ប្រទេសបារាំង ៖ ដោយសារធាតុអាកាសក្ដៅខ្លាំង ជាពិសេស ពាក់កណ្ដាលនៃប្រទេសបារាំង ត្រូវដាក់ក្នុងស្ថានភាពប្រកាសអាសន្នក្រហម ចាប់ពីថ្ងៃទី២២ មិថុនា ទៅ ដោយរលកក្ដៅខ្លាំងបំផុត ពុំធ្លាប់មាននឹងនាំទៅដល់ការប្រកាសបិទទ្វារសាលាជាច្រើន ។
ពេលនេះ ខេត្តបារាំងចំនួន៤៩ ត្រូវប្រកាសអាសន្នពីការក្ដៅខ្លាំងចាប់ពីថ្ងៃត្រង់ថ្ងៃទី២២ មិថុនា ទៅ ។ ការក្ដៅខ្លាំងបំផុត មានជាពិសេស នាតំបន់ភាគកណ្ដាល និងភាគខាងលិចបារាំង តំបន់ព្រឺតាញ និងមួយផ្នែកនៃតំបន់ន័រម៉ង់ឌី ដែលជាតំបន់រងការប៉ះពាល់ខ្លាំងជាងគេ ។
ខេត្តបារាំង៤០ទៀត ស្ថិតក្នុងការប្រកាសអាសន្នក្ដៅខ្លាំងកម្រិតពណ៌ទឹកក្រូច។ ផ្នែកឧតុនិយមបារាំងគូសបញ្ជាក់ថា កាលពីថ្ងៃទី២១ មិថុនា ពលរដ្ឋបារាំង៥៣លាននាក់ រងការប៉ះពាល់រួចហើយដោយធាតុអាកាសក្ដៅខ្លាំង ក្នុងខេត្ត៣៥ ដែលមានការប្រកាសអាសន្នពណ៌ក្រហម និងខេត្ត៤៥ ដែលមានការប្រកាសអាសន្នពណ៌ទឹកក្រូច ។
ដោយសារធាតុអាកាសក្ដៅខ្លាំង ជាពិសេស អាជ្ញាធរបារាំងបានអំពាវនាវដល់ប្រជាជនឲ្យមានការប្រុងប្រយត្នខ្ពស់។ ដើម្បីប៉ុនប៉ងចៀសវាងការដួលសន្លប់ និងភាពចលាចលសាធារណៈ គេបានហាមមិនឲ្យផឹកស្រាតាមផ្លូវសាធារណៈ ក្នុងបណ្ដាខេត្តដែលមានការប្រកាសអាសន្នពណ៌ក្រហម ព្រមទាំងក្នុងបណ្ដាខេត្តមានការប្រកាសអាសន្នពណ៌មទឹកក្រូចផងដែរ។
ទីក្រុងធំៗមួយចំនួនរបស់បារាំងរហូតដល់លុបចោលការប្រគំតន្រី្ត ដែលមានមនុស្សប្រមូលផ្ដុំច្រើន ហើយពិធីបុណ្យមួយចំនួនពន្យារពេលចាប់ផ្ដើមរហូតដល់ពេលល្ងាច ឬប្រលប់ ៕
ចែករំលែកព័តមាននេះ