ដើមក្ងោកជាង២ពាន់ដើម ត្រូវបានស្ថាប័នរដ្ឋ និងវិស័យឯកជនរួមគ្នាដាំតាមដងផ្លូវបេតុង «ភ្នំពេជ្រ» ក្នុងភូមិសាស្ត្រសង្កាត់ជ្រាវ
- សៀមរាប
ខេត្តសៀមរាបះ នៅថ្ងៃទី២៩ ខែកក្កដា ឆ្នាំ ២០២៦ លោក លី សារី អភិបាលរងខេត្ត តំណាងដ៏ខ្ពង់ខ្ពស់ឯកឧត្តម ប្រាក់ សោភ័ណ អភិបាល នៃគណៈអភិបាលខេត្តសៀមរាប បានចូលរួមដាំកូនឈើក្ងោកចំនួន ២ ៥០០ ដើម តាមបណ្ដោយដងផ្លូវបេតុង “ភ្នំពេជ្រ” ស្ថិតក្នុងភូមិវាល សង្កាត់ជ្រាវ ក្រុងសៀមរាប ដែលរៀបចំ និងឧបត្ថម្ភពីភោជនីយដ្ឋានឡាហ្គូ និង មានការសហការចូលរួមដាំពីភោជ នីយដ្ឋានតាវ៉ឺន សៀមរាប និងភោជនីយដ្ឋាន ឈូក មាស ដោយមានការអញ្ជើញចូលរួមតំណាងមន្ទីរបរិស្ថាន អាជ្ញាធរសង្កាត់ជ្រាវ រួមនិងប្រជាការពារ។
លោក អភិបាលរងខេត្ត បានលើកឡើងអំពីតួនាទី និងអត្ថប្រយោជន៍នៃដើមឈើសម្រាប់មូលដ្ឋាន វិស័យទេសចរណ៍ និងជាពិសេស ដើមឈើជួយគាំពារផ្នែកបរិស្ថានដូចជាការការពារទីជម្រាល ទប់ស្កាត់ការហូរច្រោះដី ការធ្វើឱ្យប្រសើរឡើងនៃគុណភាពដី កាត់បន្ថយបម្រែបម្រួលអាកាសធាតុនិងកត្តាផ្សេងៗបន្ថែមទៀត។ ទន្ទឹមនឹងនេះ លោក ក៏បានបញ្ជាក់ថា ការដាំកូនក្ងោកនាពេលនេះ ទៅថ្ងៃខាងមុខវានឹងលូតលាស់ និងមានផ្កាទៅតាមរដូវកាល ដែលធ្វើឱ្យទីក្រុងប្រវត្តិ សាស្ត្រមួយនេះ មានសម្រស់គ្រប់រដូវកាល។
ក្នុងឱកាសនេះ លោក អភិបាលរង ក៏សូមសំណូមពរឱ្យបងប្អូនប្រជាពលរដ្ឋ និងបណ្តាក្រុមហ៊ុនទាំងអស់ ដែលនៅអមសងខាងផ្លូវសូមចូលរួមថែទាំ ស្រោចទឹក ដាក់ជី ចំពោះដើមឈើដែលមាននៅមុខគេហដ្ឋាន ឬក្រុម ហ៊ុន របស់ខ្លួន ដើម្បីឱ្យដើមឈើទាំងនោះលូតលាស់បានល្អ ដើម្បីបង្កើនសោភ័ណភាព កាត់បន្ថយការកើនឡើងកម្ដៅក្នុងទីក្រុង ព្រម ទាំងធ្វើក្រុងប្រែក្លាយជាក្រុងបៃតង។ បន្ថែមពីនេះ លោក បានអំពាវនាវដល់អាជ្ញាធរមូលដ្ឋាន ព្រះសង្ឃ មន្ត្រីរាជការ និងសិស្សនិស្សិត ប្រជាពលរដ្ឋ និងវិស័យឯកជន ក្រុមហ៊ុន អង្គការក្រៅរដ្ឋាភិបាល ចូលរួមដាំដើមឈើឱ្យបានច្រើននៅតាមវត្តអារាម ដងផ្លូវសាធារណៈ ដើម្បីជាផលប្រយោជន៍ដល់ខ្លួន ឯង ក៏ដូចជាមនុស្សជាតិទាំងមូល ស្របតាមគោលការណ៍របស់រាជរដ្ឋាភិបាល ៕
ចែករំលែកព័តមាននេះ