អ្នកជំនាញខាងភ្នែកកំពុងព្រមានមនុស្សឱ្យប្រុងប្រយ័ត្ន ចំពោះសញ្ញាណាមួយដែលបង្ហាញថា ចក្ខុវិស័យរបស់ពួកគេត្រូវបានខូចខាតដោយការសម្លឹងមើលព្រះអាទិត្យក្នុងអំឡុងពេលសូរ្យគ្រាស កាលពីថ្ងៃពុធ ។ នេះបើយោងតាមការចុះផ្សាយរបស់ BBC News ។
រោគសញ្ញាអាចរួមមាន ការមើលឃើញមិនច្បាស់ ចំណុចងងឹតកណ្តាល ឬចំណុចខ្មៅ និងភាពប្រែប្រួលកាន់តែខ្លាំងចំពោះពន្លឺ ។ បន្ទាប់ពីសូរ្យគ្រាសសរុបលើកមុន ដែលអាចមើលឃើញនៅចក្រភពអង់គ្លេស ក្នុងឆ្នាំ១៩៩៩ មនុស្សប្រហែល៧០នាក់បានរងរបួសភ្នែក ។
ពួកគេជាច្រើនបានចំណាយពេលតិចជាងមួយនាទី ដើម្បីមើលទស្សនីយភាពនេះ ដោយមិនដឹងថា វាកំពុងធ្វើឱ្យភ្នែករបស់ពួកគេខូចនោះទេ ។ គ្រោះថ្នាក់កើតឡើង ពីព្រោះការសម្លឹងមើលសូរ្យគ្រាសដោយគ្មានការការពារ អាចបំផ្លាញរីទីណា ដែលស្ថិតនៅខាងក្រោយភ្នែក និងជាពិសេស កោសិកាទាំងនោះដែលទទួលខុសត្រូវចំពោះការមើលឃើញកណ្តាលយ៉ាងច្បាស់។
ព្រះអាទិត្យភ្លឺខ្លាំងមិនគួរឲ្យជឿ សូម្បីតែពេលដែលត្រូវបានបាំងដោយផ្នែកដោយព្រះចន្ទក៏ដោយ ។ ជាធម្មតា ប្រសិនបើយើងសម្លឹងមើលវា យើងនឹងជ្រួញចិញ្ចើម ហើយងាកចេញយ៉ាងលឿន ។
ប៉ុន្តែនៅពេលដែលវាងងឹតជាងមុន អំឡុងពេលមានសូរ្យគ្រាស សភាវគតិនោះ អាចនឹងមិនចាប់ផ្តើមដំណើរការទេ សូម្បីតែពេលដែលភ្នែករបស់យើងកំពុងរងការខូចខាតក៏ដោយ ។
ពន្លឺភ្លឺច្បាស់ និងវិទ្យុសកម្មអ៊ុលត្រាវីយូឡេ ដែលបញ្ចេញដោយព្រះអាទិត្យអាចនាំឱ្យមានស្ថានភាពមួយហៅថា «ជំងឺរីទីណូប៉ាធីសូឡា»។
ហើយដោយសារតែរីទីណា មិនមានឧបករណ៍ទទួលការឈឺចាប់ វាពិបាកសម្រាប់មនុស្សក្នុងការកត់សម្គាល់ពីការខូចខាតនៅពេលដែលវាកើតឡើង ដូច្នេះ រោគសញ្ញាអាចលេចឡើងតែប៉ុន្មានម៉ោងក្រោយមកប៉ុណ្ណោះ ។
មុនពេលមានសូរ្យគ្រាស អ្នកជំនាញបានព្រមានថា គួរប្រើតែវ៉ែនតាសូរ្យគ្រាសដែលរចនាឡើងជាពិសេសពិតប្រាកដប៉ុណ្ណោះ ហើយវ៉ែនតាការពារកម្តៅថ្ងៃធម្មតា ឬឧបករណ៍ផ្សេងទៀតមិនគ្រប់គ្រាន់ ដើម្បីការពារការខូចខាតដែលអាចកើតមាននោះទេ ។
អ្វីដែលត្រូវប្រុងប្រយ័ត្ន?
លោក Alexander Ionides គ្រូពេទ្យវះកាត់ភ្នែកនៅមន្ទីរពេទ្យភ្នែក Moorfields ក្នុងទីក្រុងឡុងដ៍ បាននិយាយថា ប្រសិនបើអ្នកបានធ្វើឱ្យភ្នែករបស់អ្នកខូច រោគសញ្ញានឹងចាប់ផ្តើមលេចឡើងក្នុងរយៈពេលពីរបីម៉ោង ។
«វាជាចំណុចកណ្តាលនៅក្នុងវិស័យដែលមើលឃើញ មិនថាអ្នកកំពុងសម្លឹងមើលអ្វីនោះទេ ប្រសិនបើអ្នកកំពុងសម្លឹងមើលមុខនរណាម្នាក់ ឬការសរសេរនៅលើទំព័រ ឬនាឡិកានៅលើជញ្ជាំង អ្នកអាចមានការបង្ខូចទ្រង់ទ្រាយ» ។
វានឹងមានពណ៌ប្រផេះ ឬលឿង ឬចំណុចងងឹតមួយនៅចំកណ្តាលនៃការមើលឃើញរបស់អ្នក។«វាមិនឈឺចាប់ទេ គ្មានការឈឺចាប់ដូចការរលាកដែលអាចចាត់ទុកថា ជានោះទេ ហើយវាអាចកើតឡើងបន្តិចម្តងៗ» ។
ចែករំលែកព័តមាននេះ