ទីក្រុងគូឡាឡាំពួ ៖ ម៉ាឡេស៊ីបានរក្សាតំណែងរបស់ខ្លួនជាប្រទេសមានភ្ញៀវទេសចរអន្តរជាតិច្រើនជាងគេនៅក្នុងតំបន់អាស៊ីអាគ្នេយ៍ បន្ទាប់ពីទទួលស្វាគមន៍ភ្ញៀវអន្តរជាតិចំនួន ២១,១២ លាននាក់ នៅក្នុងឆមាសទី១ នៃឆ្នាំ២០២៦ ដែលកើនឡើង ២,៥% ធៀបនឹងរយៈពេលដូចគ្នា កាលពីឆ្នាំមុន។ នេះបើតាមប្រភពពីសារព័ត៌មាន VnExpress ចេញផ្សាយនៅថ្ងៃទី២ ខែសីហា ឆ្នាំ២០២៦។
យោងតាមក្រសួងទេសចរណ៍ សិល្បៈ និងវប្បធម៌របស់ប្រទេសម៉ាឡេស៊ី បានឱ្យដឹងថា ចំនួនសរុបចាប់ពីខែមករា ដល់ខែ មិថុនា ឆ្នាំ២០២៦ ក៏មានកម្រិតខ្ពស់ជាង ១៧,៧% ផងដែរ បើធៀបនឹងរយៈពេលដូចគ្នា កាលពីឆ្នាំ២០១៩ ពោលគឺនៅមុនការរីករាលដាលនៃជំងឺកូវីដ-១៩ ហើយនេះសបញ្ជាក់ឱ្យឃើញថា ការស្តារឡើងវិញនៃវិស័យទេសចរណ៍របស់ម៉ាឡេស៊ី នៅតែបន្តដំណើរការទៅមុខយ៉ាងល្អប្រសើរ។
តាមការចុះផ្សាយពីសារព័ត៌មានក្នុងស្រុក The Star បានឱ្យដឹងថា កំណើននេះ ត្រូវបានជំរុញដោយយុទ្ធនាការ «ទស្សនាម៉ាឡេស៊ី ឆ្នាំ២០២៦» (Visit Malaysia 2026) គួបផ្សំនឹងការតភ្ជាប់ក្នុងតំបន់កាន់តែរឹងមាំ គំនិតផ្តួចផ្តើមទេសចរណ៍ក្នុងស្រុក ព្រឹត្តិការណ៍អន្តរជាតិធំៗ និងការផ្សព្វផ្សាយផលិតផលទេសចរណ៍យ៉ាងទូលំទូលាយនៅទូទាំងប្រទេស។ កំណើននេះ ភាគច្រើនជំរុញដោយតម្រូវការកើនឡើខ្លាំងពីទីផ្សារអាស៊ាន ដែលស្មើនឹង ៧២,៨% នៃចំនួនភ្ញៀវមកដល់សរុប។ ប្រទេសសិង្ហបុរីនៅតែជាទីផ្សារប្រភពធំជាងគេ ដោយបានកើនឡើង ៤,៤% ខណៈពេលដែលភ្ញៀវពីទីផ្សារដែលកំពុងលេចធ្លោបានហក់ឡើងខ្លាំង រួមមាន កម្ពុជា ៥២.៣% ឡាវ ២៥.៤% និងមីយ៉ាន់ម៉ា (៤៥,៩%)។
តំបន់អាស៊ីបូព៌ា (អាស៊ីខាងកើត) បានកត់ត្រាការងើបឡើងវិញ ១២,៧% ចំណែកអាស៊ីកណ្តាលកើនឡើង ២៣,៣% ហើយអូសេអានី ៧,៤% និងទ្វីបអាមេរិក ៤,៩% ខណៈដែលដ្បិតទីផ្សារប្រភពទេសចរណ៍ជាប្រពៃណី រួមមានសិង្ហបុរី ឥណ្ឌូណេស៊ី និងចិន នៅតែស្ថិតក្នុងចំណោមប្រទេសរួមចំណែកធំបំផុត។
នៅក្នុងរយៈពេល៦ខែដំបូង នៃឆ្នាំ ២០២៦ ប្រទេសថៃ បានកត់ត្រាភ្ញៀវអន្តរជាតិចំនួន ១៦,៧ លាននាក់ ចន្លោះពីខែមករាដល់ខែមិថុនា ដែលជាការធ្លាក់ចុះ ៣,០៩% ធៀបនឹងរយៈពេលដូច គ្នាកាលពីឆ្នាំមុន។ ប្រទេសវៀតណាមទទួលបានភ្ញៀវអន្តរជាតិចំនួន ១២,៣ លាននាក់ កើនឡើង ១៤,៩% ធៀបនឹងរយៈពេលដូចគ្នា កាលពីឆ្នាំមុន។ បន្ទាប់មកគឺប្រទេសសិង្ហបុរីស្វាគមន៍ភ្ញៀវអន្តរជាតិចំនួន ៨,១២ លាននាក់ ធ្លាក់ចុះ ១,៧% ធៀបនឹងរយៈពេលដូចគ្នា កាលពីឆ្នាំមុន ដោយសារតែការថមថយពីទីផ្សារសំខាន់ៗ ដូចជាប្រទេសឥណ្ឌូណេស៊ី និងឥណ្ឌា៕
ចែករំលែកព័តមាននេះ