មន្ត្រីសុខាភិបាលរដ្ឋ Michigan បានបញ្ជាក់ពីការស្លាប់មនុស្ស២នាក់ដំបូង ដែលទាក់ទងនឹងការផ្ទុះឡើងនៃជំងឺ Cyclospora ដែលជាការឆ្លងមេរោគប៉ារ៉ាស៊ីតដែលរាលដាលតាមរយៈអាហារ ឬទឹកដែលមានមេរោគ ដែលអាចបណ្តាលឱ្យរាកធ្ងន់ធ្ងរ ។ នេះបើយោងតាមការផ្សាយរបស់ BBC News ។
អាជ្ញាធរសុខាភិបាលរដ្ឋបាននិយាយថា បុគ្គលទាំងពីរនាក់នេះ មាន «ស្ថានភាពសុខភាពធ្ងន់ធ្ងរ ដែលអាចរងផលប៉ះពាល់ដោយជំងឺស៊ីក្លូស្ព័រ និងខ្សោះជាតិទឹក» ។
យោងតាមមជ្ឈមណ្ឌលគ្រប់គ្រង និងបង្ការជំងឺ (CDC) សហរដ្ឋអាមេរិក បានឱ្យដឹងថា ជំងឺដែលឆ្លងតាមរយៈអាហារបានរីករាលដាលដល់រដ្ឋចំនួន៤៥ ដោយមានករណីជិត ៧.០០០ករណី ដែលបានបញ្ជាក់ដោយមន្ទីរពិសោធន៍ ត្រូវបានរាយការណ៍ទូទាំង
ប្រទេស ។ ខណៈពេលដែលការផ្ទុះឡើងនៃជំងឺនេះ បានឆ្លងដល់មនុស្សរាប់ពាន់នាក់ CDC និយាយថា ការស្លាប់ដោយសារជំងឺ cyclosporiasis គឺមិនមែនជារឿងធម្មតានោះទេ ព្រោះជាធម្មតាវាមិនគំរាមកំហែងដល់អាយុជីវិតនោះទេ ។
ក្រសួងសុខាភិបាលរដ្ឋ Michigan មិនបានផ្តល់ព័ត៌មានលម្អិតបន្ថែមអំពីអ្នកដែលបានស្លាប់នោះទេ ។ រដ្ឋនេះ ស្ថិតនៅចំណុចកណ្តាលនៃការផ្ទុះឡើងនៃជំងឺនេះ នាពេលបច្ចុប្បន្ន ហើយកំណត់ត្រារបស់ខ្លួនបង្ហាញថា មានករណីឆ្លងជាង១១.០០០ករណី និងមានការសម្រាកព្យាបាលនៅមន្ទីរពេទ្យចំនួន១៩៣ករណី ទោះបីជាភាគច្រើនមិនទាន់ត្រូវបានបញ្ជាក់ដោយមន្ទីរពិសោធន៍ក៏ដោយ ។
ប៉ារ៉ាស៊ីតដែលចូលចិត្តកំដៅនេះ ឆ្លងដល់ពោះវៀន ហើយត្រូវបានចម្លងតាមរយៈការចម្លងមេរោគក្នុងលាមក ។ ការផ្ទុះឡើងនៃជំងឺពីមុនបានកើតឡើងនៅពេលដែលមនុស្សទទួលទានផ្លែឈើ ឬបន្លែដែលស្រោចស្រពដោយទឹកដែលកខ្វក់ដោយលាមក ។
ចែករំលែកព័តមាននេះ