បញ្ហាព្រំដែននិងកង្វះទីផ្សារ ធ្វើឲ្យកសិករចិញ្ចឹមសត្វកណ្ដូបនៅតាមបណ្ដាស្រុកជាប់ព្រំដែនមួយចំនួនធំបោះបង់
- បាត់ដំបង
ខេត្តបាត់ដំបង ៖ ប្រជាកសិករដែលមានមុខរបរចិញ្ចឹមសត្វកណ្ដូបលក់ ចន្លោះពី៦០ទៅ៧០% នៅតាមបណ្ដាស្រុកភាគខាងលិចនៃខេត្តបាត់ដំបង ជាប់ព្រំដែនកម្ពុជា-ថៃ បាននិងកំពុងបោះបង់មុខរបរបន្ទាប់បន្សំប្រចាំថ្ងៃមួយនេះ ព្រោះតែបញ្ហា «ជម្លោះព្រំដែន» និង «កង្វះទីផ្សារ» ។ នេះបើតាមការត្អូញត្អែររបស់កសិករ ដែលមានមុខរបរចិញ្ចឹមសត្វកណ្ដូបលក់ ។
កាលពីចុងសប្ដាហ៍មុន គេសង្កេតឃើញនៅតាមកសិដ្ឋាន ឬទ្រុងចិញ្ចឹមសត្វកណ្ដូបលក់ជាលក្ខណៈគ្រួសាររបស់ប្រជាកសិករនៅតាមបណ្ដាមូលដ្ឋាននានា ត្រូវបានរុះរើចោល ។ រីឯ នៅតាមទីតាំងដែលចិញ្ចឹមកណ្ដូបមានលក្ខណៈទ្រង់ទ្រាយធំដុំដូចកសិដ្ឋាន គេឃើញមាននៅសេសសល់ត្រឹមចន្លោះពី៣ ទៅ៤ទ្រងប៉ុណ្ណោះ ខណៈរាប់សិបទ្រុងទៀត ត្រូវបានរុះរើ ឬបិទចោលតែម្ដងដែលខុសស្រឡះពីឆ្នាំមុនៗ ដែលប្រជាកសិកររបស់នៅតាមតំបន់ព្រំដែន ហាក់មានការប្រកួតប្រជែងយ៉ាងកុះករក្នុងមុខរបរចិញ្ចឹមសត្វកណ្ដូបនេះ ។
ក្នុងស្ថានភាពយ៉ាងស្ងប់ស្ងាត់ កសិដ្ឋានចិញ្ចឹមសត្វកណ្ដូបដ៏វែងអន្លាយ មើលភ្ជាប់ទៅកាន់ជើងភ្នំដ៏ខៀវស្រងាត់គួរជាទីគយគន់ ខណ្ឌចែកជាកំណាត់ៗ បាំងបិទដោយដំបូលប្លាស្ទិកពណ៌.ស (ទ្រុង) ប្រមាណ២៥ទ្រុង គ្រប់គ្រង់ដោយកសិករម្នាក់ ដែលមានប្រវត្តិជោគជ័យ នៃមុខរបរចិញ្ចឹមសត្វកណ្ដូបនេះ ទើបបានប្រមាណពី២-៣ឆ្នាំមុននេះសោះ ក៏ស្រាប់តែមកចាប់ផ្ដើមដើរអូសជើងយ៉ាងលំបាកភ្លាមរំពេច នៅក្នុងឆ្នាំនេះ(២០២៦) ដែលមិននឹកស្មានដល់ ។
