ខេត្តតាកែវ ៖ ប្រជាពលរដ្ឋប្រមាណ៣០០នាក់មកពី៥ឃុំក្នុងស្រុកត្រាំកក់ បាននាំគ្នាទៅកាន់វត្តមង្គលមានលក្ខណ៍ស្ថិតនៅឃុំត្រពាំងធំខាង ជើង ដើម្បីតវ៉ាអំពីតម្លៃចរន្តអគ្គិសនីដែលចេះតែឡើងឥតឈប់ឈរ និងស្តាប់ការបកស្រាយរបស់អាជ្ញាធរអគ្គិសនីកម្ពុជា កាលពីថ្ងៃទី៤ សីហា ដោយមាន
ខេត្តតាកែវ ៖ ប្រជាពលរដ្ឋប្រមាណ៣០០នាក់មកពី៥ឃុំក្នុងស្រុកត្រាំកក់ បាននាំគ្នាទៅកាន់វត្តមង្គលមានលក្ខណ៍ស្ថិតនៅឃុំត្រពាំងធំខាងជើង ដើម្បីតវ៉ាអំពីតម្លៃចរន្តអគ្គិសនីដែលចេះតែឡើងឥតឈប់ឈរ និងស្តាប់ការបកស្រាយរបស់អាជ្ញាធរអគ្គិសនីកម្ពុជា កាលពីថ្ងៃទី៤ សីហា ដោយមានការអញ្ជើញជាអធិបតីពីលោកទី ថានី នាយកប្រតិបត្តិ អាជ្ញាធរអគ្គិសនីកម្ពុជា និងមានការចូលរួមពីលោកយឹម វិសិដ្ឋ នាយកបញ្ញតិ្តកម្មសេវាកម្មផ្គត់ផ្គង់ លោកស្រីគា សុភូ អភិបាលស្រុកត្រាំកក់ លោកជិត ប៉ុណ្ណារ៉ា ប្រធានក្រុមហ៊ុនអគ្គិសនីអង្គរកា ព្រមទាំងលោកមេឃុំ មេភូមិ ។
លោកមេឃុំជាងទងប្រាប់កោះសន្តិភាពឱ្យដឹងថា ប្រជាពលរដ្ឋដែលប្រើចរន្តអគ្គិសនី អង្គរកាលើកគ្នាមកនេះមកពីចំនួន៥ឃុំមានឃុំជាងទង ឃុំអូរសារាយ ឃុំត្រពាំងធំខាងត្បូង ឃុំត្រពាំងធំខាងជើង និងឃុំតាភេម ប្រមាណជា ៣០០នាក់ ដើម្បីស្តាប់ការពន្យល់របស់អាជ្ញាធរអគ្គិសនីកម្ពុជាពីរឿងភ្លើងដែលបន្តឡើងថ្លៃមិនឈប់ឈរ ។
ស្ត្រីឈ្មោះសែម បូងា ហៅប៉ុច អាយុ៤៣ឆ្នាំ រស់នៅភូមិព្រៃរំដួល ឃុំត្រពាំងធំខាងត្បូងឱ្យដឹងថា អ្នកប្រើប្រាស់ចរន្តអគ្គិសនីអង្គរកានេះកាលពីខែធ្នូ ឆ្នាំ២០១០ បានតវ៉ានៅសាលាស្រុកត្រាំកក់ម្តងមកហើយសុំឱ្យថ្លៃភ្លើងចុះថោក តែត្រូវអាជ្ញាធរស្រុក និងក្រុមហ៊ុនសន្យាថា នៅដើមឆ្នាំ២០១១ នឹងមានបណ្តាញអគ្គិសនីថ្មីប្រើប្រាស់ និងតម្លៃចុះថោកវិញហើយ ។ ទោះជាយ៉ាងណាក្តី មកដល់ខែសីហាទៅហើយអត់មានបណ្តាញអគ្គិសនីថ្មីប្រើ ហើយនៅតែបន្តឡើងថ្លៃ១គីឡូវ៉ាត់ម៉ោង៣២០០រៀលទៀត ដូច្នេះសូមអាជ្ញាធរអគ្គិសនីជួយធ្វើយ៉ាងណាឱ្យបញ្ហាប្រើប្រាស់អគ្គិសនីបានគ្រប់គ្រាន់ ហើយមានតម្លៃថោកសមរម្យអាចទទួលយកបានផង ។
លោកជិត ប៉ុណ្ណារ៉ា ប្រធានសេវាកម្មអគ្គិសនី អង្គរកាបានលើកឡើងថា កាលពីមានការតវ៉ានៅសាលាស្រុកលោកសន្យាថា បើមានប្រាក់កម្ចីពីប្រទេសអាល្លឺម៉ង់នោះនឹងមានបណ្តាញថ្មី ពីអង្គតាសោមមកដល់ទីនេះ តែប្រាក់កម្ចីនោះអត់ទាន់បាន ទើបនៅជួបការលំបាក ។ ដោយសារបែបនេះលោកសំណូមពរប្រជាពលរដ្ឋឱ្យមានការយោគយល់ ។ តម្លៃភ្លើង គឺខាងអាជ្ញាធរអគ្គិសនីកម្ពុជាជាអ្នកដាក់ឱ្យមិនែមនខាងលោកជាអ្នកដំឡើងថ្លៃខ្លួនឯងទេ។
លោកទី ថានី នាយកប្រតិបត្តិអាជ្ញាធរអគ្គិសនីកម្ពុជាឱ្យដឹងថា បណ្តាញអគ្គិសនីដែលតមកពីប្រទេសវៀតណាមប្រើអត់គ្រប់ទេ ទើបនៅមានកន្លែងខ្លះមានភ្លើងឯកជនប្រើ និងមានតម្លៃខ្ពស់បែបនេះព្រោះគេបញ្ឆេះម៉ាស៊ីនភ្លើង ឯប្រេងឡើងថ្លៃជាលំដាប់ ដូច្នេះទាំងអ្នកប្រើប្រាស់ និងក្រុមហ៊ុនត្រូវមានការយោគយល់គ្នា។ លោកបញ្ជាក់ថា ខាងអាជ្ញាធរអគ្គិសនីកម្ពុជាពុំមានលទ្ធភាពអូសបណ្តាញពីអង្គតាសោមមកដល់ទីនេះទេ តែសង្ឃឹមថា ដំណាច់ឆ្នាំ២០១១នេះ វារីអគ្គិសនីភ្នំកំចាយសាងសង់រួចរាល់អាចភ្ជាប់បណ្តាញមកដល់ ដូច្នេះការប្រើប្រាស់គ្រប់គ្រាន់លែងខ្វះទៀតហើយ ។
ទោះបីជាបែបណាក្តី រហូតដល់ម៉ោង១២ថ្ងៃត្រង់ទោះបីខាងអាជ្ញាធរអគ្គិសនីកម្ពុជាពន្យល់បែបណាក៏ប្រជាពលរដ្ឋមិនទទួលយកដែរ គឺនៅតែទាមទារឱ្យតម្លៃភ្លើងចុះថោក និងមានប្រើប្រាស់គ្រប់គ្រាន់ ៕
ចែករំលែកព័តមាននេះ