រាជធានីភ្នំពេញ ៖ ទារកម្នាក់ ដែលទើបកើតបានរយៈពេល១៨ថ្ងៃប៉ុណ្ណោះ ខណៈស្ត្រីជាម្ដាយឲ្យបៅទឹកដោះគោ អត់បៅនោះទេបានងាកចេញ លុះមួយសន្ទុះក្រោយមក ក៏ស្រាប់តែមានអាការៈចេញឈាមតាមរន្ធច្រមុះ និងស្រែកយំខ្លាំង បន្ទាប់មកក៏បានស្លាប់បាត់បង់ជីវិតតែម្ដង…
រាជធានីភ្នំពេញ ៖ ទារកម្នាក់ ដែលទើបកើតបានរយៈពេល១៨ថ្ងៃប៉ុណ្ណោះ ខណៈស្ត្រីជាម្ដាយឲ្យបៅទឹកដោះគោ អត់បៅនោះទេបានងាកចេញ លុះមួយសន្ទុះក្រោយមក ក៏ស្រាប់តែមានអាការៈចេញឈាមតាមរន្ធច្រមុះ និងស្រែកយំខ្លាំង បន្ទាប់មកក៏បានស្លាប់បាត់បង់ជីវិតតែម្ដង ។
ហេតុការណ៍នោះបានកើតឡើងកាលពីវេលាម៉ោងជាង៨ព្រឹកថ្ងៃទី១៨ ខែឧសភា ឆ្នាំ២០២៦ នៅចំណុចបន្ទប់ជួលលេខ៨ជាន់ទី២ ស្ថិតនៅក្នុងភូមិចោមចៅ២ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ។
ទារកខាងលើឈ្មោះ មឿន ម៉េងលី អាយុ១៨ថ្ងៃ មានឪពុកឈ្មោះ ម៉ៃ សង្វាត អាយុ៤៤ឆ្នាំ មុខរបរជាអ្នកសារព័ត៌មាន និងម្ដាយឈ្មោះ ស្រី សារះ អាយុ៣៨ឆ្នាំ សព្វថ្ងៃនេះគ្រួសារខាងលើ ស្នាក់នៅបន្ទប់ជួលក្នុងភូមិកើតហេតុខាងលើ ។
សមត្ថកិច្ច បានប្រាប់ថា កាលពីថ្ងៃទី១២ ខែឧសភា ទារកនោះមានអាការៈក្ដៅខ្លួន ហើយម្ដាយបានទិញថ្នាំច្រក និងបានត្រជាក់ធូរស្បើយវិញហើយ រហូតដល់វេលាម៉ោង៤ជិតភ្លឺ ថ្ងៃកើតហេតុ ទារកខាងលើបានភ្ញាក់ពីដេក និងបានយំ ហើយឪពុកម្ដាយក៏បានលួងឲ្យដេក រួចក៏ដេកលក់ទៅវិញ។ រហូតដល់វេលាម៉ោង៨ព្រឹកថ្ងៃដដែល ទើបភ្ញាក់ម្ដងទៀត ខណៈនោះបុរសជាឪពុកបានចេញទៅធ្វើការ ដោយទុកឲ្យស្ត្រីជាម្ដាយនៅមើលកូនក្នុងបន្ទប់ជួលនោះ ហើយម្ដាយបានឆុងទឹកដោះគោ ឲ្យកូនបៅ។ ខណៈនោះកូនអត់បៅទេ និងបានងាកមុខចេញ លុះមួយសន្ទុះក្រោយមក ក៏ស្រាប់តែកូនប្រុសខាងលើមានអាការៈចេញឈាមតាមរន្ធច្រមុះ និងស្រែកយំខ្លាំងៗ ហើយបន្តិចក្រោយមកទៀត ក៏បានដាច់ខ្យល់ស្លាប់បាត់បង់ជីវិតភ្លាមៗតែម្ដង ។
សមត្ថកិច្ចបានប្រាប់ឲ្យដឹងបន្តទៀតថា ពេលនោះស្ត្រីជាប្រពន្ធបានខលប្រាប់បុរសជាប្ដីថា កូនស្លាប់ហើយ ទើបប្ដីដែលកំពុងធ្វើការបានធ្វើដំណើរត្រលប់ទៅកាន់បន្ទប់ជួលវិញ ដើម្បីមើលកូនប្រុស។ លុះដល់វេលាម៉ោងជាង៩ព្រឹកថ្ងៃដដែល ប្ដីប្រពន្ធខាងលើបានទៅប្រាប់រឿងកូនរបស់ខ្លួនស្លាប់ ដល់លោកតាអាចារ្យវត្តគោកបញ្ជាន់ ដែលស្ថិតនៅក្បែរនោះដែរ ។
គ្រាន់តែបានដឹងរឿងនេះភ្លាម លោកតាអាចារ្យ ក៏បានរាយការណ៍ប្រាប់ដល់អាជ្ញាធរ និងនគរបាលបានដឹង ទើបបង្កឲ្យមានការភ្ញាក់ផ្អើល ហើយនគរបាលប៉ុស្តិ៍ចោមចៅទី២ និងនគរបាលខណ្ឌពោធិ៍សែនជ័យ បានចុះទៅកាន់ទីតាំងកើតហេតុ ។
សមត្ថកិច្ច បានបញ្ជាក់បន្ថែមទៀតថា បន្ទាប់មកនគរបាលខាងលើបានរាយការណ៍ទៅកាន់នគរបាលការិយាល័យបច្ចេកទេស និងវិទ្យាសាស្ត្រ នៃស្នងការដ្ឋានរាជធានីភ្នំពេញចុះទៅធ្វើកោសល្យវិច័យ។ ដោយឡែកនៅវេលារសៀលថ្ងៃដដែល ក្រោយពីការពិនិត្យកោសល្យវិច័យរួច នគរបាលការិយាល័យបច្ចេកទេស និងវិទ្យាសាស្ត្រ នៃស្នងការដ្ឋានរាជធានីភ្នំពេញ បានបញ្ជាក់ថា ទារកនោះនោះស្លាប់ដោយសារជំងឺរលាកទងសួតធ្ងន់ធ្ងរ។ បន្ទាប់មកនៅវេលាល្ងាចថ្ងៃខែឆ្នាំដដែលនោះ បុរសជាឪពុក បានជិះម៉ូតូ ១គ្រឿង ជាមួយសាច់ញាតិ បីសពកូនប្រុសចេញពីផ្ទះ យកទៅបូជានៅឈាបនដ្ឋានវត្តអរុណវតី ស្ថិតនៅក្នុងភូមិត្រពាំងអណ្ដូង សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ៕
ចែករំលែកព័តមាននេះ