សុខភាព៖ យោងតាមការចុះផ្សាយពីប្រភពបរទេស ទម្លាប់គេងត្រឹមតែបួនម៉ោងក្នុងមួយយប់ដើម្បីដណ្តើមយកភាពជោគជ័យកាលពីអតីតកាលត្រូវបានបោះបង់ចោលទាំងស្រុង។ ផ្ទុយទៅវិញ ក្រុមមហាសេដ្ឋីនិងអ្នកដឹកនាំក្រុមហ៊ុនបច្ចេកវិទ្យាធំៗនៅអាម៉េរិកបាននិងកំពុងវិនិយោគលើគុណភាពនៃការគេងប្រកបដោយភាពច្នៃប្រឌិតខ្ពស់ដើម្បីពន្យារអាយុជីវិតនិងបង្កើនប្រសិទ្ធភាពការងារ។

បច្ចុប្បន្នបន្ទប់គេងរបស់ពួកគេបានប្រែក្លាយជាមន្ទីរពិសោធន៍សុខភាពដ៏ទំនើបដោយសារការបំពាក់ឧបករណ៍បច្ចេកវិទ្យាបញ្ញាសិប្បនិម្មិតនិងឧបករណ៍ចាប់សញ្ញាជីវសាស្ត្រតម្លៃរាប់ពាន់ដុល្លារ។ គ្រែនិងពូកឆ្លាតវៃគឺជាប្រព័ន្ធអេកូឡូស៊ីដ៏សំខាន់បំផុត ដែលអាចកែសម្រួលកម្តៅនិងតាមដានវដ្តនៃការគេងដោយស្វ័យប្រវត្តិដោយពុំចាំបាច់ពាក់ឧបករណ៍អ្វីនៅលើខ្លួនឡើយ។

ទន្ទឹមគ្នានេះ ឧបករណ៍ពាក់ដូចជាចិញ្ចៀនឆ្លាតវៃនិងបន្ទះបិទថ្ងាសត្រូវបានប្រើប្រាស់យ៉ាងទូលំទូលាយដើម្បីតាមដានចង្វាក់បេះដូងនិងសកម្មភាពខួរក្បាល។ មិនតែប៉ុណ្ណោះ គេក៏បានប្រើប្រាស់បច្ចេកវិទ្យាភ្ញោចសរសៃប្រសាទ​ដោយបញ្ចេញចរន្តអគ្គិសនីខ្សោយៗដើម្បីធ្វើឱ្យរាងកាយធូរស្រាលនិងជួយឱ្យឆាប់ងងុយគេង។

ការវិនិយោគទំហំទឹកប្រាក់រាប់ពាន់លានដុល្លារលើវិស័យបច្ចេកវិទ្យាដំណេកនេះបានបង្ហាញឱ្យឃើញនូវការផ្លាស់ប្តូរផ្នត់គំនិតយ៉ាងខ្លាំងក្លា ដោយងាកមកយកចិត្តទុកដាក់លើការសម្រាកកាយជាយុទ្ធសាស្ត្រដើម្បីសុខភាពយូរអង្វែង៕