ទីក្រុងតេអេរ៉ង់៖ បញ្ហាជម្លោះរវាងអាមេរិក និងអ៊ីរ៉ង់រាលដាលកាន់តែខ្លាំង។ បន្ទាប់ពីច្រកសមុទ្រហ័រម៉ូសត្រូវបានប្រកាសបិទទ្វារជាស្ថាពរ ឥឡូវនេះ ដល់វេនសមុទ្រក្រហមវិញម្ដង។ ថ្ងៃនេះ អ៊ីរ៉ង់ស្នើសុំឱ្យក្រុមឧទ្ទាមហ៊ូទីនៅប្រទេសយេម៉េនត្រៀមខ្លួនបិទសមុទ្រក្រហមថែមទៀត។ ប្រសិនបើដូច្នេះមែន ការផ្គត់ផ្គង់ថាមពល និងទំនិញទូទាំងសាកលលោកប្រាកដជាជួបវិបត្តិធំជាមិនខាន។ គម្រោងបិទច្រកសមុទ្រនេះត្រូវបានពិភាក្សាគ្នាយ៉ាងផុលផុសនៅក្នុងចំណោមថ្នាក់ដឹកនាំធំៗនៅអ៊ីរ៉ង់ ហើយបានបញ្ជូនដំណឹងនេះទៅក្រុមហ៊ូទីរួចហើយ។ ប្រសិនបើអាមេរិកហ៊ានតែវាយប្រហាររោងចក្រអគ្គិសនីអ៊ីរ៉ង់ពេលណា ក្រុមហ៊ូទីត្រូវបិទសមុទ្រក្រហមពេលនោះ។ នេះបើយោងតាមប្រភពបីនាក់ដែលបង្ហើបរឿងនេះប្រាប់អ្នកសារព័ត៌មាន។
ប្រភពពីរដ្ឋាភិបាលអ៊ីរ៉ង់ដដែលបង្ហើបឱ្យដឹងថាក្រុមហ៊ូទីបានទទួលដំណឹងនេះរួចហើយបន្ទាប់ពីលោកដូណាល់ត្រាំព្រមានម្ដងជាពីរដងថានឹងវាយកម្ទេចទីតាំងផលិតអគ្គិសនីរបស់អ៊ីរ៉ង់ប្រសិនបើពួកគេមិនព្រមចូលតុចរចានៅសប្ដាហ៍ក្រោយ។ ប្រភពដែលស្និទ្ធនឹងក្រុមហ៊ូទីបង្ហើបឱ្យដឹងថាក្រុមនេះបានត្រៀមលក្ខណៈសម្បត្តិរួចហើយដើម្បីវាយប្រហារកប៉ាល់ដឹកទំនិញដែលបើកកាត់សមុទ្រក្រហម។ ពួកគេដាក់ពង្រាយគ្រាប់មីស៊ីល និងដ្រូននៅក្បែរច្រកបាប អែលម៉ាន់ដេប (Bab el-Mandeb) ដែលជាច្រកទ្វារឆ្ពោះទៅរកសមុទ្រក្រហម ហើយស្ថិតនៅតំបន់ខ្ពង់រាបទល់មុខទីក្រុងហូដេដា និងឈូងសមុទ្រអេដេន (Aden)។ ពួកគេកំពុងរង់ចាំបញ្ជាដើម្បីចេញប្រតិបត្តិការ។
ប្រសិនបើមានអ្វីមិនស្រួលកើតឡើងនៅសមុទ្រក្រហម និងច្រកទ្វារបាប អែលម៉ាន់ដេប វារឹតតែបន្ថែមបញ្ហាកាន់តែធ្ងន់ធ្ងរ។ ការដឹកជញ្ជូនថាមពល (ប្រេងឆៅ និងហ្គាស) នឹងមានបញ្ហាធំ។ ដោយសារច្រកហ័រម៉ូសបិទជិតឈឹងទៅហើយ ហើយប្រសិនបើក្រុមហ៊ូទីវាយប្រហារកប៉ាល់ដឹកប្រេង ឬវាយប្រហារកំពង់ផែនានានៅសមុទ្រក្រហម