នាវា Frigate 622 ដែលកម្ពុជាបានដាក់ឈ្មោះថា កោះកុងសែនជ័យ ដែលទើបតែទទួលបាននាពេលថ្មីៗនេះបានចេញបេសកម្មដំបូងបំផុតរបស់ខ្លួន ។
ក្រសួងការពារជាតិ បានអះអាងថា កោះកុងសែនជ័យ បានចេញបេសកម្មហ្វឹកហាត់ ល្បាតក្នុងដែនសមុទ្រកម្ពុជា កាលពីថ្ងៃទី ០៨ ខែសីហា ឆ្នាំ២០២៦ កន្លងទៅ ។
បេសកម្មនេះ បានធ្វើឡើងក្រោមអធិបតីភាពលោក ទៀ សីហា ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ និងសម្តេចពិជ័យសេនា នាយឧត្តមសេនីយ៍ផុតលេខ ផ្កាយមាស៥ ទៀ បាញ់ ឧត្តមប្រឹក្សាផ្ទាល់ព្រះមហាក្សត្រ ។
សម្តេចពិជ័យសេនា បានមានប្រសាសន៍ថា សម្តេចពិតជារំភើប និងមានមោទនភាពដែលបានចុះមកត្រួតពិនិត្យ និងបានឃើញការហ្វឹកហ្វឺនរបស់នាវិកកម្ពុជា នៃកងទ័ពជើងទឹក ដែលមាននាវា ដ៏ទំនើបមួយនេះ ។
កោះកុងសែនជ័យ ជានាវាចម្បាំងពេញនិយម ដែលកងទ័ពជើងទឹករបស់ប្រទេសជាច្រើនលើពិភពលោកប្រើប្រាស់ក្នុងប្រតិបត្តិការលើផ្ទៃទឹក ។ នាវានេះជាប្រភេទនាវាចំបាំងមានខ្នាតតូចជាងនាវាចម្បាំងដទៃ ប៉ុន្តែវាមានសមត្ថភាពខ្ពស់ក្នុងការបត់បែនទិសដៅចរបានឆាប់រហ័ស ។
កោះកុងសែនជ័យ មាននាទីចម្បងក្នុងការការពារក្រុមនាវាចម្បាំងទាំងមូល ដោយប្រព័ន្ធមីស៊ីលប្រឆាំងនឹងនាវាមុជទឹក ដោយមានប្រព័ន្ធសម្រាប់ចាប់វត្ថុផ្សេងៗដែលនៅក្រោមបាតនាវា ។ នាវានេះក៏អាចដឹកឧទ្ធម្ភាគចក្រដែលមានមុខងារសម្រាប់ចាប់សញ្ញានាវាមុជទឹកសត្រូវពីលើអាកាសបន្ថែមពីប្រព័ន្ធចាប់សញ្ញាពិសេសរបស់ខ្លួន ។
កោះកុងសែនជ័យ មាននាទីបន្ទាប់បន្សំលើការការពារផ្នែកអាកាសពីការវាយប្រហាររបស់យន្តហោះចម្បាំង ក្នុងចម្ងាយខ្លីដោយប្រើប្រព័ន្ធកាំភ្លើង និងជានាវាដែលមានបំពាក់កាំភ្លើងចន្លោះ ពី២៤ទៅ៥៦ដើម ។ ក្រៅពីមុខងារការពារ និងប្រឆាំងកោះកុងសែនជ័យ ក៏មាននាទីដឹកជញ្ជូនផងដែរ ។ នាវាប្រភេទនេះជាទូទៅអាចផ្ទុកទម្ងន់បាន៣០០០តោន ៕
ចែករំលែកព័តមាននេះ