ក្មេងប្រុសពិការ.ដៃ.ជើងម្នាក់ល.ង់ទឹកស្រះស្លា.ប់ ត្រូវប្រជាពលរដ្ឋហៅថា «ជាស្រះទឹកមរណៈ»
- ភ្នំពេញ
រាជធានីភ្នំពេញ ៖ ក្មេងប្រុសម្នាក់ពិការដៃជើងតាំងពីកំណើត ប៉ុន្តែអាចដើរបាន ហើយក៏ដើរទៅលេងទឹកស្រះមួយកន្លែងជាមួយក្មេងៗ៤ ទៅ៥នាក់ទៀត និងបានរអិលធ្លាក់ចូលកន្លែងទឹកជ្រៅ ក៏បណ្ដាលឲ្យលង់ស្លាប់តែ
ម្តង ។ ដោយឡែក ប្រជាពលរដ្ឋបាននាំគ្នាជួយស្រង់ភ្លាមៗដែរ ប៉ុន្តែមិនអាចជួយសង្គ្រោះបាន ហើយពួកគាត់បានហៅស្រះទឹកនោះថាជា «ស្រះមរណៈ» ព្រោះរយៈពេលប៉ុន្មានឆ្នាំកន្លងមកនេះ មានមនុស្សលង់ទឹកស្រះខាងលើស្លាប់ចំនួន៦នាក់ហើយ ។
ហេតុការណ៍នោះ បានកើតឡើងបង្កឲ្យមានការភ្ញាក់ផ្អើល កាលពីវេលាម៉ោង១២ និង១៥នាទីថ្ងៃត្រង់ថ្ងៃទី៦ ខែ
មិថុនា ឆ្នាំ២០២៦ នៅចំណុចស្រះទឹក ស្ថិតនៅក្នុងភូមិស្រែជម្រៅ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ។
ក្មេងប្រុសដែលស្លាប់ក្រោយនេះ ឈ្មោះគង់ សុខសាន្ត អាយុ១៥ឆ្នាំ ជាជនពិការដៃនិងជើងពីកំណើត ហើយជាក្មេងកំព្រាឪពុក ដោយឪពុកម្ដាយបានលែងលះគ្នាច្រើនឆ្នាំមកហើយ ។ សព្វថ្ងៃនេះ ក្មេងប្រុសអភ័ព្វរូបនោះ បានស្នាក់នៅផ្ទះជួលជាមួយម្ដាយបង្កើតដែលជាស្រីមេម៉ាយ ស្ថិតនៅក្នុងភូមិកើតហេតុខាងលើនោះដែរ ។ ពេលឃើញកូនប្រុសជាទីស្រលាញ់របស់ខ្លួនស្លាប់បែបនេះ ស្ត្រីជាម្ដាយបានត្រឹមតែយំសោក ទាំងក្ដីអាឡោះអាល័យចំពោះកូនដ៏កំសត់របស់ខ្លួនប៉ុណ្ណោះ ។
អ្នកភូមិបាននិយាយថា នៅមុនពេលកើតហេតុ ក្មេងប្រុសរងគ្រោះបានទៅលេងទឹកស្រះខាងលើ ជាមួយក្មេងៗចំនួន៤ទៅ៥នាក់ទៀតទាំងមេឃកំពុងធ្លាក់ភ្លៀងទៀតផង ។ ខណៈនោះ ស្រាប់តែរអិលធ្លាក់ចូលទៅកន្លែងទឹកជ្រៅក៏លង់លិចបាត់ទៅក្នុងទឹកតែម្ដង ហើយពេលឃើញបែបនេះ ក្មេងៗដែលទៅជាមួយបាននាំគ្នារត់ឡើងគោក រួចស្រែកប្រាប់អ្នកលក់ដូរនៅជិតនោះឲ្យជួយ ។
អ្នកភូមិបាននិយាយប្រាប់បន្តថា ពេលនោះ បានបង្កឲ្យមានការភ្ញាក់ផ្អើលយ៉ាងខ្លាំង ហើយពួកគាត់បាននាំគ្នាចុះទៅជួយស្រង់បានដាក់លើគោក ក្នុងបំណងជួយសង្គ្រោះ ប៉ុន្តែក្មេងប្រុសនោះបានស្លាប់បាត់បង់ជីវិតទៅហើយ ។ ដោយឡែក ស្រះទឹកនោះមានជម្រៅជ្រៅគួរសមដែរ ដោយគេជីកយកអាចម៌ដីកាលពីប៉ុន្មានឆ្នាំមុន ហើយជាស្រះមរណៈ ព្រោះបើគិតរហូតមកដល់ពេលនេះ មានមនុស្សលង់ទឹកស្រះនេះស្លាប់ជាបន្តបន្ទាប់ចំនួន៦នាក់រួចមកហើយ ។
ក្រោយពេលកើតហេតុ កម្លាំងនគរបាលប៉ុស្តិ៍ចោមចៅទី២ បានចុះទៅពិនិត្យជាក់ស្ដែង និងបានរាយការណ៍បន្តទៅកាន់នគរបាលការិយាល័យបច្ចេកទេសនិងវិទ្យាសាស្ត្រ នៃស្នងការដ្ឋាននគរបាលរាជធានីភ្នំពេញ ដើម្បីចុះទៅធ្វើកោសល្យវិច័យ ៕
ចែករំលែកព័តមាននេះ