ជួបជាមួយកោះសន្តិភាព កាលពីចុងសប្ដាហ៍មុននេះ លោក រឿន សារិន ធ្លាប់តែជោគជ័យកាលពី២-៣ឆ្នាំមុន ក្នុងមុខរបរចិញ្ចឹមសត្វកណ្ដូប បានបង្ហាញក្ដីអស់សង្ឃឹមនៅចំពោះមុខកសិដ្ឋានចិញ្ចឹមកណ្ដូបដ៏វែងអន្លាយរបស់គាត់ ។ «កន្លែងចិញ្ចឹមកណ្ដូបខ្ញុំមួយជួរដ៏វែងនេះមានសរុបទាំងអស់ចំនួន២៥ទ្រុង ប៉ុន្តែពេលនេះ ខ្ញុំចិញ្ចឹមសល់តែ០៤ទ្រុងទេ គ្រាន់ធ្វើពូជ ហើយវាទើបនឹងញាស់បាន២-៣ថ្ងៃនេះឯង» ។ នេះជាការលើកឡើងរបស់កសិករ រឿន សារិន ដែលមានទីតាំងចិញ្ចឹមកណ្ដូបធំនិងច្រើនជាងគេនៅភូមិភ្នំប្រាំពីរ ឃុំបួរ ស្រុកភ្នំព្រឹក ។
លោក រឿន សារិន បាននិយាយថា លោកទើបធ្វើទីតាំងថ្មីចំនួន២៥ទ្រុង ខណៈដែលទីតាំងចាស់ដែលមានទំហំប្រហាក់ប្រហែលគ្នាដែរ ត្រូវរុះរើចោលដោយសារចាស់ទ្រុឌទ្រម ។ ប៉ុន្តែបន្ទាប់ពីធ្វើទ្រុងថ្មីមិនបានប៉ុន្មានខែផង ក៏ស្រាប់តែទីផ្សារកណ្ដូបបានធ្លាក់ចុះយ៉ាងគំហុក ធ្វើឲ្យអ្នកចិញ្ចឹមកណ្ដូបស្ទើររគ្រប់ទីកន្លែងលក់ចេញយ៉ាងលំបាក ធ្វើឲ្យកសិករខ្លះបង្ខំចិត្តបោះបង់ការចិញ្ចឹម រហូតរុះរើទ្រុងចោលតែម្ដង ។ កោះសន្តិភាព៖ បើតាមលោកដឹង តើមូលហេតុចម្បងអ្វីខ្លះ ដែលនាំឲ្យអ្នកចិញ្ចឹមកណ្ដូបត្រូវបោះបង់មុខរបរនេះ រហូតសម្រេចចិត្តរុះរើទ្រុងចោលថែមទៀត ?
លោក រឿន សរិន៖ «ខ្ញុំជាឈ្មួញកណ្ដាលដើរទិញពីអ្នកចិញ្ចឹមផ្ទាល់ផង ចិញ្ចឹមខ្លួនឯងយ៉ាងច្រើនផង ។ ដូច្នេះ បើតាមការកត់សម្កាល់ជាក់ស្ដែងរបស់ខ្ញុំ ដែលខ្ញុំរកស៊ីមុខរបរនេះ គឺមានបញ្ហា០២សំខាន់ ដែលធ្វើឲ្យកសិករបង្ខំចិត្តបោះបង់មុខរបរចិញ្ចឹមកណ្ដូបនេះ» ។ ឈ្មួញកណ្ដាលរូបនេះ បានពន្យល់អំពីបញ្ហាទាំង០២នោះដូច្នេះថា ទី១-«បញ្ហាជម្លោះព្រំដែនមិនទៀតទាត់» ទី២-«កង្វះទីផ្សារ»។ នេះជាដើមចមសំខាន់បំផុត ដែលធ្វើឲ្យកសិករនានានៅតាមតំបន់ព្រំដែនបាត់បង់ទំនុកចិត្តក្នុងការចិញ្ចឹមកណ្ដូបលក់ ព្រោះខ្លាចរត់ចោលកណ្ដូបពេញៗទ្រុងដូចឆ្នាំទៅមិញទៀត ។
