ខេត្តកំពង់ស្ពឺ ៖ ជនសង្ស័យម្នាក់ក្នុងចំណោមបក្សពួក៤នាក់ផ្សេងទៀត ដែលម្ចាស់ផ្ទះបង្ហាញថា ជាក្រុមចោរប្លន់កាលពីប៉ុន្មានថ្ងៃមុនបានត្រូវ សមត្ថកិច្ចឃាត់ខ្លួនសាកសួរ ។ តាមការចោទប្រកាន់ថា ជនម្នាក់នេះស្ថិតនៅក្នុងចំណោមជនសង្ស័យ៥នាក់ ដែលមានកាំភ្លើងអាកា៤៧ កាត់ស្វាយមួយដើម ធ្វើសកម្មភាពប្លន់
ខេត្តកំពង់ស្ពឺ ៖ ជនសង្ស័យម្នាក់ក្នុងចំណោមបក្សពួក៤នាក់ផ្សេងទៀត ដែលម្ចាស់ផ្ទះបង្ហាញថា ជាក្រុមចោរប្លន់កាលពីប៉ុន្មានថ្ងៃមុនបានត្រូវសមត្ថកិច្ចឃាត់ខ្លួនសាកសួរ ។ តាមការចោទប្រកាន់ថា ជនម្នាក់នេះស្ថិតនៅក្នុងចំណោមជនសង្ស័យ៥នាក់ ដែលមានកាំភ្លើងអាកា៤៧ កាត់ស្វាយមួយដើម ធ្វើសកម្មភាពប្លន់យកទ្រព្យសម្បត្តិពួកគាត់កាលពីវេលាម៉ោង១១និង១៥នាទីយប់ថ្ងៃទី៨ សីហា នៅក្នុងភូមិក្រាំងខ្នុរ ឃុំដំណាក់រាំង ស្រុកឧដុង្គ ។
មន្ត្រីប៉ូលិសផ្នែកសួរចម្លើយនៃការិយាល័យកណ្តាលព្រហ្មទណ្ឌកម្រិតធ្ងន់បានឱ្យដឹងថា ក្រោយពីមានចោរចំនួន៥នាក់ធ្វើសកម្មភាពប្លន់គ្រួសារឈ្មោះអេ លីវ ប្រពន្ធឈ្មោះតាំង ឡាយ យកអស់ទ្រព្យសម្បត្តិ សមត្ថកិច្ចក៏បានស្រាវជ្រាវរកមុខសញ្ញាព្រមទាំងពួនស្ទាក់ទាំងយប់ទៀតផង ប៉ុន្តែពុំឃើញស្រមោលចោរទាំង៥នាក់ទេ ។ ទោះជាយ៉ាងណា បានដាក់ការមន្ទិលសង្ស័យលើមនុស្សម្នាក់ឈ្មោះជួន សល់ ភេទប្រុស អាយុ៣១ឆ្នាំ ដែលធ្លាប់ចេញចូលក្នុងភូមិនោះមកលេងបៀ អាប៉ោង ។ ជនឈ្មោះជួន សល់នេះនៅយប់ប្លន់នោះ គឺម្ចាស់ផ្ទះបានឃើញច្បាស់ និងចង្អុលបង្ហាញថាពិតជាឈ្មោះនេះតែម្តង ទោះបីពុំមានការសារភាពបែបណាក៏ដោយក៏ពួកគាត់អះអាងថា ជននេះស្ថិតក្នុងចំណោមបក្សពួកទាំង៥នាក់ ដែលប្លន់ពួកគាត់។
លោកស្វាយ យឿន ប្រធានការិយាល័យព្រហ្មទណ្ឌកម្រិតធ្ងន់ខេត្តបានឱ្យដឹងដែរថា ទោះបីជាករណីនេះពុំទាន់ច្បាស់មែន តែម្ចាស់ផ្ទះបង្ហាញមុខដូច្នេះត្រូវតែឃុំខ្លួនជនសង្ស័យដើម្បីធ្វើការស្រាវជ្រាវ ។ ចំពោះករណីនេះ សមត្ថកិច្ចទាំងខេត្តនិងស្រុកក៏បានធ្វើការស៊ើបអង្កេតយ៉ាងក្តៅគគុកផងដែរ ព្រោះទោះបីនៅតាមភូមិ-ឃុំមានការយាមល្បាតមុតមាំមែន តែនៅភ្លាត់និងពុំទាន់ចាត់ទុកថាមានសុវត្ថិភាពឱ្យបានរឹងមាំនៅឡើយទេ ៕
ចែករំលែកព័តមាននេះ