រាជធានីភ្នំពេញ ៖ កម្មករ-កម្មការិនីរោងចក្រកាត់ដេរសម្លៀកបំពាក់សិនតៃហ្គាមេន ខូអិលធីឌី ប្រមាណ៣០នាក់ ក្នុងចំណោមជិត២.០០០នាក់បានដួលសន្លប់ព្រមៗគ្នា ក្រោយពីមានទុស្សេម៉ាស៊ីនភ្លើងរបស់រោងចក្រដល់ទៅ២ដង បណ្តាលឱ្យឆេះហុយផ្សែងទ្រលោមមួយប្រឹប នាំឱ្យកម្មករភ័យ
រាជធានីភ្នំពេញ ៖ កម្មករ-កម្មការិនីរោងចក្រកាត់ដេរសម្លៀកបំពាក់សិនតៃហ្គាមេន ខូអិលធីឌី ប្រមាណ៣០នាក់ ក្នុងចំណោមជិត២.០០០នាក់បានដួលសន្លប់ព្រមៗគ្នា ក្រោយពីមានទុស្សេម៉ាស៊ីនភ្លើងរបស់រោងចក្រដល់ទៅ២ដង បណ្តាលឱ្យឆេះហុយផ្សែងទ្រលោមមួយប្រឹប នាំឱ្យកម្មករភ័យស្លន់ស្លោ និងភ្ញាក់ផ្អើលកាលពីវេលាម៉ោង១២និង៣០នាទី ថ្ងៃទី៤ សីហា ២០១១ ស្ថិតក្នុងភូមិដំណាក់ សង្កាត់ភ្នំពេញថ្មី ខណ្ឌសែនសុខ តាមបណ្តោយផ្លូវរថភ្លើង។
យោងតាមសមត្ថកិច្ចខណ្ឌសែនសុខ បានឱ្យដឹងថា រោងចក្រសិនតៃហ្គាមេន ខូអិលធីឌី មានកម្មករប្រហែល២.០០០នាក់ កំពុងធ្វើការ ស្រាប់តែមកដល់វេលាម៉ោង១១និង៣០នាទីព្រឹកក៏មានទុស្សេម៉ាស៊ីនភ្លើងឆេះហុយផ្សែងទ្រលោម។ ភ្លាមៗនោះ គេក៏បានទាញបំពង់ឧស្ម័នពន្លត់អគ្គិភ័យទៅបាញ់ពន្លត់ទាន់ពេលវេលា ហើយអ្នកជំនាញក៏ផ្តាច់ខ្សែចរន្តអគ្គិសនី និងដេញកម្មករចេញទៅក្រៅមួយភ្លែត។ ពេលជួសជុលរួចរាល់នៅវេលាម៉ោង១២និង៣០នាទី កម្មករត្រូវបានអនុញ្ញាតឱ្យចូលធ្វើការវិញ ប៉ុន្តែមិនបានប៉ុន្មានផង ម៉ាស៊ីនភ្លើងនោះក៏ផ្ទុះឡើងម្តងទៀត បណ្តាលឱ្យហ៊ុយផ្សែងទ្រលោមជះក្លិនឈ្ងៀម ពិបាកដកដង្ហើម។ ចំណែកកម្មករស្រាប់តែនាំគ្នាដួលសន្លប់បន្តបន្ទាប់រហូតដល់ជិត៣០នាក់ បង្កឱ្យមានភាពភ្ញាក់ផ្អើលដល់កម្មករដទៃទៀតរត់ចេញក្រៅឱ្យប្រសាចស្រែកឱ្យគេជួយ។ ភ្លាមៗនោះសមត្ថកិច្ចបានទាក់ទងហៅរថយន្តពេទ្យ មកដឹកយកទៅសង្គ្រោះ នៅតាមគ្លីនិក និងមន្ទីរពេទ្យនានា។
សូមបញ្ជាក់ថា មូលហេតុដែលម៉ាស៊ីនភ្លើងផ្ទុះឡើងត្រូវបានក្រុមជាងប្រាប់ថា គឺបណ្តាលមកពីភ្លេចដាក់ទឹកជំនួយម៉ាស៊ីន (ដាក់ទឹកកុំឱ្យឆាប់ក្តៅ) លុះដល់បញ្ឆេះប្រើយូរបន្តិចវាក៏ក្តៅរួចហើយផ្ទុះឆេះតែម្តង ។ មិនតែប៉ុណ្ណោះបានជះផ្សែងទ្រលោមចូលមកក្នុងសាលកម្មករធ្វើការទើបបណ្តាលឱ្យពួកគេដួលសន្លប់ដោយសារតែពុលនឹងផ្សែងនោះ ៕
ចែករំលែកព័តមាននេះ