ខេត្តក្រចេះ ៖ លោកយាយទុរគតម្នាក់រស់គ្មានទីពឹងកណ្តោចកណ្តែងម្នាក់ឯង លើផ្ទះឈើប្រក់ស្បូវ ដំបូលប្រក់មេឃ ជញ្ជាំងស្លឹកប្រឹងរស់ទាំងត្រដរពឹងលើព្រហ្មលិខិតជាអ្នក កំណត់វាសនាទាំងមានជំងឺរ៉ាំរ៉ៃប្រចាំកាយ និងមានវ័យចាស់ជរា ត្រចៀកធ្ងន់ ដៃជើងស្ទើរកំរើកមិនកើត ។ គាត់រស់នៅសព្វថ្ងៃ
ខេត្តក្រចេះ ៖ លោកយាយទុរគតម្នាក់រស់គ្មានទីពឹងកណ្តោចកណ្តែងម្នាក់ឯង លើផ្ទះឈើប្រក់ស្បូវ ដំបូលប្រក់មេឃ ជញ្ជាំងស្លឹកប្រឹងរស់ទាំងត្រដរពឹងលើព្រហ្មលិខិតជាអ្នកកំណត់វាសនាទាំងមានជំងឺរ៉ាំរ៉ៃប្រចាំកាយ និងមានវ័យចាស់ជរា ត្រចៀកធ្ងន់ ដៃជើងស្ទើរកំរើកមិនកើត ។ គាត់រស់នៅសព្វថ្ងៃបានអ្នកជិតខាងផ្តល់ចំណីអាហារគ្រាន់ចិញ្ចឹមក្រពះមួយគ្រាៗ ។
កូនប្រុសបង្កើតទាំងបួននាក់របស់លោកយាយទៅរស់នៅឆ្ងាយជាមួយប្រពន្ធកូនដោយមានជីវភាពលំបាកវេទនាដូចគ្នា ក្នុងនោះមានកូនប្រុសម្នាក់បានស្លាប់ដោយសារទាហានសៀមបាញ់សម្លាប់ពេលចូលទៅកាប់ឈើគ្រញូងនៅស្រុកអន្លង់វែង ខេត្តឧត្តរមានជ័យ ។ ក្រោយពីកូនប្រុសរូបនេះបានទទួលមរណភាព លោកយាយធ្លាក់ខ្លួនឈឺ និងដុនដាបពីមួយថ្ងៃទៅមួយថ្ងៃ។
ពាក្យមួយឃ្លាពោលថា «កើតចាស់ឈឺស្លាប់គឺជារឿងធម្មតារបស់មនុស្សក្នុងលោក» តែដូនចាស់ឈ្មោះសែន រ៉ន អាយុ៧៩ឆ្នាំ មានទីលំនៅក្នុងភូមិកែង ឃុំជ្រោយបន្ទាយ ស្រុកព្រែកប្រសព្វនៅតែព្យាយាមរស់ទាំងត្រដរទាំងមានជំងឺលើសឈាមជាប់កាយ និងបានធ្លាក់ខ្លួនឈឺដុនដាប់កាន់តែខ្លាំងរយៈពេលជាច្រើនឆ្នាំមកហើយ ។ គាត់ស្នាក់នៅក្នុងផ្ទះឈឺមួយខ្នងតែប្រៀបបាននៅកណ្តាលលំហវេហាស៍ដោយមានថ្ងៃខ្លះគាត់ត្រូវសំរាន្តទាំងទទឹកភ្លៀងនៅក្នុងផ្ទះរងាញ័ររណ្តំថ្គាមដោយសារតែផ្ទះគ្មានដំបូល ប្រក់ជិត ។ សព្វថ្ងៃនេះលោកយាយស្ទើរមិនអាចងើបអង្គុយដោយខ្លួនឯងបានទេ គឺបានត្រឹមតែដេកដណ្តប់ភួយចាស់ផ្ទាល់នឹងរនាបប្ញស្សីបាក់ធ្លុះធ្លាយចំកណ្តាលផ្ទះ ក្នុងសភាពញរ័ ទទ្រើក ។ គាត់អាចប្រឹងងើបចំអិនបាយដោយកូនឆ្នាំងស្ពាន់ដែលសល់ពីបុរាណមួយ គឺដាំព្រឹកទុកហូបដល់ស្អែក ។
ដោយមើលឃើញពីការលំបាករបស់ជីដូនរូបនេះ ដែលទ្រាំរស់ទាំងត្រដរពីមួយថ្ងៃទៅមួយថ្ងៃនោះ និងដោយមានការអាណិតអាសូរប្រជាពលរដ្ឋរស់នៅក្បែរខាងតែងតែជួយឧបត្ថម្ភជាចំណីអាហារម្តងម្កាល គ្រាន់ជួយដល់ក្រពះដែលកំពុងតែស្រេកឃ្លានជាមួយនឹងជំងឺដ៏ដុនដាបប្រចាំកាយ ។ ដោយសារតែពិបាកមើលចំពោះការលំបាកបែបនេះអ្នកស្រុកបានហៅលោកយាយទៅសម្រាកនៅលើផ្ទះរបស់អ្នកភូមិក្បែរខាងគ្រាន់បានគេជួយមើល
