ឌី សូនីតា ចែករំលែកបទពិសោធន៍ផ្ទាល់ខ្លួន ដោយដាស់តឿនរឿងកុំចង់យកកូនអត់ប្តី
- ភ្នំពេញ
រាជធានីភ្នំពេញ ៖ តារាសម្តែងអ្នកនាង ឌី សូនីតា បានចែករំលែកនូវបទពិសោធន៍ផ្ទាល់ខ្លួន ពាក់ព័ន្ធបញ្ហាជីវិតដែលនាងធ្លាប់មានវិបត្តិ និងការរងសម្ពាធយ៉ាងខ្លាំង ក្នុងពេលដែលនាងកំពុងពពោះកូននៅក្នុងផ្ទៃ ខណៈពេលបញ្ហានេះដែរ នាងក៏ចង់ដាស់តឿនដល់នារីៗគ្រប់រូបថា កុំចង់មានកូនអត់ប្តី ។
តារាស្រីរូបនេះបញ្ជាក់ថា រស់នៅបែបជីវិត Single Mom មិនស្រួលឡើយ គឺរងសម្ពាធណាស់ ហេតុនេះចូលជ្រើសរើសមនុស្សដែលខ្លួនស្រឡាញ់ ដើម្បីសាងគ្រួសារសម្រាប់មើលថែគ្នា កុំគិតខ្លីដូចជានាងដែលនាំឲ្យមានវិប្បដិសារីលងបន្លាចជីវិតយើងអស់មួយជីវិតបើយើងរើសខុស ។តាមរយៈសំណេរបង្ហោះលើបណ្តាញសង្គម តារាសម្តែងនាង ឌី សូនីតា បានលើកឡើងថា នាងល្អិតនៅក្នុងពោះ វិបត្តិផ្លូវចិត្តនៅពេញខ្លួន😅 ។
នាងថា បទពិសោធន៍ខ្ញុំផ្ទាល់ កុំចង់យកកូនអត់ប្តីអីបងប្អូន បើមិនចង់ជួបបញ្ហាបាក់ទឹកចិត្ត សតិអារម្មណ៍ ឈឺចិត្ត អន់ចិត្ត តូចចិត្ត ព្រោះតែឯងគ្មានប្តីនៅក្បែរដូចគេ មនុស្សស្រីមានផ្ទៃពោះ អរម៉ូនប្រែប្រួលលឿនណាស់សាហាវណាស់ ស្លុយណាស់ ឆេវឆាវណាស់ អារម្មណ៍ពីរក្នុងមនុស្សតែ១ រឹងមាំខាងក្រៅមិនខ្លាំងដូចរឹងមាំខាងក្នុងទេ បើទប់ទល់បានឆ្លងផុតដោយជោគជ័យ ចុះបើទប់មិនជាប់ តើនឹងអាចមានបញ្ហាអីកើតឡើងលើជីវិតម៉ែកូន?។
នាងបញ្ជាក់ថា ជីវិត Single Mom មិនស្រួលទេ រងសម្ពាធណាស់ ជ្រើសរើសមនុស្សដែលយើងស្រលាញ់សាងគ្រួសារមើលថែរគ្នាយល់ចិត្តគ្នាទុកចិត្តគ្នាបាន យកគេទៅអ្នកនឹងក្លាយជាព្រះនាងយ៉ាងពិតប្រាកដ កុំរឹងមាំពេក កុំគិតអីខ្លីៗដូចខ្ញុំពេក វិប្បដិសារីនឹងលងបន្លាចជីវិតយើងអស់មួយជីវិត បើយើងរើសខុស ។
គួរបញ្ជាក់ថា តារាសម្តែងនាង ឌី សូនីតា បានសម្រាលកូនស្រីមួយរូបយ៉ាងស្រស់ស្អាត និងគួរឲ្យស្រាឡាញ់កាលពីអំឡុងឆ្នាំ២០២០ ខណៈពេលដែលនាងមិនមានដំណឹងរៀបការមានស្វាមីជាមួយបុរសណាម្នាក់ឡើយ ។ យ៉ាងណាកន្លងមក មានការសន្និដ្ឋានថា កូនរបស់ ឌី សូនីតា គឺជាតំណក់ឈាមរួមគ្នាជាមួយនឹងតារាសម្តែងលោក អេឡិច ហ្សូរ៉ា បន្ទាប់ពីអ្នកនាងទាំងពីរបានបង្ហាញពីទំនាក់ទំនងគ្នាយ៉ាងស្និទ្ធរមួតទាំងក្នុង និងក្រៅសិល្បៈ ។
យ៉ាងណាក៏ដោយ ជុំវិញរឿងរ៉ាវមានកូនមិនទាន់រៀបការ និងមិនបញ្ចេញមុខឪពុកកូនរបស់ខ្លួននោះ កន្លងមក ឌី សូនីតា ក៏ថ្លែងសារសុំទោសទៅកាន់អ្នកគាំទ្រផងដែរ ដោយនៅក្នុងនោះនាងលើកហេតុផលថា នាងមានរឿងរ៉ាវផ្ទាល់ខ្លួនដែលទស្សនិកជនមិនអាចដឹង។
នាងបញ្ជាក់ថា នាងមិនមានចេតនាក្នុងការលាក់ទេ ប៉ុន្តែនាងមិនមានសុខភាពល្អ និងមិនមានភាពក្លាហានក្នុងការបង្ហាញ ហើយនាងក៏សង្ឃឹមថា នឹងទទួលបានការយោគយល់។ នាងថា ក្រុមគ្រួសារនាងមានជំងឺតំណរពូជដែលពិបាកនឹងពរពោះ ក្រោយវ័យ៣០ឆ្នាំ ទើបនឹងសម្រេចចិត្តទទួលយកដំណក់ឈាមមួយនេះដោយមិនបានឆ្លងកាត់ការរៀបការ។ ឌី សូនីតា បានបញ្ជាក់ច្បាស់ៗថា កូនខ្ញុំជាកូនរបស់នាងតែម្នាក់ មិនមានឪពុកទេ ខណៈពេលដែលលោក អេឡិច ហ្សូរ៉ា ក៏មិនត្រូវជាអ្វីនឹងកូនខ្ញុំ ហើយនឹងខ្ញុំដែរ ហើយកូនខ្ញុំគ្មានឪពុកតាំងពីដើម ៕
ចែករំលែកព័តមាននេះ