ទីក្រុងវ៉ាស៊ីនតោន៖ លោកអ៊ីឡនម៉ាស់ដែលជាម្ចាស់ក្រុមហ៊ុនសេវាអ៊ីនធឺណិតស្តាលីង (Starlink) កាលពីយប់មិញចោទប្រកាន់ថារដ្ឋាភិបាលរបស់លោកត្រាំធ្វើខុសពីកិច្ចសន្យារវាងក្រុមហ៊ុនរបស់លោក ជាមួយមន្ទីរបញ្ចកោណ។ លោកម៉ាស់បង្ហោះសារនៅលើបណ្ដាញអ៊ិចថាក្រសួងការពារជាតិអាមេរិកធ្វើខុសពីលក្ខខណ្ឌនៅក្នុងកិច្ចសន្យា។ លោកចោទថាក្រសួងនេះប្រើប្រាស់សេវាអ៊ីនធឺណិតស្តាលីងនៅពេលយោធាអាមេរិកពឹងផ្អែកកាន់តែខ្លាំងឡើងៗទៅលើក្រុមហ៊ុន និងផលិតផលខាងក្រៅ។ ជាពិសេស ផលិតផលរបស់ក្រុមហ៊ុនលោក។
លោកម៉ាស់អះអាងថាសេវាអ៊ីនធឺណិតស្តាលីងដែលដាក់ឱ្យដំណើរការសម្រាប់វិស័យស៊ីវិលត្រូវពួកគេ (មន្ទីរបញ្ចកោណ) ប្រើប្រាស់សម្រាប់វិស័យយោធា។ លោកចាត់ទុកថានេះជាការរំលោភដោយផ្ទាល់ទៅលើលក្ខខណ្ឌនៃកិច្ចព្រមព្រៀង។ យោងតាមទីភ្នាក់ងារព័ត៌មានរ៉យទ័រដែលបានទាក់ទងទៅមន្ត្រីរដ្ឋាភិបាលអាមេរិកមិនបញ្ចេញឈ្មោះ និងដែលបានឆែកមើលឯកសារសម្ងាត់ផ្ទៃក្នុងរបស់មន្ទីរបញ្ចកោណ រដ្ឋាភិបាលអាមេរិក និងក្រុមហ៊ុនស្ពេសអ៊ិច (ដែលជាម្ចាស់ស្តាលីង) និយាយមិនត្រូវគ្នាពាក់ព័ន្ធនឹងការដំឡើងថ្លៃសេវានោះទេ។
ក្រុមហ៊ុនរបស់លោកម៉ាស់យល់ថាចាំបាច់ត្រូវតែដំឡើងថ្លៃព្រោះមន្ទីរបញ្ចកោណបានឯកភាពទទួលយកការផ្ដល់សេវាសម្រាប់កញ្ចប់ប្រើប្រាស់នៅក្នុងចំណោមជនស៊ីវិល។ ទន្ទឹមនឹងនោះ លោកចោទថាមន្ទីរបញ្ចកោណប្រើសេវាអ៊ីនធឺណិតរបស់លោកសម្រាប់ប្រតិបត្តិការសឹកនៅអ៊ីរ៉ង់ទៅវិញ។ ឆ្លើយតបទៅនឹងការចោទប្រកាន់របស់លោកម៉ាស់ដូចខាងលើនេះ មន្ទីរបញ្ចកោណថ្លែងប្រាប់ទស្សនាវដ្ដីញូស្វីក (Newsweek) ថាក្រសួងការពារជាតិប្ដេជ្ញាអនុវត្តតាមស្ថានភាពប្រកួតប្រជែងនៃកិច្ចទំនាក់ទំនងតាមបណ្ដាញផ្កាយរណប។ ក្នុងនោះរួមទាំងជម្រើសបន្ថែមដែលផ្ដល់សេវាផ្សេងៗជាច្រើនទៀតពីម្ចាស់ក្រុមហ៊ុន។
អ្នកនាំពាក្យមន្ទីរបញ្ចកោណក៏បានបង្ហោះសារនៅលើបណ្ដាញអ៊ិចផងដែរ។ លោកថ្កោលទោសអត្ថបទចុះផ្សាយរបស់រ៉យទ័រ។ លោកថាក្រុមហ៊ុនស្ពេសអ៊ិចនៅតែជាដៃគូដ៏រឹងមាំ និងដ៏មានតម្លៃ (របស់មន្ទីបញ្ចកោណ)។ ចំណុចដែលគួរដឹងអំពីការផ្ដល់សេវាស្តាលីងសម្រាប់មន្ទីរបញ្ចកោណគឺថាក្រុមហ៊ុនស្ពេសអ៊ិចលក់កញ្ចប់សេវាពិសេសសម្រាប់វិស័យយោធាដែលមានឈ្មោះថា «ស្តាស៊ីល» (Starshield) ដែលរ៉យទ័រផ្សាយថាមន្ទីរបញ្ចកោណបានសម្រេចជ្រើសរើសកញ្ចប់សេវានេះនៅក្នុងកិច្ចព្រមព្រៀងឆ្នាំ២០២៣៕ ប្រភព៖ Newsweek
ចែករំលែកព័តមាននេះ