ទីក្រុងប៉េកាំង ៖ ក្រុមហ៊ុនអាកាសចរណ៍ធំៗរបស់ប្រទេសចិន កំពុងតែឈានទៅរករដូវកាលធ្វើដំណើរដ៏មមាញឹកបំផុតប្រចាំរដូវក្តៅ ប៉ុន្តែមកជាមួយទស្សនវិស័យប្រឈមខ្លាំង បន្ទាប់ពីការព្រមានអំពីការខាតបង់ធ្ងន់ធ្ងរក្នុងឆមាសទី១ នៃឆ្នាំ២០២៦ ខណៈតម្រូវការដែលកំពុងធ្លាក់ចុះ បានបង្កើតឱ្យមានមន្ទិលសង្ស័យថា តើក្រុមហ៊ុនអាចទប់ទល់នឹងការកើនឡើងតម្លៃប្រេងឥន្ធនៈ អំឡុងខែដ៏មមាញឹកបំផុតរបស់វិស័យនេះបានដែរឬទេ?
តាមប្រភពពី Reuters នៅថ្ងៃទី១៧ ខែកក្កដា ឆ្នាំ២០២៦ បានឱ្យដឹងថា ក្រុមហ៊ុន Air China, China Eastern Airlines និង China Southern Airlines កាលពីថ្ងៃទី១៤ ខែកក្កដា ឆ្នាំ២០២៦ សុទ្ធតែបានព្រមានថា ក្រុមហ៊ុនរំពឹងថានឹងមានការខាតបង់សរុបរួមគ្នាក្នុងឆមាសទី១ នៃឆ្នាំ ២០២៦ រហូតដល់ ៩ ពាន់លានយន់ ឬ ១,៣៣ ពាន់លានដុល្លារអាមេរិក។ នេះជាការខាតបង់យ៉ាងខ្លាំង ផ្ទុយពីប្រាក់ចំណេញសរុបក្នុងត្រីមាសទី១ ដែលក្រុមហ៊ុនទាំងនេះ ធ្លាប់បានកើនឡើងដោយសារតែតម្រូវការដ៏ខ្លាំងក្លា អំឡុងពិធីបុណ្យចូលឆ្នាំថ្មីប្រពៃណីចិន។
ការខាតបង់នេះ បានគូសបញ្ជាក់ពីបញ្ហាប្រឈមដ៏ពិបាកដែលក្រុមហ៊ុនអាកាសចរណ៍ចិនកំពុងជួបប្រទះ រួមមាន ការដំឡើងថ្លៃសំបុត្រដើម្បីប៉ះប៉ូវលើការចំណាយខ្ពស់នៃតម្លៃប្រេងឥន្ធនៈ, ការប្រឈមនឹងការធ្វើឱ្យតម្រូវការហោះហើរកាន់តែធ្លាក់ចុះ ខណៈពេលដែលការរក្សាទុកតម្លៃសំបុត្រឱ្យនៅទាប ដែលធ្វើឱ្យក្រុមហ៊ុនអាកាសចរណ៍ទាំងនោះត្រូវរ៉ាប់រងការចំណាយបន្ថែមដោយខ្លួនឯង។
អ្នកវិភាគរបស់ធនាគារ HSBC រំពឹងថា ក្រុមហ៊ុនអាកាសចរណ៍ធំបំផុតទាំង ៣ ខាងលើរបស់ប្រទេសចិន នឹងខាតបង់រួមគ្នាចំនួនប្រហែល ១៦,៨ ពាន់លានយន់ ឬ ២,៤៨ ពាន់លានដុល្លារអាមេរិកក្នុងឆ្នាំ២០២៦។ ការរំពឹងទុកនេះ គឺផ្ទុយស្រឡះពីការរំពឹងទុករបស់ទីផ្សារបច្ចុប្បន្ន ដែលថាក្រុមហ៊ុនទាំងនេះ នឹងទទួលបានប្រាក់ចំណេញរួមគ្នាចំនួន ១,៣ ពាន់លានយន់ ឬ ១៩២ លានដុល្លារអាមេរិក។
ក្រុមហ៊ុនអាកាសចរណ៍ Air China បានបញ្ជាក់នៅក្នុងឯកសារដាក់ជូនទីផ្សារភាគហ៊ុនថា តម្លៃប្រេងឥន្ធនៈកើនឡើងខ្ពស់បានបំផ្លាញយ៉ាងខ្លាំងដល់កម្រិតប្រាក់ចំណេញរបស់ខ្លួន៕ ប្រភព ៖ Reuters
ចែករំលែកព័តមាននេះ