ពេលនោះច្រកផ្លូវសម្រាប់ដឹកជញ្ជូនប្រេងធំៗទាំង២នឹងត្រូវរងការរំខាននៅក្នុងពេលដំណាលគ្នា។ ហេតុនេះ វាជាការបើកសមរភូមិថ្មីទាំងសមរភូមិថាមល និងសមរភូមិប្រដាប់អាវុធរវាងអ៊ីរ៉ង់ និងអាមេរិក។ ប្រភពដែលស្និទ្ធនឹងក្រុមហ៊ូទីប្រាប់ថាក្រុមអ្នកតំណាងរបស់ឆ្មាំបដិវត្តឥស្លាមដែលកំពុងស្ថិតនៅប្រទេសយេម៉េនជាអ្នកសម្រេចថាក្រុមហ៊ូទីត្រូវបិទច្រកបាប អែលម៉ាន់ដេបនៅពេលណា។
ស្ថានការណ៍នៅមជ្ឈិមបូព៌ាចាប់ផ្ដើមឡើងកម្ដៅកាន់តែខ្លាំងនៅពេលក្រុមហ៊ូទីបាញ់មីស៊ីលជាច្រើនគ្រាប់ដាក់ប្រទេសអារ៉ាប៊ីសាអូឌីតបន្ទាប់ពីពួកគេចោទប្រកាន់ថាអារ៉ាប៊ីសាអូឌីតបានវាយប្រហារព្រលានយន្តហោះមួយកន្លែងដែលស្ថិតក្រោមការគ្រប់គ្រងរបស់ហ៊ូទីកាលពីថ្ងៃចន្ទ។ ដូច្នេះបទឈប់បាញ់រវាងភាគីទាំង២រយៈពេលបួនឆ្នាំកន្លងទៅនេះបានឈានដល់ទីបញ្ចប់ហើយ។ អ្នកវិភាគយល់ថាជម្លោះរវាងហ៊ូទី និងអារ៉ាប៊ីសាអូឌីតកើតឡើងនៅក្នុងកាលៈទេសៈអាក្រក់។ ប្រសិនបើការប្រយុទ្ធគ្នាផ្ទុះឡើងកាន់តែខ្លាំង ហើយរាលដាលទៅដល់ហេដ្ឋារចនាសម្ព័ន្ធសម្រាប់ស្តុកទុកទំនិញដឹកជញ្ជូនកាត់សមុទ្រក្រហម ឬក៏រាលដល់ទៅដល់ការដឹកជញ្ជូន ពេលនោះ ច្រកផ្លូវដែលនៅសេសសល់តែមួយគត់សម្រាប់ការដឹកជញ្ជូន (នៅពេលអត់ពីច្រកហ័រម៉ូសទៅ) នឹងរងការគំរាមកំហែងយ៉ាងខ្លាំង។
ប្រភព២នាក់ដែលមានទំនាក់ទំនងជិតស្និទ្ធជាមួយរដ្ឋាភិបាលអារ៉ាប៊ីសាអូឌីតប្រាប់ថាប្រទេសនេះយកចិត្តទុកដាក់ខ្ពស់ចំពោះការគំរាមកំហែងពីសំណាក់អ៊ីរ៉ង់ និងក្រុមហ៊ូទី។ អារ៉ាប៊ីសាអូឌីតដឹងច្បាស់ថាក្រុមហ៊ូទី និងអ៊ីរ៉ង់កំពុងសហការគ្នាយ៉ាងជិតស្និទ្ធនៅសមុទ្រក្រហមដើម្បីធ្វើសកម្មភាពអ្វីម៉្យាង។ គេសង្កេតឃើញថាប្រេងឆៅដែលធ្លាប់ដឹកកាត់ច្រកហ័រម៉ូសភាគច្រើនត្រូវបង្វែរទិសដៅទៅបញ្ជូនកាត់សមុទ្រក្រហមវិញម្ដងនៅពេលហ័រម៉ូសមានបញ្ហា។ ប្រេងភាគច្រើនបង្ហូរកាត់តាមបំពង់បង្ហូរប្រេងរបស់អារ៉ាប៊ីសាអូឌីត។ សមុទ្រក្រហមសព្វថ្ងៃនេះដឹកជញ្ជូនថាមពល៧%ទៅកាន់ទីផ្សារពិភពលោក៕ ប្រភព៖ Reuters
ចែករំលែកព័តមាននេះ