូវដង្ហើមធ្ងន់ធ្ងរ
- ភ្នំពេញ
រាជធានីភ្នំពេញ ៖ យោងតាមព័ត៌មានចុងក្រោយពីសមត្ថកិច្ចបានឲ្យដឹងថា ករណីអ្នកថែទាំនៅ «ទារកដ្ឋាន និងមត្តេយ្យសិក្សា ខេមឃីដ» ដែលមានទីតាំងស្ថិតនៅក្នុងភូមិដំណាក់ត្រយឹង សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ច្រកថ្នាំទារកអាយុជាង៣ខែរួចហូរឈាមតាមច្រមុះប្រកាច់ស្លាប់នោះ គឺទារកខាងលើ ស្លាប់ដោយជំងឺរលាកសួត និងផ្លូវដង្ហើមធ្ងន់ធ្ងរ មិនមានពាក់ព័ន្ធទៅនិងករណីអ្វីផ្សេងឡើយ ។
សមត្ថកិច្ចបានប្រាប់ឲ្យដឹងបន្តថា ក្រោយពេលកើតហេតុ ខាងឪពុកម្ដាយនិងក្រុមគ្រួសារទារកនោះមិនបានប្ដឹងផ្តល់លើម្ចាស់ទារកដ្ឋាន និងមត្តេយ្យសិក្សា ខេមឃីដ នោះទេ ដោយពួកគាត់អះអាងថា កូនចៅរបស់ពួកគាត់មានជំងឺតាំងពីនៅផ្ទះមកម្ល៉េះ ។ ដោយឡែក ខាងម្ចាស់ទារកដ្ឋាន និងមត្តេយ្យសិក្សា ខេមឃីដ ក៏បានឧបត្ថម្ភប្រាក់ចំនួន១ពាន់ដុល្លារ សម្រាប់ឲ្យក្រុមគ្រួសារសពទារកខាងលើ ដើម្បីចាត់ចែងធ្វើបុណ្យសពកូនផងដែរ ហើយភាគីទាំង២ ក៏បានបញ្ចប់រឿងនេះរួចរាល់ហើយ ។
សមត្ថកិច្ចក៏បានប្រាប់ឲ្យដឹងបន្ថែមថា យោងតាមការពិនិត្យកោសល្យវិច័យ ដោយនគរបាលការិយាល័យបច្ចេកទេស និងវិទ្យាសាស្ត្រនៃស្នងការដ្ឋាននគរបាលរាជធានីភ្នំពេញរកឃើញថា ទារករូបនោះបានស្លាប់ដោយសារតែជំងឺរលាកសួត និងផ្លូវដង្ហើមធ្ងន់ធ្ងរពេក មិនពាក់ព័ន្ធទៅនិងករណីផ្សេងពីនេះឡើយ ។
សូមរំលឹកថា ហេតុការណ៍ខាងលើ បានកើតឡើងកាលពីវេលាម៉ោងជាង៨ព្រឹកថ្ងៃទី២១ ខែសីហា ឆ្នាំ២០២៦ នៅក្នុង
«ទារកដ្ឋាន និងមត្តេយ្យសិក្សា ខេមឃីដ» ដែលមានទីតាំងស្ថិតនៅក្នុងភូមិដំណាក់ត្រយឹង សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ។
ទារកដែលស្លាប់នោះ ឈ្មោះអាត ហុងវៃ អាយុ៣ខែកន្លះ មានម្ដាយឈ្មោះម៉ី ណារីន អាយុ២១ឆ្នាំ មុខរបរកម្មការិនីរោងចក្រ និងឪពុកឈ្មោះហូ ហុងលី អាយុ២១ឆ្នាំ មុខរបរកម្មកររោងចក្រ មានទីលំនៅបច្ចុប្បន្នភូមិក្រាំងដូនទៃ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ៕
ចែករំលែកព័តមាននេះ