ថែ តែលោកយាយបដិសេធមិនទៅទេ ដោយមានប្រសាសន៍ថា «គាត់ស៊ូស្លាប់នៅក្រោមដំបូលផ្ទះមួយខ្នងនេះ ជាមួយផ្នូរសពប្តីរបស់គាត់ដែលស្លាប់ និងបានកប់ទុកនៅខាងមុខផ្ទះ»។
ក្រោយពីបានទទួលព័ត៌មានតាមរយៈទូរស័ព្ទពីប្រជាពលរដ្ឋអំពីទុក្ខវេទនារបស់ជីដូនឯការូបនេះនៅព្រឹកថ្ងៃទី៣១ កក្កដា លោកឧត្តមសេនីយ៍ត្រីជួង ស៊ាងហាក់ ស្នងកានគរបាលខេត្ត និងមន្រ្តីនគរបាលនៃស្នងការដ្ឋានជាច្រើនរូបទៀតបានទៅពិនិត្យមើលទិដ្ឋភាពរស់នៅរបស់គាត់ដល់ទីកន្លែង និងនាំអំណោយជា ប្រាក់ និងសម្ភារទៅប្រគល់ជូនផងដែរ ។
អំណោយមានប្រាក់៥៦ម៉ឺនរៀល និងគ្រឿងឧបភោគ បរិភោគមួយចំនួនទៀតរួមមាន មី អង្ករ ទឹកត្រី ទឹកស៊ីអីុវ ប៊ីចេង ស្ករស អំបិល ត្រីខកំប៉ុង ត្រូវបានប្រគល់ជូនដោយផ្ទាល់ពីលោកឧត្តមសេនីយ៍ត្រីជួង ស៊ាងហាក់ លោក អៀន ភារម្យ អភិបាលរងស្រុកព្រែកប្រសព្វ លោកអធិការស្រុក មេឃុំ និងមេភូមិ។
តាមការរៀបរាប់របស់ស្រ្តីឈ្មោះរ៉េត សុខវឿន អាយុ៥២ឆ្នាំជាប្រជាពលរដ្ឋរស់នៅក្បែរខាងនិយាយថា នៅក្នុងភូមិដូនចាស់រូបនេះមិនមានសាច់ញាតិនឹងគេទេ ។ មុនពេលធ្លាក់ខ្លួនឈឺគាត់មានមុខរបរជាអ្នកលក់នំបញ្ចុក ។ គាត់មានកូនប្រុស៤នាក់ដែលកូនទាំងនោះបានទៅប្រកបមុខរបរឆ្ងាយ ហើយសុទ្ធសឹងតែមានជីវភាព ក្រីក្រលំបាកដូចគ្នា ។ ក្នុងចំណោមកូនទាំងនោះ មានកូនប្រុសម្នាក់ស្លាប់កាលពីប៉ុន្មានឆ្នាំមុន ខណៈពេលដែលគេបានទៅស៊ីឈ្នួលកាប់ឈើគ្រញូងនៅព្រំដែន រីឯប្តីរបស់គាត់បានស្លាប់ជាង១០ឆ្នាំហើយ ដោយសារតែជំងឺរបេងសួត ។
លោកឧត្តមសេនីយ៍ត្រី ជួង ស៊ាងហាក់ ស្នងការនគរបាលខេត្តបានមានប្រសាសន៍ថា ក្រោយពីទទួលបានព័ត៌មានពីប្រជាពលរដ្ឋ ក្នុងនាមជាមន្រ្តីនគរបាលនៃស្នងការដ្ឋាននគរបាលខេត្តក្រចេះ លោកផ្តើមរៃអង្គាសប្រាក់ និងសម្ភារមួយចំនួនយកទៅប្រគល់ជូនជីដូនចាស់រូបនេះគ្រាន់បានផ្គត់ផ្គង់ជីវភាពរស់នៅប្រចាំថ្ងៃបានមួយរយៈពេល។
លោកស្នងការថ្លែងថា ទោះបីជាសម្ភារ និងថវិកាទាំងនេះមិនច្រើនពិតមែនតែអាចជួយដោះស្រាយការលំបាកបានមួយរយៈ។លោកនឹងបន្តការរៃអង្គាសជាសម្ភារ និងថវិកាមកផ្តល់ជូនលោកយាយបន្ថែមទៀតសំរាប់ផ្គត់ផ្គង់លើជីវភាពរស់នៅប្រចាំថ្ងៃ និងសាងសង់ដំបូលផ្ទះឱ្យមានភាពសមរម្យ។
ទាំងថវិកា និងសម្ភារ ដែលបានប្រគល់ជូននៅព្រឹកនោះត្រូវបានរក្សាទុកដោយអាជ្ញាធរ ថ្នាក់ឃុំ សម្រាប់ផ្គត់ផ្គង់ដល់ជីវភាពលោកយាយ៕
ចែករំលែកព័តមាននេះ