ប្រទេសជប៉ុន ៖ រដ្ឋាភិបាលជប៉ុនថ្លែង កាលពីថ្ងៃទី៤ សីហា ថា ជប៉ុនត្រូវតែសម្របខ្លួនចំពោះវិធីសាស្ត្រសង្គ្រាមថ្មី ដូចជាការប្រើដ្រូន និងបញ្ញាសិប្បនិម្មិតAI នៅអ៊ុយក្រែន និងនៅមជ្ឈឹមបូព៌ា រួចពង្រឹងឧស្សាហកម្មការពាររបស់ខ្លួន ។
ជប៉ុនបានពង្រឹងសមត្ថភាពយោធា និងបង្កើនការចំណាយក្នុងកិច្ចការពារ រយៈពេលប៉ុន្មានឆ្នាំចុងក្រោយនេះ ហើយចាប់ផ្ដើមដាក់ពង្រាយបណ្ដាមីស៊ីលបណ្ដែតរយៈឆ្ងាយ ដើម្បីទប់ទល់ចិនដែលបន្តពង្រីកសមត្ថភាពយោធារបស់ខ្លួន។ សៀវភៅស្ដីពីកិច្ចការពារមាន៥៩៨ទំព័រ ទើបត្រូវបានអនុម័តនាថ្ងៃទី៤ សីហា ដោយគណៈរដ្ឋមន្ត្រីជប៉ុនអះអាងជាថ្មីថា ចិនគឺជាការប្រឈមខាងយុទ្ធសាស្ត្រសំខាន់របស់ជប៉ុន ។ ជប៉ុនមានការការព្រួយបារម្ភចំពោះវត្តមាន និងសកម្មភាពកាន់តែខ្លាំងឡើងនៃនាវាចម្បាំងចិនក្នុងមហាសមុទ្រប៉ាស៊ីហ្វិក។
សៀវភៅសចែងទៀតថា ដោយចាប់អារម្មណ៍ចំពោះការប្រើប្រាស់ដ្រូនរបស់អ៊ុយក្រែនប្រឆាំងរុស្ស៊ីជប៉ុនយល់ថា ចាំបាច់ត្រូវសម្របខ្លួនចំពោះរូបភាពថ្មីៗនៃសង្គ្រាម។ ខណៈប្រទេសជាច្រើនកំពុងប្រណាំងប្រជែងគ្នាក្នុងការអភិវឌ្ឍដ្រូនប្រយុទ្ធ រដ្ឋាភិបាលជប៉ុនផ្ដល់អាទិភាពដល់ការផលិតបណ្ដាដ្រូនរបស់ខ្លួនផ្ទាល់ សំដៅការពារឆ្នេរសមុទ្រដោយរួមបញ្ចូលគ្នាជាមួយមីស៊ីលរយៈឆ្ងាយ។
រដ្ឋមន្ត្រីការពារប្រទេសជប៉ុនលោកស៊ីនហ្ស៊ីរ៉ូកូអ៊ីហ្សូមីធ្លាប់គូសបញ្ជាក់កាលពីដើមខែកក្កដា ថា ការផលិតដ្រូនឲ្យបានរហ័ស គឺចាំបាច់ ។ ទីភ្នាក់ងារបច្ចេកវិទ្យាយោធា និងភស្ដុភារជប៉ុន នាពេលថ្មីៗនេះ បានជ្រើសរើសក្រុមហ៊ុនផលិតដ្រូន៤ ក្នុងចំណោមក្រុមហ៊ុនផលិតដ្រូន៣៨ សម្រាប់ជាដៃគូក្នុងកម្មវិធីអភិវឌ្ឍយ៉ាងលឿនបណ្ដាដ្រូន ។ ក្រុមហ៊ុនទាំងនោះនឹងឈានដល់ដំណាក់កាលសាកល្បងដំបូងដោយកងម៉ារីនជប៉ុននាដើមខែសីហា ដើម្បីធ្វើការសម្រាំងចុងក្រោយ។
សហគ្រាសជប៉ុនជាច្រើន បច្ចុប្បន្នកំពុងផលិតដ្រូនប្រហាក់ប្រហែលគ្នានោះ ។ ក្រុមហ៊ុនTOSHIBA ប្រកាសកាលពីថ្ងៃទី៣១កក្កដា ពីបំណងរបស់ខ្លួន ផលិតរួមគ្នាដ្រូនប្រយុទ្ធជាមួយក្រុមហ៊ុនPRO DRONE ។ អាវុធគ្មានមនុស្សបើកអាចជួយជប៉ុនក្នុងការកាត់បន្ថយចំនួនកងទ័ព ក្នុងប្រទេសមួយដែលមានបញ្ហាប្រជាសាស្ត្រ ។ ទោះបីយ៉ាងណា បណ្ដាអ្នកជំនាញការយល់ថា ការផលិតដ្រូនដោយជប៉ុនខ្លួនឯងផ្ទាល់ ពេលដែលទីផ្សារដ្រូនពាណិជ្ជកម្មជប៉ុនពឹងលើការនាំចូលពីចិន គឺជាការប្រឈមដោយពិតប្រាកដមួយ ៕
ចែករំលែកព័តមាននេះ