ទារិកាដែលគេយកប្លុងចោលជិតវត្តកំបូល ត្រូវបានលោកអធិការនាំយកទៅសង្គ្រោះ មានសុខភាពល្អ ខណៈពលរដ្ឋខ្ទង់រយនាក់សុំយកទៅចិញ្ចឹម
- ភ្នំពេញ
រាជធានីភ្នំពេញ៖ ជនមិនស្គាល់មុខបានយកទារិកាម្នាក់ ដែលទើបកើតថ្មីៗទៅប្លុងចោលនៅជិតវត្តកំបូល ហើយត្រូវបានប្រជាពលរដ្ឋប្រទះឃើញ ក៏បានរាយការណ៍ជូននគរបាលឲ្យចុះទៅមើល ។ បន្ទាប់មកលោកវរៈសេនីយ៍ឯកហុង ពិសិដ្ឋ អធិការនៃអធិការដ្ឋាននគរបាលខណ្ឌកំបូល បានដឹកនាំកម្លាំងចុះទៅកាន់ទីនោះដោយផ្ទាល់រួចបាននាំយកទារិកានោះទៅពិនិត្យនិងថែទាំសុខភាពនៅមន្ទីរពេទ្យកុមារជាតិទាំងយប់ ។
ហេតុការណ៍នោះបានបង្កឲ្យមានការភ្ញាក់ផ្អើលកាលពីវេលាយប់ថ្ងៃទី១៨ ខែសីហា ឆ្នាំ២០២៦ នៅក្នុងដីឡូត៌មួយកន្លែង ជិតវត្តកំបូល ស្ថិតនៅក្នុងភូមិផ្សារកំបូល សង្កាត់កំបូល ខណ្ឌកំបូល រាជធានីភ្នំពេញ ។
ប្រជាពលរដ្ឋបាននិយាយថា ពួកគាត់មិនបានដឹងថា ឪពុកម្ដាយរបស់ទារិកាខាងលើនោះគឺជានរណានោះទេ ហើយក៏ពុំដឹងថាមូលហេតុអ្វីទើបបានជាបង្កើតកូនមកហើយមិនចិញ្ចឹមបីបាច់ថែរក្សាឲ្យបានធំធាត់និងគេហើយបែរជាយកទៅបោះចោលបែបនេះទៅវិញ ។ ដោយឡែកនៅក្នុងភូមិរបស់ពួកគាត់កំពុងរស់នៅនេះពុំឃើញមានស្ត្រីណាម្នាក់ទើបនិងសម្រាលកូន និងគួរឲ្យសង្ស័យថាមានអ្នកយកកូនទៅបោះចោលបែបនេះឡើយ ។ ពួកគាត់សង្ស័យថាឪពុកម្ដាយទារិកានេះស្រលាញ់គ្នាដោយលួចលាក់ ហើយបានប្រព្រឹត្តខុសគន្លងប្រពៃណីរហូតមានផ្ទៃពោះ និងដោយខ្លាចខ្មាសគេ ទើបពេលកូនកើតមកយកទៅបោះចោលតែម្ដង ។
នគរបាលបានប្រាប់ថា នៅវេលាយប់ថ្ងៃកើតហេតុខាងលើ ប្រជាពលរដ្ឋដែលធ្វើដំណើរឆ្លងកាត់ចំណុចនោះបានប្រទះឃើញទារិកាទើបនិងកើតនេះត្រូវជនមិនស្គាល់មុខរុំក្រណាត់រួចប្លុងចោល ពេលនោះពួកគាត់ស្រែកប្រាប់អ្នកភូមិបង្កឲ្យមានការភ្ញាក់ផ្អើលទាំងយប់ ។ បន្ទាប់មកប្រជាពលរដ្ឋខាងលើបានរាយការណ៍ជូននគរបាលប៉ុស្តិ៍កំបូល និងនគរបាលខណ្ឌកំបូលឲ្យចុះទៅពិនិត្យនិងស្រាវជ្រាវរកជនដែលយកទារិកាទៅប្លុងចោលបែបនេះ ។
នគរបាលបានប្រាប់ឲ្យដឹងបន្តថា ក្រោយពេលទទួលបានដំណឹងនោះភ្លាមៗ លោកវរសេនីយ៍ឯក ហុង ពិសិដ្ឋ អធិការ នៃអធិការដ្ឋាននគរបាលខណ្ឌកំបូល បានដឹកនាំកម្លាំងចុះទៅធ្វើការត្រួតពិនិត្យដោយផ្ទាល់ ។ បន្ទាប់មកលោកអធិការបានបីទារិកាខាលើជិះរថយន្តនាំយកទៅកាន់មន្ទីរពេទ្យកុមាជាតិដើម្បីពិនិត្យនិងថែទាំសុខភាពទាំងយប់ ដោយមានការទទួលពិនិត្យដោយយកចិត្តទុកដាក់ពីសំណាក់ក្រុមគ្រូពេទ្យផងដែរ ។
នគរបាលបានបញ្ជាក់ប្រាប់បន្ថែមទៀតថា គិតរហូតមកដល់វេលារសៀលថ្ងៃទី១៩ ខែសីហា ឆ្នាំ២០២៦ ទារិកានោះកំពុងស្ថិតនៅក្នុងមន្ទីរពេទ្យកុមារជាតិដដែល ប៉ុន្តែមានសុខភាពល្អជាធម្មតាទេ ។ មិនតែប៉ុណ្ណោះមានប្រជាពលរដ្ឋខ្ទង់រយនាក់ហើយបានទំនាក់ទំនងទៅកាន់គ្រូពេទ្យនៃមន្ទីរពេទ្យកុមារជាតិ និងនគរបាលខណ្ឌកំបូល ដើម្បីសុំយកទារិកានោះទៅចិញ្ចឹម ប៉ុន្តែនៅពុំទាន់មានការសម្រេចបែបណានៅឡើយទេ ៕
ចែករំលែកព័តមាននេះ