រាជធានីភ្នំពេញ ៖ យុវជនម្នាក់ស្រវឹងជោកបើករថយន្តលឿនដូចហោះ ជ្រុលទៅបុកម៉ូតូវ៉េវ ខូចខាតទាំងស្រុង ចំណែកម្ចាស់បាក់ភ្លៅ បន្ទាប់មករថយន្តបានជ្រុលទៅបុកយុវជនម្នាក់ទៀតដែល អង្គុយលើម៉ូតូសណ្តោងរទេះរង់ចាំដឹកបាយជ្រូកនៅលើខឿនជាប់របង ការដ្ឋានសំណង់ដួលបោកក្បាលហូរឈាមស្លា.ប់នៅនឹងកន្លែង
រាជធានីភ្នំពេញ ៖ យុវជនម្នាក់ស្រវឹងជោកបើករថយន្តលឿនដូចហោះ ជ្រុលទៅបុកម៉ូតូវ៉េវ ខូចខាតទាំងស្រុង ចំណែកម្ចាស់បាក់ភ្លៅ បន្ទាប់មករថយន្តបានជ្រុលទៅបុកយុវជនម្នាក់ទៀតដែលអង្គុយលើម៉ូតូសណ្តោងរទេះរង់ចាំដឹកបាយជ្រូកនៅលើខឿនជាប់របងការដ្ឋានសំណង់ដួលបោកក្បាលហូរឈាមស្លាប់នៅនឹងកន្លែងកាលពីវេលាម៉ោង២និង៣០នាទីរំលងអធ្រាត្រឈានចូលថ្ងៃទី១០ សីហា ២០១១ នៅតាមបណ្តោយមហាវិថីព្រះមុនីវង្ស កែងវិថី២៨៨ ក្នុងសង្កាត់បឹងកេងកងទី២ ខណ្ឌចំការមន។
ប្រភពព័ត៌មានពីកន្លែងកើតហេតុបានឱ្យដឹងថា រថយន្តម៉ាក FORTUNER ពណ៌ទឹកប្រាក់ ពាក់ស្លាកលេខ ភ្នំពេញ 2D-1601 បើកបរដោយយុវជនម្នាក់ តាមវិថី២៨៨ ឆ្លងកាត់មហាវិថីព្រះមុនីវង្ស បោះពួយលឿនស្លេវ បណ្តាលឱ្យបុកយុវជនម្នាក់ដែលកំពុងជិះម៉ូតូម៉ាកសេ១២៥ ស៊េរី២០០៥ ពណ៌ខ្មៅ ពាក់ស្លាកលេខ កណ្តាល 1E-6163 តាមបណ្តោយមហាវិថីព្រះមុនីវង្ស ក្នុងទិសដៅពីត្បូងទៅជើងដួលបាក់ភ្លៅ ហើយម៉ូតូខូចខាតទាំងស្រុង។ បន្ទាប់ពីបុកម៉ូតូសេ១២៥ រថយន្តមិនបន្ថយល្បឿនទេ បានជ្រុលទៅបុកយុវជនម្នាក់ទៀតដែលឈប់នៅលើខឿនថ្នល់ជាប់របងការដ្ឋានសំណង់នៅមុខអតីតមន្ទីរពេទ្យចិន ដោយយុវជននោះអង្គុយលើម៉ូតូសណ្តោងរទេះដឹកបាយជ្រូករង់ចាំប្រមូលបាយជ្រូកពីអ្នកលក់បបរសនៅជិតនោះបានបុកពេញទំហឹង បណ្តាលឱ្យប៉ើងខ្ទាតបោកក្បាលស្លាប់នៅនឹងកន្លែង រីឯម៉ូតូសណ្តោងរទេះខ្ទាតប៉ើងចេញឆ្ងាយជាច្រើនម៉ែត្រ។
យុវជនជិះម៉ូតូសេ១២៥ ពណ៌ខ្មៅ ដែលរងរបួសបាក់ភ្លៅ ត្រូវបញ្ជូនទៅព្យាបាលនៅគ្លីនិកគឹម សុង ផ្សារដេប៉ូ រីឯយុវជនដែលស្លាប់បាត់បង់ជីវិតឈ្មោះប៉ាន់ សុខជា អាយុ២៧ឆ្នាំ ជាអ្នកដើរទិញដឹកបាយជ្រូក មានទីលំនៅភូមិមានជ័យ ផ្ទះលេខ១៤ សង្កាត់ស្ទឹងមានជ័យ ខណ្ឌមានជ័យ ត្រូវបានដឹកយកទៅតម្កល់ទុកធ្វើបុណ្យតាមប្រពៃណីនៅវត្តស្ទឹងមានជ័យ ៕
ចែករំលែកព័តមាននេះ