ចំពោះទីផ្សារកណ្ដូបវិញ បើតាមលោក រឿន សារិន បានលើកឡើងថា កាលពីឆ្នាំទៅមិញ ទីផ្សារកណ្ដូបមានតំលៃល្អ ។ ឈ្មួញកណ្ដាលនាំទៅកាន់ភ្នំពេញ ទៅបាត់ដំបង និងប៉ោយប៉ែតជាពិសេស ។ កាលនោះ តម្លៃកណ្ដូបដែលដើរទិញពីអ្នកចិញ្ចឹមផ្ទាល់ ក្នុង០១គីឡូ ថ្លៃចន្លោះពី២០,០០០រៀល ដល់២៥,០០០រៀល ឬអាចលើសពីនេះក៏មាន ។ ប៉ុន្តែសព្វថ្ងៃនេះ ទីផ្សារនៅក្រុងប៉ោយប៉ែត ដែលសំខាន់ជាងទីផ្សារនានា«គ្មានទេ» រំពឹងតែលើទីផ្សារនៅបាត់ដំបង និងនៅភ្នំពេញបន្តិចបន្តួចប៉ុណ្ណោះ ។
សព្វថ្ងៃនេះ តំលៃកណ្ដូបទិញពីអ្នកចិញ្ចឹមផ្ទាល់ត្រឹមតែចន្លោះពី១៣,០០០រៀល ដល់ ១៥,០០០រៀលតែប៉ុណ្ណោះ ។ ហើយតម្លៃនេះ ថោកណាស់សម្រាប់ទាំងអ្នកចិញ្ចឹម និង ទាំងឈ្មួញកណ្ដាល ស្ទើរតែមិនអាចកាត់កងសោរហ៊ុយដឹក ជញ្ជូន ឬចំណាយលើថ្លៃឈ្មួលអ្នកថែមទាំ ហើយបើមានផ្ទុះជម្លោះព្រំដែនទៀត ខូចខាតកាន់តែធ្ងន់ធ្ងរ គឺ «រត់ចោលកណ្ដូបពេញៗទ្រុង»តែម្ដង ។
មិនខុសពីការលើកឡើងរបស់កសិករ រឿន សារិន ប៉ុន្មានទេ ។ អ្នកចិញ្ចឹមកណ្ដូបលក់ជាអាជីពនៅជាប់តំបន់ព្រំដែនដទៃៗទៀត ក៏បានលើកឡើងប្រហាក់ប្រហែលគ្នានេះដែរ ។ កោល ភុត អៀង ជាកសិករចិញ្ចឹមកណ្ដូបចាស់វស្សាម្នាក់ដែរ នៅស្រុកសំពៅលូន បានប្រាប់កោះសន្តិភាពតាមទូរស័ព្ទថា កន្លងមក លោកចិញ្ចឹមកណ្ដូបជាង១០ទ្រុង ។ ហើយកាលចាប់ផ្ដើមចិញ្ចឹមកាលដំបូងៗ លក់បានថ្លៃរហូតជាង៣០,០០០រៀលក្នុង០១គីឡូ អាចដោះស្រាយជីវភាពប្រចាំថ្ងៃក្នុងគ្រួសារបានគ្រាន់បើដែរ ។ ប៉ុន្តែសព្វថ្ងៃនេះ លោកបានរុះរើទ្រុងចោលស្ទើរអស់ហើយ ព្រោះគ្មានទីផ្សារ ។
ម្យ៉ាងរឿងជម្លោះព្រំដែនខ្មែរ-ថៃ មួយថ្ងៃកាត់មួយថ្ងៃកោ មិនទៀងទាត់បែបនេះ ខ្លាចរត់ចោលកណ្ដូបដូចឆ្នាំទៅមិញ ។ ដូច្នេះហើយលោកទុកតែ០២ទ្រុងទេ ចិញ្ចឹមគ្រាន់ធ្វើពូជ ។ ដោយឡែក កសិករ រឿន សារិន ក៏ដូចគ្នាដែរ ដោយបានបញ្ជាក់ប្រាប់ថា កន្លងទៅ លោកចិញ្ចឹមកណ្ដូបចំនួន២៥ទ្រុងពេញ តែពេលនេះនៅសល់តែងត្រិម០៤ទ្រុងទេ ទុកគ្រាន់ធ្វើពូជប្រសិនបើស្ថានភាពព្រំដែនល្អប្រសើរ ហើយទីផ្សារល្អឡើងវិញ ដូចបណ្ដាឆ្នាំមុនៗ ៕
ចែករំលែកព័តមាននេះ