សហរដ្ឋអាមេរិក ៖ Sir David Beckham ត្រូវបានរាយការណ៍ថា អាចរកចំណូលបានជាង ២៣លានដុល្លារអាមេរិកពីការបង្ហាញខ្លួននៅក្នុងកម្មវិធីពាណិជ្ជកម្ម អំឡុងពេលវគ្គសម្រាកផឹកទឹក (Hydration Break) នៅក្នុងការប្រកួត World Cup ឆ្នាំ ២០២៦។
នៅក្នុងព្រឹត្តិការណ៍ World Cup ឆ្នាំ ២០២៦ អាជ្ញាកណ្តាលនឹងផ្អាកការប្រកួតនៅនាទីទី ២២ នៃវគ្គនីមួយៗ ហើយអំឡុងពេលសម្រាកដែលបានកំណត់ទាំងនេះ កីឡាករនៃក្រុមទាំងសងខាងត្រូវបានអនុញ្ញាតឱ្យចាកចេញពីទីលានរយៈពេល ៣ នាទី ដើម្បីបំពេញជាតិទឹក។ បទបញ្ជាថ្មីនេះត្រូវបានអនុវត្តចំពោះការប្រកួតទាំង ១០៤ លើក ដោយមិនគិតពីលក្ខខណ្ឌអាកាសធាតុ ឬសីតុណ្ហភាពឡើយ។
ខណៈពេលដែលការសម្រាកនេះធ្វើឱ្យទស្សនិកជនមួយចំនួនមានការខកចិត្ត វាក៏បានបង្ហាញឱ្យឃើញពីផលចំណេញយ៉ាងច្រើនសម្រាប់មនុស្សមួយចំនួនតូច ភាគច្រើនគឺអតីតកីឡាករឆ្នើមក្រុមជម្រើសជាតិអង់គ្លេស David Beckham។ អំឡុងពេលការប្រកួតនីមួយៗ នៅពេលដែលប៉ុស្តិ៍ទូរទស្សន៍ផ្លាស់ប្តូរទៅចាកផ្សាយពាណិជ្ជកម្មនៅក្នុងម៉ោងសម្រាកបញ្ចប់វគ្គទី១ ឬអំឡុងពេលសម្រាកផឹកទឹកទាំង២លើកនោះ Beckham អាចបង្ហាញខ្លួននៅក្នុងពាណិជ្ជកម្មខុសៗគ្នារហូតដល់ទៅ ៣។ លោកគឺជាតំណាងនៃយុទ្ធនាការផ្សព្វផ្សាយសម្រាប់ម៉ាកយីហោលំដាប់ពិភពលោកធំៗ រួមមាន Home Depot, McDonald’s, Stella Artois, Verizon, Adidas, Bank of America, Pepsi និង Lay’s។
តាមសារព័ត៌មាន Globo យ៉ាងហោចណាស់មានម៉ាកយីហោចំនួន ៨ បានប្រើប្រាស់រូបភាពរបស់អតីតខ្សែបម្រើឆ្នើមជំនាញទាត់បាល់ហ្វ្រីឃីកវ័យ៥១ឆ្នាំរូបនេះក្នុងការផ្សាយពាណិជ្ជកម្មលើទូរទស្សន៍របស់សហរដ្ឋអាមេរិក។ សារព័ត៌មានប្រេស៊ីលមួយនេះបានប៉ាន់ប្រមាណថា កិច្ចសន្យាផ្សព្វផ្សាយពាណិជ្ជកម្មដ៏រកចំណូលបានច្រើនទាំងនេះ បាននាំមកនូវប្រាក់ចំណូលឱ្យ Beckham ប្រហែល ២៣ លានដុល្លារអាមេរិក។ អ្នកវិភាគខ្លះបានលើកឡើងថា ប្រាក់ចំណូលនោះថែមទាំងអាចឡើងដល់ប្រហែល ២៥ លានដុល្លារទៀតផង។
យោងតាមសារព័ត៌មាន The Telegraph បានឱ្យដឹងថា ឥទ្ធិពលពាណិជ្ជកម្មដ៏ខ្លាំងក្លានេះ ជាភស្តុតាងនៃឥទ្ធិពលដ៏ធំធេងដែល Beckham បានបង្កើតឡើងនៅទឹកដីសហរដ្ឋអាមេរិក ចាប់តាំងពីបានចូលរួមជាមួយក្លិប LA Galaxy ក្នុងឆ្នាំ ២០០៧។ បើទោះបីជាបានចូលនិវត្តន៍ពីអាជីពបាល់ទាត់នៅក្នុងឆ្នាំ ២០១៣ ក៏ដោយ ក៏លោកនៅតែជាបុគ្គលម្នាក់ក្នុងចំណោមបុគ្គលជោគជ័យបំផុតផ្នែកពាណិជ្ជកម្មក្នុងវិស័យកីឡានេះ។ ដោយសារតែឧស្សាហកម្មផ្សាយពាណិជ្ជកម្មរបស់សហរដ្ឋអាមេរិកមានការចំណាយប្រាក់ខ្ពស់លើការផ្សាយពាណិជ្ជកម្មតាមទូរទស្សន៍ដែលមានទម្រង់លេចធ្លោនោះ Beckham ត្រូវបានគេមើលឃើញថា គឺជាជម្រើសដ៏ត្រឹមត្រូវ និងមានប្រសិទ្ធភាពក្នុងការបង្ហាញម៉ាកយីហោទៅកាន់ទស្សនិកជនដ៏ច្រើនសន្ធឹកសន្ធាប់លើពិភពលោក។
នៅក្នុង World Cup ឆ្នាំ២០២៦ លោក Beckham មិនបានធ្វើការជាអ្នកអត្ថាធិប្បាយ ហើយក៏គ្មានកិច្ចសន្យាផ្លូវការណាមួយជាមួយសហព័ន្ធបាល់ទាត់ពិភពលោក FIFA នោះទេ។ មន្ត្រីជាន់ខ្ពស់ម្នាក់របស់ FIFA បញ្ជាក់ថា ស្ថាប័នបាល់ទាត់ពិភពលោកគ្មានទំនាក់ទំនងពាណិជ្ជកម្មជាមួយលោកឡើយ បើទោះបីជាលោកមានវត្តមាននៅក្នុងការផ្សាយរបស់សហរដ្ឋអាមេរិកយ៉ាងណាក៏ដោយ។
គួរបញ្ជាក់ថា កាលពីពាក់កណ្តាលខែឧសភាកន្លងទៅ Sir David Beckham បានឈានដល់ការសម្រេចផ្នែកហិរញ្ញវត្ថុដ៏សំខាន់មួយ ដោយបានក្លាយជាអត្តពលិក ឬអតីតអត្តពលិកជនជាតិអង់គ្លេសដំបូងគេបង្អស់ ដែលមានទ្រព្យសម្បត្តិសុទ្ធកើនលើស ១ ពាន់លានផោន ឬ ១,៣ ពាន់លានដុល្លារអាមេរិក។ នេះបើតាមបញ្ជីរបស់កាសែត The Sunday Times ៕ ប្រភព ៖ VnExpress
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