រាជធានីភ្នំពេញ ៖ ថ្មីៗនេះមានការបង្ហោះផ្សព្វផ្សាយនៅតាមបណ្តាញសង្គម មានករណីយុវជនជំទង់ៗមួយចំនួននៅ តែងបង្កភាពរញ៉េរញ៉ៃ និងមានពាក់កាតប៉ូលិសព្រហ្មទណ្ឌ CID នៅម្តុំវត្តបុទុមវត្តី។ ចំពោះករណីនេះដែរ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ សូមបញ្ជាក់ឱ្យថា បើយោងតាមការស្រាវជ្រាវរបស់អធិការដ្ឋាននគរបាលខណ្ឌដូនពេញ រូបភាពដែលបានផ្សព្វផ្សាយនោះជារូបភាពចាស់ កាលពីអំឡុងដើមឆ្នាំ២០២៥ កម្លាំងជំនាញ និងប៉ុស្តិ៍នគរបាលរដ្ឋបាលចតុមុខ នៃអធិការដ្ឋាននគរបាលខណ្ឌដូនពេញ បានសហការជាមួយកម្លាំងការិយាល័យនគរបាលព្រហ្មទណ្ឌកម្រិតស្រាល រាជធានីភ្នំពេញ ធ្វើការបង្ក្រាបក្រុមក្មេងទំនើង វាយគ្នានៅចំណុមុខសួនច្បារវត្តបុទុមវត្តី ។
ក្រុមការងារព័ត៌មាន និងប្រតិកម្មរហ័ស បានបន្តថា ក្នុងពេលប្រតិបត្តការបង្ក្រាបនោះដែរ សមត្ថកិច្ចបានពិនិត្យឃើញមានក្រុមយុវជន ដែលមានពាក់កាត CID ទើបសមត្ថកិច្ចដកហូតកាត និងធ្វើកិច្ចសន្យា ដោយមានការធានាពី អាណាព្យាបាល ដើម្បីនាំយកពួកគេទៅអប់រំបន្ត ទើបសមត្ថកិច្ចបានអនុញ្ញាតឱ្យពួកគេខាងលើត្រឡប់ទៅផ្ទះវិញ ។
ក្រុមការងារព័ត៌មាន និងប្រតិកម្មរហ័ស បន្តទៀតថា ដោយឡែកក្រុមក្មេងទំនើងដែលវាយគ្នានៅលើសួនច្បារវត្តបុទុមវត្តី បានបញ្ជូនទៅការិយាល័យនគរបាលព្រហ្មទណ្ឌកម្រិលស្រាល យកទៅតាមផ្លូវច្បាប់រួចហើយ ។
បច្ចុប្បន្ន សមត្ថកិច្ចជំនាញអធិការដ្ឋាននគរបាលខណ្ឌដូនពេញ នៅតែបន្តពិនិត្យតាមដានចំពោះមុខសញ្ញាក្មេងទំនើង ក៏ដូចជាមុខសញ្ញា ដែលសមត្ថកិច្ចអប់រំកន្លងមក ក្នុងករណីមិនរាងចាល បើឃើញមានសកម្មភាព នឹងអនុវត្តតាមជំនាញចំពោះមុខរបស់សមត្ថកិច្ច ៕
ចែករំលែកព័តមាននេះ