ប្រទេសចិន ៖ តាមប្រភពពីសារព័ត៌មានចិន Global Times កាលពីថ្ងៃទី១៦ ខែកក្កដា ឆ្នាំ២០២៦ បានរាយការណ៍ថា សត្វតោសដ៏ល្បីល្បាញលើអ៊ីនធឺណិត ឈ្មោះ អាហាំង (Ahang) ឬ ហាំងហាំង (Hang Hang) ដែលពិភពលោកស្គាល់តាមរយៈម៉ូដសក់សេះដ៏ចម្លែក និងទាក់ទាញរបស់វានោះ ត្រូវបានប្រកាសថាងាប់ហើយនៅក្នុងអាយុ១៧ឆ្នាំ។ នេះបើតាមការប្រកាសរបស់សួនសត្វទីក្រុងក្វាងចូវ (Guangzhou Zoo) ខេត្តក្វាងទុង (Guangdong) កាលពីថ្ងៃទី១៥ ខែកក្កដា កន្លងទៅ។
នៅក្នុងសេចក្តីថ្លែងការណ៍មានចំណងជើងថា លាហើយ អាហាំង ជាទីស្រឡាញ់ ដែលបានបង្ហោះលើគណនី WeChat សួនសត្វបានបញ្ជាក់ថា អាហាំង បានងាប់ដោយសារតែវ័យចាស់នៅក្នុងសួនសត្វ កាលពីថ្ងៃទី១៤ ខែកក្កដា ដែលបង្កើតភាពសោកស្តាយយ៉ាងខ្លាំងពីសំណាក់ភ្ញៀវទេសចរ និងអ្នកប្រើប្រាស់បណ្តាញសង្គម។
អាហាំង ចាប់កំណើតនៅទីក្រុងហានចូវ (Hangzhou) ខេត្តជឺជាំង (Zhejiang) ហើយឈ្មោះវាដាក់តាមឈ្មោះទីក្រុងដែលវាបានកើត។ វាបានផ្លាស់ពីទីក្រុងហានចូវ ភាគខាងកើតខេត្តជឺជាំងមកកាន់ទីក្រុងក្វាងចូវ ភាគខាងត្បូងខេត្តក្វាងដុងក្នុងឆ្នាំ ២០១៥ ដែលជាកន្លែងវារស់នៅរហូតដល់អស់ជិវិត និងបង្កើតទំនាក់ទំនងយ៉ាងជិតស្និទ្ធជាមួយទីក្រុងនេះ ក៏ដូចជាប្រជាជននៅទីនោះផងដែរ។
អាហាំង បានក្លាយជាទីចាប់អារម្មណ៍ខ្លាំងលើបណ្តាញសង្គម កាលពីឆ្នាំ ២០២២ បន្ទាប់ពីភ្ញៀវទេសចរបានចែករំលែករូប និងវីដេអូរូបរាងដ៏ប្លែករបស់វាលើអ៊ីនធឺណិត។ រោមជុំវិញក និងក្បាលដ៏ទន់រលោងរបស់វាមើលទៅដូចជា ម៉ូដសក់សេះកាត់យ៉ាងមានរបៀប បានឆក់យកបេះដូងអ្នកប្រើប្រាស់អ៊ីនធឺណិតរាប់លាននាក់យ៉ាងរហ័ស រហូតដល់មហាជនជាច្រើនបាននិយាយលេងសើចដោយក្តីស្រឡាញ់ថា «តើនរណាជាអ្នកកាត់សក់ឱ្យវា0x017d7 និង គ្មាននរណាម្នាក់ហ៊ានកាត់សក់វាទេ» ជាដើម។
តាមពិតទៅរោមជុំវិញក និងក្បាលរបស់អាហាំងគឺធម្មជាតិពិតៗ ដោយបានផ្លាស់ប្តូរទៅតាមរដូវកាល និងអាកាសធាតុ ដោយក្រៅពីម៉ូដសក់សេះ ពេលខ្លះមើលទៅសក់វាដូចជាសិតពុះកណ្តាល ហើយពេលខ្លះទៀតមើលទៅដូចម៉ូដសក់សិតទៅក្រោយ ដែលបាននាំមកនូវភាពរីករាយ និងទាក់ទាញដល់អ្នកគ្រប់គ្នា។ លើសពីនេះទៀត បើតាមការឱ្យដឹងពីសួនសត្វ អាហាំង មានអត្តចរិតស្លូតបូត ចូលចិត្តដេកហាលថ្ងៃ និងលេងទឹកភ្លៀង ដោយបានបន្សល់ទុកនូវអនុស្សាវរីយ៍ដ៏កក់ក្តៅជាច្រើនដល់ភ្ញៀវដែលចូលទស្សនាផ្ទាល់។
យោងតាមការចុះផ្សាយរបស់សារព័ត៌មានចិន Jiupai បានរាយការណ៍ថា សួនសត្វក្វាងចូវ បានបញ្ជាក់ថា ខ្លួននឹងបង្កើតរូបចម្លាក់សំរិទ្ធដើម្បីរំលឹកដល់ អាហាំង ដោយសង្ឃឹមថា អ្នកគ្រប់គ្នានឹងបន្តចងចាំនូវភាពស្និទ្ធស្នាល និងរូបភាពរីករាយជាច្រើនដែលវាបានផ្តល់ឱ្យពួកគេ៕
ចែករំលែកព័តមាននេះ