សង្គ្រាមអ៊ុយក្រែន ៖ ខណៈរុស្ស៊ីបាញ់មីស៊ីលបាលីស្ទិកផលិតនៅកូរ៉េខាងជើងច្រើនសឹបគ្រាប់ លើអ៊ុយក្រែនចាប់តាំងពីដំណាច់ឆ្នាំ២០២៣មក ការដាក់ពង្រាយកងកម្លាំងមីស៊ីលកូរ៉េខាងជើងនៅរុស្ស៊ី គឺជាការពង្រឹងកិច្ចសហប្រតិបត្តិការ យោធាដែលកាន់តែពង្រីកស្រាប់ រវាងក្រុងមូស្គូ និងក្រុងព្យុងយ៉ាង។
លោកអានឌ្រីអ៉ីឆ័រនីញ៉ា អ្នកទទួលខុសត្រូវខាងផ្នែកស៊ើបការណ៍អ៊ុយក្រែនថ្លែងថា រុស្ស៊ីគ្រោងដាក់បញ្ចូលកងឯកភាពមីស៊ីលនោះរបស់កូរ៉េខាងជើង ដែលមានទាហាន៩០នាក់ ទៅក្នុងផ្ទៃកងពលតូចមីស៊ីលទី១១២ ដែលដាក់ពង្រាយក្នុងតំបន់វ៉ារ៉ូនីយ៉េវភាគខាងលិចរុស្ស៊ី ។
កងឯកភាពមីស៊ីលនោះ អាចបំពាក់ដោយមីស៊ីល១២០គ្រាប់ និងជើងទម្របាញ់៦ សម្រាប់បាញ់ទៅកាន់អ៊ុយក្រែន នាំឲ្យផ្នែកការពារអាកាសអ៊ុយក្រែន កាន់តែជួបការលំបាកថែមទៀត ខណៈក្រុងគៀវកំពុងខ្វះខាតខ្លាំងប្រព័ន្ធការពារអាកាស ។
ក្រុងព្យុងយ៉ាងបានបញ្ជូនរួចហើយទៅកាន់រុស្ស៊ីមីស៊ីលធុនKN-23 និង KN-24 ចំនួន៤០គ្រាប់ ព្រមទាំងបុគ្កលិកយោធា។ កាលពីសប្ដាហ៍មុនរុស្ស៊ីបានបាញ់មីស៊ីលជំនួយកូរ៉េខាងជើង២គ្រាប់ប្រឆាំងអ៊ុយក្រែន ៕
ចែករំលែកព័តមាននេះ