សហរដ្ឋអាមេរិក ៖ ភ្លើងឆេះព្រៃដ៏ធំមួយកើតមាននៅភាគពាយ័ព្យអាមេរិក នាថ្ងៃទី៤ សីហា នៅបន្តឆេះនៅទីក្រុង SPOKANE ដែលនៅទីនោះ ប្រជាជនកំពុងតែមានកំហឹង ដោយសារផ្ទះច្រើនរយខ្នងត្រូវក្លាយជាផេះ ។ មនុស្សម្នាក់ ត្រូវបានគេសង្ស័យថាជាអ្នកលួចដុតនាំឲ្យមានភ្លើងឆេះចេញពីមុខព្រួញមួយ ។
បណ្ដាសង្កាត់នៃទីក្រុងនោះទាំងមូល ត្រូវបំផ្លាញដោយអណ្ដាតភ្លើង ដែលភ្លើងឆេះព្រៃនោះកើតមានចាប់តាំងពីថ្ងៃទី១ សីហាមកនៅរដ្ឋវ៉ាស៊ីនតោន ។ មនុស្សប្រមាណជាង៦៥.០០០នាក់ ត្រូវជម្លៀសចេញ ប្រឈមមុខនឹងភ្លើងឆេះរាលដានដល់៣មុខព្រួញ ក្នុងទីក្រុងមានប្រជាជនប្រមាណជា២៣០.០០០នាក់នោះ ។ អាជ្ញាធរសម្រាប់ពេលនេះ នៅមិនទាន់អាចកំណត់ដឹងពីចំនួនអ្នកស្លាប់នៅឡើយ ។
ក្នុងចំណោមភ្លើងឆេះទាំង៣មុខព្រួញនោះ មុខព្រួញមួយត្រូវបានសង្ស័យមនុស្សម្នាក់ថា លួចដុត ។ ជននោះត្រូវបានចាប់ខ្លួនកាលពីយប់ថ្ងៃទី៣ សីហា ដោយរូបគេមានឈើគូសមួយប្រអប់ និងដែកកេសមួយ។ ជននោះ ត្រូវបានសាក្សីម្នាក់ប្រទះឃើញនៅជិតកន្លែងភ្លើងចាប់ឆេះដំបូង ។ បុរសនោះជាជនជាតិអាមេរិកមានអាយុ៣៧ឆ្នាំ ឈ្មោះAARON FARINACCI ជាមនុស្សធ្លាប់ជាប់គុកជិត១០ឆ្នាំពីបទសម្លាប់ឪពុកគេ មុនពេលទទួលបានការដោះលែងកាលពីឆ្នាំ២០២០។ រូបគេពេលនេះ ត្រូវឲ្យស្ថិតនៅក្រៅឃុំដោយចៅក្រមម្នាក់ ជាមួយការបង់ប្រាក់ធានា១លានដុល្លារ ។
នៅក្រុង SPOKANE អគារយ៉ាងតិច៧០០ ត្រូវភ្លើងឆេះបំផ្លា្អញ ដោយប្រជាជនមិនអាចវិលមករស់នៅវិញបាន។ នាចុងសប្ដាហ៍កន្លងទៅមានខ្យល់បោកបក់ខ្លាំង សីតុណ្ហភាពក្ដៅហែង និងភាពរាំងស្ងួតខ្លាំង ក្នុងរដ្ឋវ៉ាស៊ីនតោនពុំធ្លាប់មានចាប់តាំងពី៤ឆ្នាំមកហើយ ពិតជាអំណោយផលខ្លាំងដល់ការឆេះរាលដាលយ៉ាងលឿននៃភ្លើងឆេះព្រៃ។ ភ្លើងឆេះខ្លាំងបំផុតដល់អាចរំលងស្ទឹងមកឆេះរាលដាលពីសង្កាត់មួយទៅសង្កាត់មួយទៀត ។
គេបានប្រៀបធៀបសភាពការណ៍នៃភ្លើងឆេះនៅក្រុង SPOKANE ទៅនឹងភ្លើងឆេះព្រៃនៅអេស្ប៉ាញ បារាំងឬនៅឡូសអេនចឺឡេសកាលពីឆ្នាំទៅមិញនិងនៅកោះហាវ៉ៃកាលពីឆ្នាំ២០២៣ ។ ភ្លើងឆេះនៅមុខព្រួញមួយក្នុងចំណោមមុខព្រួញទាំង៣នោះ មកទាល់ពេលនេះនៅមិនទាន់គ្រប់គ្រងបាននៅឡើយ ៕
ចែករំលែកព័តមាននេះ