សុខភាព៖ យោងតាមការចុះផ្សាយពីប្រភពបរទេស ពេលនិយាយពីជំងឺខ្លាញ់​រុំថ្លើមមនុស្សជាច្រើនតែងគិតថា អាហារចៀន ឬអាហារដែលមានជាតិខ្លាញ់ច្រើន គឺជាមូលហេតុសំខាន់។ ប៉ុន្តែ អំបិល ដែលជាគ្រឿងផ្សំប្រើប្រាស់ជារៀងរាល់ថ្ងៃ ក៏អាចក្លាយជាបញ្ហាប្រសិនបើទទួលទានច្រើនពេក។

មនុស្សជាច្រើនមានទម្លាប់បន្ថែមអំបិលទៅក្នុងម្ហូបដែលចម្អិនរួច ដោយសារមានអារម្មណ៍ថារសជាតិមិនទាន់ប្រៃគ្រប់គ្រាន់។ ការធ្វើបែបនេះជាញឹកញាប់អាចធ្វើឱ្យរាងកាយទទួលជាតិសូដ្យូមលើសតម្រូវការ។

ការសិក្សាមួយដែលវិភាគទម្លាប់បរិភោគរបស់មនុស្សជិត ៥០០,០០០ នាក់ រយៈពេល ១៣ ឆ្នាំ បានរកឃើញថា អ្នកដែលបន្ថែមអំបិលទៅក្នុងអាហារបន្ទាប់ពីចម្អិនរួច មានហានិភ័យខ្លាញ់រុំថ្លើមខ្ពស់ជាងអ្នកដែលកម្របន្ថែមអំបិល។ ក្រុមដែលបន្ថែមអំបិលម្តងម្កាល មានហានិភ័យខ្ពស់ប្រហែល ៨% ខណៈអ្នកដែលធ្វើជាញឹកញាប់ និងជានិច្ច មានហានិភ័យខ្ពស់ប្រហែល ២២% និង ៤០% រៀងគ្នា។

ការទទួលទានអំបិលច្រើនក៏អាចបង្កើនបន្ទុកលើសរីរាង្គផ្សេងៗផងដែរ។ ជាតិសូដ្យូមលើសអាចធ្វើឱ្យរាងកាយរក្សាទឹក បង្កើនបរិមាណឈាម និងសម្ពាធឈាម ដែលបង្កើនបន្ទុកលើបេះដូង និងប្រព័ន្ធសរសៃឈាម។ តម្រងនោមក៏ត្រូវធ្វើការខ្លាំងជាងមុន ដើម្បីបញ្ចេញសូដ្យូមចេញពីរាងកាយ។

លើសពីនេះ របបអាហារដែលមានជាតិប្រៃខ្លាំងអាចបង្កើនការបាត់បង់ជាតិកាល់ស្យូមតាមទឹកនោម ដែលអាចប៉ះពាល់ដល់សុខភាពឆ្អឹង និងបង្កើនហានិភ័យឆ្អឹងស្តើង។ ការទទួលទានប្រៃខ្លាំងរយៈពេលយូរក៏ត្រូវបានផ្សារភ្ជាប់នឹងហានិភ័យជំងឺបេះដូង និងបញ្ហាសុខភាពផ្សេងៗផងដែរ។

ដូច្នេះ ដើម្បីថែរក្សាសុខភាពថ្លើម និងសុខភាពទូទៅ គួរកាត់បន្ថយការបន្ថែមអំបិលដោយមិនចាំបាច់ ជ្រើសរើសអាហារស្រស់ និងព្យាយាមឱ្យរសជាតិអាហារមានភាពសមល្មម។ ការកាត់បន្ថយអំបិលបន្តិចម្តងៗ គឺជាទម្លាប់តូចមួយដែលអាចផ្តល់អត្ថប្រយោជន៍ដល់សុខភាពរយៈពេលវែង៕