អន្តរជាតិ ៖ តម្លៃប្រេងឆៅ Brent ដែលជាស្តង់ដាពិភពលោក បានធ្លាក់ចុះជាង ២% នៅថ្ងៃទី២២ ខែមិថុនា ឆ្នាំ២០២៦ បន្ទាប់ពីកិច្ចចរចារវាងសហរដ្ឋអាមេរិក-អ៊ីរ៉ង់ បញ្ចប់នៅក្នុងប្រទេសស្វីស ដោយភាគីអ៊ីរ៉ង់បានអះអាងថា ខ្លួនទទួលបានការលើកលែងសម្រាប់ការនាំចេញប្រេង និងគីមីឥន្ធនៈ ដែលជួយកាត់បន្ថយការព្រួយបារម្ភអំពីកង្វះការផ្គត់ផ្គង់នៅក្នុងទីផ្សារសកលលោក។ នេះបើតាមប្រភពពី Reuters បានចេញផ្សាយ។
ប្រេងឆៅ Brent បានធ្លាក់ចុះ ១,៦៣ ដុល្លារអាមេរិក ឬ ២,០២% មកនៅត្រឹម ៧៨,៩៤ ដុល្លារអាមេរិកក្នុង១បារ៉ែល គិតត្រឹមម៉ោង ១ និង ៣០ នាទីរសៀល (ម៉ោងនៅកម្ពុជា)។ តម្លៃប្រេង Brent បានហក់ឡើងដល់ ៨២,៣០ ដុល្លារ នៅពេលចាប់ផ្តើមការជួញដូរនៅថ្ងៃទី២២ ខែមិថុនា ឆ្នាំ២០២៦ ដោយសារតែការចាប់ផ្តើមដ៏រអាក់រអួលនៃកិច្ចចរចា រួមជាមួយការគំរាមកំហែងពីប្រធានាធិបតីអាមេរិក លោក ដូណាល់ ត្រាំ (Donald Trump) ក្នុងការចាប់ផ្តើមសង្គ្រាមឡើងវិញជាមួយអ៊ីរ៉ង់ និងការប្រកាសរបស់អ៊ីរ៉ង់ថាបានបិទច្រកសមុទ្រ ហ័រមូស (Hormuz) ម្តងទៀត។ រីឯតម្លៃប្រេងឆៅ West Texas Intermediate (WTI) របស់សហរដ្ឋអាមេរិកឯណោះវិញ ស្ថិតនៅតម្លៃ ៧៥,២២ ដុល្លារក្នុង១បារ៉ែល ពោលធ្លាក់ចុះ ៦៣ សេន។
លោកស្រី Sugandha Sachdeva ស្ថាបនិកក្រុមហ៊ុន SS WealthStreet ដែលជាក្រុមហ៊ុនស្រាវជ្រាវទីផ្សារមានមូលដ្ឋាននៅទីក្រុងញូដេលី ប្រទេសឥណ្ឌា បានលើកឡើងថា ការធ្លាក់ចុះតម្លៃប្រេងឆៅ ត្រូវបានជំរុញជាចម្បងដោយសារភាពប្រសើរឡើងនៃលទ្ធភាពទទួលបានការវិវឌ្ឍន៍ផ្នែកការទូតរវាងសហរដ្ឋអាមេរិក និងអ៊ីរ៉ង់ ដែលជួយបង្កើនក្តីសង្ឃឹមឡើងវិញថា នៅទីបំផុត! ទណ្ឌកម្មលើអ៊ីរ៉ង់អាចនឹងត្រូវបានបន្ធូរបន្ថយ»។
ងាក់ទៅអ្នកសម្របសម្រួលកិច្ចចរចាអាមេរិក និងអ៊ីរ៉ង់ បានឱ្យដឹងថា បណ្តាមន្ត្រីជាន់ខ្ពស់របស់ភាគីទាំងពីរ បានបញ្ចប់កិច្ចចរចាជុំទី១ ក្នុងប្រទេសស្វីស នៅថ្ងៃទី២២ ខែមិថុនា។ កិច្ចចរចានេះ បានចាប់ផ្តើមកាលពីថ្ងៃទី២១ ខែមិថុនា ក្រោមលក្ខខណ្ឌអនុស្សរណៈនៃការយោគយល់គ្នា (MoU) ដែលព្រមព្រៀងគ្នាកាលពីសប្តាហ៍មុន ដើម្បីពន្យារបទឈប់បាញ់ដ៏ផុយស្រួយតាំងពីខែមេសាឱ្យបានយ៉ាងហោចណាស់៦០ថ្ងៃទៀត។ បើយោងតាមសេចក្តីថ្លែងការណ៍ដែលត្រូវបានចេញផ្សាយដោយក្រសួងការបរទេសកាតា បានឱ្យដឹងថា កិច្ចចរចាបច្ចេកទេសនឹងបន្តធ្វើឡើងនៅពេលប៉ុន្មានថ្ងៃទៀតនៃសប្តាហ៍នេះ ក្រោមការសម្របសម្រួលពីប្រទេសកាតា និងប៉ាគីស្ថាន នៅទីតាំងដដែល ពោលគឺរមណីយដ្ឋានភ្នំ Bürgenstock នៅក្នុងប្រទេសស្វីស។
ជាមួយគ្នានោះ រដ្ឋមន្ត្រីការបរទេសអ៊ីរ៉ង់ លោក Abbas Araqchi ថ្លែងថា ប្រទេសអ៊ីរ៉ង់ទទួលបានការលើកលែងសម្រាប់ការនាំចេញប្រេង និងគីមីឥន្ធនៈ ការផ្តល់ទ្រព្យសម្បត្តិដែលត្រូវបានបង្កកមួយចំនួនត្រឡប់មកវិញ និងការចាប់ផ្តើមផែនការស្តារឡើងវិញ ក៏ដូចជាអភិវឌ្ឍន៍សម្រាប់ប្រទេសអ៊ីរ៉ង់។
លោកស្រី Sachdeva បានបន្ថែមថា ការវិវត្តថ្មីនេះ នឹងអនុញ្ញាតឱ្យប្រេងឆៅអ៊ីរ៉ង់ជិត ១,៥ លានបារ៉ែលក្នុង១ថ្ងៃ ត្រឡប់ចូលទៅក្នុងទីផ្សារអន្តរជាតិវិញ ដែលនឹងជួយសម្រួលដល់ការផ្គត់ផ្គង់សកលលោកយ៉ាងច្រើន»៕
ចែករំលែកព័តមាននេះ