អាជ្ញាធរកំពង់ស្ពឺ ក្រើនរំលឹកកសិករពីវិធានការទប់ទល់នឹងគ្រោះរាំងស្ងួតបង្កដោយបាតុភូតធម្មជាតិ អែលនីញ៉ូ
- កំពង់ស្ពឺ
ខេត្តកំពង់ស្ពឺ៖ អាជ្ញាធរខេត្តកំពង់ស្ពឺ បានប្រាប់ដល់ប្រជាកសិករទាំងអស់ដែលបាននិងកំពុងបង្កបង្កើនផលដំណាំគ្រប់ប្រភេទនៅទូទាំងក្រុង-ស្រុក ត្រូវត្រៀមលក្ខណៈឱ្យបានស្រេចដើម្បីបង្ការទប់ស្កាត់បាតុភូតធម្មជាតិដែលមានឈ្មោះ អែលនីញ៉ូ (El Niño) ដែលនឹងបង្កឱ្យមានផលប៉ះពាល់ដល់ដំណាំកសិកម្មគ្រប់ប្រភេទ។
បាតុភូត អែលនីញ៉ូ(El Niño) នឹងកើតមានឡើងនៅក្នុងភូមិសាស្ត្រខេត្តកំពង់ស្ពឺ ហើយបាតុភូតនេះបង្កជាការកើនឡើងខ្ពស់នូវសីតុណ្ហភាព ភ្លៀងធ្លាក់មិនទៀងទាត់ ពិសេស គ្រោះរាំងស្ងួត ដែលអាចបង្កផលប៉ះពាល់ដល់វិស័យកសិកម្ម ដូចជាការបង្កបង្កើនផលដំណាំស្រូវ ការដាំដុះ ដំណាំផ្សេងៗ ព្រមទាំងការចិញ្ចឹមសត្វជាដើម។
ដើម្បីត្រៀមបង្ការ គ្រប់គ្រង និងកាត់បន្ថយផលប៉ះពាល់ដោយ បាតុភូតអែលនីញ៉ូ (El Niño) អាជ្ញាធរខេត្តកំពង់ស្ពឺ បានធ្វើការណែនាំនូវវិធានការមួយចំនួនដើម្បីឱ្យប្រជាកសិករត្រៀមឱ្យបានស្រេចក្នុងការទប់ទល់នឹងស្ថានការណ៍នេះ ប្រជាកសិករត្រូវ តាមដានការព្យាករណ៍អាកាសធាតុ និងសេចក្តីជូនដំណឹងពីអាជ្ញាធរពាក់ព័ន្ធជាប្រចាំ, រៀបចំផែនការដាំដុះឱ្យស្របទៅតាមស្ថានភាពទឹក, ប្រើប្រាស់ប្រព័ន្ធស្រោចស្រពបែបសន្សំសំចៃទឹកក្នុងដំណើរការផលិតកម្ម រក្សាទឹកដើម្បីប្រើប្រាស់នៅពេលចាំបាច់, អនុវត្តការដាំដុះដោយប្រើប្រាស់ជីកំប៉ុស្ត ដែលអាចថែរក្សាសំណើមដីបានល្អ, ជ្រើសរើសពូជដំណាំដែលមានភាពធន់ អាយុកាលលូតលាស់ខ្លី ឆាប់ប្រមូលផល, ចិញ្ចឹមសត្វដោយអនុវត្តទៅតាមគោលការណ៍ជីវសុវត្ថិភាព ធ្វើវ៉ាក់សាំងឱ្យបានត្រឹមត្រូវ និង ធ្វើអនាម័យជាប្រចាំ, សហការជាមួយមន្ត្រីជំនាញ មន្ត្រីកសិកម្មឃុំ សង្កាត់ សហគមន៍កសិកម្ម និងអាជ្ញាធរ មូលដ្ឋាន ដើម្បីទទួលបានបច្ចេកទេស និងការងារចាំបាច់នានា ៕
ចែករំលែកព័តមាននេះ